ՇԱՐՈՒՆԱԿՎՈՒՄ Է «ՄԵՆՔ ՄԵՐ ԶԻՆՎՈՐԻ ԿՈՂՔԻՆ ԵՆՔ» ԾՐԱԳԻՐԸ
Արխիվ 12-16
ՇԱՐՈՒՆԱԿՎՈՒՄ Է «ՄԵՆՔ ՄԵՐ ԶԻՆՎՈՐԻ ԿՈՂՔԻՆ ԵՆՔ» ԾՐԱԳԻՐԸ
ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոսի առաջնորդությամբ Զորավոր ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը և երիտասարդաց միության անդամներն այցելեցին առաջին կարգի հաշմանդամ Գեւորգ Եղիազարյանին: Գեւորգը երեք տարի առաջ ՀՀ ԶՈՒ ծառայության ընթացքում թշնամու կողմից ստացած հրազենային վնասվածքի պատճառով առաջին կարգի հաշմանդամ է դարձել: Այցելության նպատակը «Նվիրիր հույս» բարեգործական երկրորդ համերգից ստացված ողջ հասույթը նրան փոխանցելն էր:
Համերգը դեկտեմբերի 19-ին Տ. Նավասարդ արքեպիսկոպոսի օրհնությամբ կազմակերպել էր Զորավոր ս. Աստվածածին եկեղեցու «Զորավոր» երիտասարդաց միությունը:
«Դու միայնակ չես, բոլորս աղոթում ենք քեզ համար՝ հոգով և սրտով քեզ հետ լինելով: Քո առողջությունը խաթարվել է հայրենիքի ծառայության սուրբ գործի ճանապարհին: Հուսանք, որ Տերը կզորացնի, կդարմանի քո ցավերը՝ լիարժեք կյանքի վերադարձնելով»,- ասաց Նավասարդ սրբազանը հաշմանդամ զինվորին: Սրբազան հայրը Քրիստոսի հետ կենդանի հաղորդակցություն ունենալու համար Գեւորգին նվիրեց Նոր Կտակարան:
Գեւորգի ծնողներն իրենց երախտագիտությունը հայտնեցին Սրբազան Հորը: Մեծ ուրախությամբ նշեցին, որ արդեն չորս ամիս է, ինչ ձեռք են բերել նոր բարեկամներ և ընկերներ, հանձինս՝ Տեր Գրիգոր քահանա Գրիգորյանի, համայնքի և երիտասարդաց միության անդամների: Գևորգը ներառված էր թեմի կողմից նախաձեռնած «Մենք մեր զինվորի կողքին ենք» բարեգործական ծրագրում:
ԶՎԱՐԹ ԽԱՉԱՏՐՅԱՆ
1
3116 դիտում
2
2464 դիտում
3
2373 դիտում
4
2109 դիտում
5
2007 դիտում
