ԱԶԱՏԱՄԱՐՏԻԿԸ ԶԱՅՐԱՑԱԾ Է. «ՎԱՐՈՐԴՆԵՐԸ, ԵԹԵ «ԴՈՒԽՈՎ» ԵՆ, ԳԱԶԱԼՑԱԿԱՅԱՆՆԵՐԻ ՏԵՐԵՐԻ ՀԵՏ ԻՐԵՆՑ ՀԱՐՑԵՐԸ ԹՈՂ

ԱԶԱՏԱՄԱՐՏԻԿ. «ՎԱՐՈՐԴՆԵՐԸ, ԵԹԵ «ԴՈՒԽՈՎ» ԵՆ, ԳԱԶԱԼՑԱԿԱՅԱՆՆԵՐԻ ՏԵՐԵՐԻ ՀԵՏ ԻՐԵՆՑ ՀԱՐՑԵՐԸ ԹՈՂ  ԼՈՒԾԵՆ»

Դոլարի փոխարժեքի կտրուկ տատանումները դժգոհություն էին առաջացրել նաեւ երթուղայինների վարորդների ու գծատերերի շրջանում: Վերջիններս պահանջում են կամ գազալցակայաններում գազի գինն իջեցնել կամ տրանսպորտի սակագինը  կրկնակի բարձրացնել: Ազատամարտիկ, «Շուշի 92» հասարակական կազմակերպության նախագահ Իշխան Սարգսյանին զայրացրել է այն, որ փոխադրողների միությունն առաջարկում է տրանսպորտի սակագինը դարձնել 300 դրամ:  «Իրավունքի» հետ զրույցում  ազատամարտիկն ասաց, որ «տրանսպորտի սակագնի  թանկացումը կարող է  բացասաբար անդրադառնալ ոչ միայն  ազատամարտիկների, այլեւ  ամբողջ ազգի վրա: Մեր ազգի 70-80%-ը երթեւեկում է  հասարակական տրանսպորտով ու գտնվում է  սոցիալական վատ վիճակում: Ամոթ է: Ուղղակի մենք շատ բաների համար պայքարեցինք ու ոչ մի տեղ մեր պայքարի արդյունքը չենք տեսնում:»

Տրանսպորտի սակագնի բարձրացումը, ըստ պրն Սարգսյանի, պայմանավորել դոլարի փոխարժեքի բարձրացմամբ ճիշտ չէ: «Եթե էդքան «դուխով» են վարորդները, թող միայն գազի սակագնի անօրինական բարձրացման դեմ պայքարեն, ոչ թե առաջ քաշեն  տրանսպորտի սակագնի թանկացումը: Բա իրենք չե՞ն մտածում, որ ամբողջ ազգը որ ոտքի կանգնի ու տրանսպորտից չօգտվի, տեսնեմ ինչ են անելու: Ո՞նց են  վարկով վերցրած երթուղայինների տոկոսները փակելու: Կամ  էդ թանկացման դեմ խոսողները չեն հասկանում, որ  իրենց տան անդամներն էլ են տրանսպորտից օգտվելու»,- ասաց «Շուշի 92» հասարակական կազմակերպության նախագահը:

Ազատամարտիկի  խոսքով` վերջին օրերին դոլարի փոխարժեքի կտրուկ բարձրացումը   «մահանա է» փոխադրողների ու տրանսպորտի  սակագնի բարձրացումը պահանջող  որոշ գծատերերի համար, որոնք չեն հաշտվում, որ  նախորդ տարի տապալվեց թանկացման փորձը:  «Թող վարորդները  գնան գազալցակայանների տերերի հետ իրենց  հարցերը լուծեն: Ի վերջո,  նրանք էլ ժողովրդի ծոցից դուրս եկած, թող ժողովրդի մասին մտածեն»,-եզրափակեց պրն Սարգսյանը:

ՍՈՆԱ ԴԱՎԹՅԱՆ