ՓՈԽՔԱՂԱՔԱՊԵՏ. «ԿԵՆԴԱՆԱԲԱՆԱԿԱՆ ԱՅԳԻՆ ՈՉ ՄԵԿԻ ՄՈՒՏՔԸ ՉԻ ՓԱԿԵԼ»

ՓՈԽՔԱՂԱՔԱՊԵՏ. «ԿԵՆԴԱՆԱԲԱՆԱԿԱՆ ԱՅԳԻՆ ՈՉ

ՄԵԿԻ ՄՈՒՏՔԸ ՉԻ ՓԱԿԵԼ»

«Իրավունքը» դեկտեմբերի 9-ին  անդրադարձել է կենդանաբանական այգու ետնամասում բնակվող Գյուրջյան փողոցի բնակիչների խնդրին:

Հիշեցնենք` Գյուրջյան փողոցի բնակիչ Սյուզան Մարգարյանը մեր թղթակցին հայտնել էր, որ  կենդանաբանական այգին փակել է դեպի իրենց կացարաններ ու հողատարածքներ տանող ելքն ու մուտքը, որի պատճառով մոտ վեց ընտանիք դիմել է դատարան:  Ավելին` կենդանաբանական այգու ղեկավարությունը քաղաքապետարանի թույլտվութամբ պահանջել է բնակիչներից ազատել տարածքը, քանի որ քաղաքապետարանի թույլտվությամբ այգու ընդլայնման  ծրագիր է իրականացվելու:

- Պրն Արեյան, սոցիալական ի՞նչ խնդիր է լուծում քաղաքապետարանը:  Գյուրջյան փողոցի բնակիչներին, ըստ էության, կացարաններից վտարելով:

- Նման հարցադրում չկա: Ձեր ստացած ահազանգը ճիշտ չէ:

- Բայց այդ հողատարածքը, որի  վրա կառուցվել են տնակները, համայնքապատկան  տարածք է  (քաղաքապետարանի հասարակայնության եւ լրատվության բաժնի պետ Արթուր Գեւորգյաննը մեզ հետ զրույցում այդպես էր հայտարարել-խմբ.), հետեւաբար,  ինչքան  դեռ կարող են բնակվել  այդտեղ քաղաքացիները:

- Նրանք այդ տարածքում կառուցել են իրենց տնամերձ հողամասերը, օգտագործում են: Այդ խնդիրը բազմիցս քննարկվել է քաղաքապետարանում: Տարիներ առաջ գույքագրվել է տարածքը: Որեւէ մեկը խնդիր չի դրել նրանց առաջ դուրս գալու այդ  տարածքից:

- Մեզ հետ զրույցում Սյուզան Մարգարյանը նաեւ հայտարարեց, որ 2002 թ-ից անընդմեջ դիմել են քաղաքապետարան` սեփականաշնորհելու տարածքը, սակայն կամ  քաղաքապետարանը  նրանց մերժել է, կամ անորոշ պատասխան տվել:

- Այդպիսի կարգավիճակ դեռ չեն կարող ստանալ, քանի որ  դրանք ինքնակամ շինություններ են: Հողի կարգավիճակը թույլ չի տալիս, որ սեփականաշնորհման  կարգավիճակ ստանան:

- Դուք տեղյա՞կ եք, որ մոտ վեց ընտանքի դիմել է դատարան:

-Այո, այո:

- Բնակչուհին մեզ հետ զրույցում ասաց, որ կենդանաբանական այգին դեպի իրենց կացարաններ ելքն ու մուտքը փակել է:

- Չկա այդպիսի բան:

- Ապա ինչո՞ւ են դիմել դատարան:

- Չգիտեմ: Չգիտեմ, թե ինչ հայցով են դիմել:

- Հայցով, որ կենդանաբանական այգին իրենց տան  ելքն ու մուտքը փակել է...

- Որեւէ մեկի դուռը չի փակվել այնտեղ:

ՍՈՆԱ ԴԱՎԹՅԱՆ