ԲՀԿ ՊԱՏԳԱՄԱՎՈՐ. «ԱՐԱՄ ՄԱՆՈՒԿՅԱՆԸ ՇԱՏ ՎԱՏ ԲԱՆ ԱՐԵՑ»

ԲՀԿ ՊԱՏԳԱՄԱՎՈՐ. «ԱՐԱՄ ՄԱՆՈՒԿՅԱՆԸ ՇԱՏ ՎԱՏ ԲԱՆ ԱՐԵՑ»

Ինչպես հայտնի է, ԱԺ ոչ իշխանական չորս ուժերը`ՀԱԿ-ը, ԲՀԿ-ը, ՕԵԿ-ը, «Ժառանգություն» մի կողմ թողնելով իրենց քաղաքական քմահաճույքը, ներկա էին ֆինանսական շուկայում ստեղծված իրավիճակին նվիրված ԱԺ արտահերթ նիստին: Սա այն դեպքում, երբ  դեկտեմբերի 16-ին ՀՀԿ-ն ու ՀՅԴ-ն, ԲՀԿ-ի ու իր կողմնակիցների բոյկոտի պայմաններում ընդունեցին ԱԺ դատապարտող հայտարարություն  վերջին դեպքերի առնչությամբ: Հիշեցնենք` խոսքը վերաբերում է ՀԱԿ պատգամավոր Արամ Մանուկյանի վրա հարձակմանը եւ մի քանի ազատամարտիկների հետ ինչ-ինչ դեպքերին: Թե ինչու ԲՀԿ-ը, որը խորհրդարանում ի դեմս ԲՀԿ խմբակցության քարտուղար Նաիրա Զոհրաբյանի, ԱԺ նստաշրջանն ընդհատելու կոչով հանդես եկավ դեկտեմբերի 15-ին եւ մյուս երեք ուժերի հետ համատեղ երեք օր շարունակ բոյկոտում էր  նստաշրջանը, հանկարծ դադարեցրեց բոյկոտը, պարզեց «Իրավունքը»` ԲՀԿ խմբակցության պատգամավոր Ստեփան Մարգարյանի հետ զրույցում:

- Պրն Մարգարյան, ինչո՞ւ որոշեցիք դադարեցնել բոյկոտն ու մասնակցել դեկտեմբերի 18-ի արտահերթ նիստին:

- Բոյկոտ հայտարարել էինք մինչ արտահերթ նիստը: Կապված վերջին օրերին տեղի ունեցած դեպքերի հետ` դեկտեմբերի 16-ի երեկոյան տեղի  ունեցավ  արտահերթ նիստ:

- ՀՀԿ-ի ու ՀՅԴ-ի համատեղ դատապարտող հայտարարությունը բավարարո՞ւմ է Ձեզ:

-Ոչ:

- Ինչո՞ւ:

- Մենք ուզում էինք, որ ավելի լավ հայտարարություն ընդունվեր...

- Բայց Ձեր ուզած ավելի լավ հայտարարությունը չընդունվեց, իսկ ԲՀԿ-ը մասնակցեց դեկտեմբերի 18-ի արտահերթ նիստին:

-Այո, որովհետեւ մենք պայման էինք դրել արտահերթ նիստ  հրավիրել: Մենք չէինք կարող իրենց ասել, որ արտահերթ նիստ հրավիրեք եւ  մեր ուզած  որոշումը ընդունեք: Պիտի փորձեինք մեր որոշումն անցկացնել:

- Քանի որ ՀՀԿ-ի ու ՀՅԴ-ի համատեղ ընդունած հայտարարությունը ԲՀԿ-ին չի բավարարում, ինչո՞ւ ընդունված այդ որոշումն էլ չբոյկոտեցիք:

- Իմաստ  չեք տեսնում:

- ՀՀ փոխոստիկանապետ Լեւոն Երանոսյանի հրաժարականի պահանջը ԲՀԿ-ի համար դեռ առանցքայի՞ն է:

- Առանցքային ասելով ի՞նչ նկատի ունեք: Այն, ինչ հայտարարել ենք,  ոչինչ չի փոխվում:

- Իսկ ինչպիսի ռեալ քայլեր է իրականացնելու ԲՀԿ-ը` Լեւոն Երանոսյանին պաշտոնանկ անելու համար:

- Մենք դա կորոշենք:

- 2013 թ-ին նախագահի թեկնածու Պարույր Հայրիկյանի նկատմամբ մահափորձ եղավ: Խորհրդարանի աշխատանքը ինչո՞ւ ԲՀԿ-ը չբոյկոտեց:

- Կարելի էր ոչ թե բոյկոտ անել, այլ քննարկել:

- Իսկ ինչո՞ւ չարվեց:

- Ես հիմա չեմ հիշում ինչ իրավիճակ էր, ինչու չարվեց:

- Նորմալ իրավիճակ էր, խորհրդարանը շարունակում էր բնականոն աշխատանքը:

- Նման բաներ ես շատ կարող եմ հիշել, որոնց համար  չի եղել (նկատի ունի բոյկոտը-խմբ.):

- Ինչո՞ւ:

- Եթե ինչ-որ մի ճիշտ բան  ժամանակին չի արվել, կամ մի ժամանակ սխալ բան է եղել, դա չի նշանակում, որ դա պետք է նախադեպ ընդունել ու շարունակել: Հիմա, այնուամենայնիվ, վիճակը էապես տարբերվում է  նախագահի թեկնածուի վրա կատարած մահափորձից:  Վերջին օրերին տեղի ունեցած դեպքերն  ավելի մեծ են, քանի որ  իրար հաջորդում են դեպքերը: Իրավիճակը քաոսային դառնալու հավակնություն ուներ:

- Արտահերթ նիստերից մեկի ընթացքում քննարկվեց ու ձայների մեծամասնությամբ ընդունվեց մաքսային կարգավորումների մասին օրինագիծը, որով կարգավորում է ԵՏՄ անդամակցությունից հետո ՀՀ-ի մաքսային գործունեությունը: Եթե այդ օրինագծի ընդունման համար ձայների անհրաժեշտ քանակ չապահովվեր, օրինագիծն էլ տապալվեր, ԲՀԿ-ը պատասխանատվություն կրելո՞ւ էր այդ ձախողման համար: Ի վերջո, կուսակցության անդամների մեծ մասը կողմ է քվեարկել Հայաստանի`ԵՏՄ-ի անդամակցությանը:

-Ոչ: Որովհետեւ երկրի ներսում քաոսային վիճակ է: Մենք ուզում էինք դա քննարկել, քաղաքական հայտարարությամբ  ասել ենք դրա մասին: Բա որ բոյկոտում ես, բոյկոտը հետեւանքն է  ունենում: Բոյկոտում ես, չես մասնակցում, կարող է  տապալվել նիստը: Մենք քանի որ լծակներ չունենք, մեր լծակը բոյկոտն է: ՀՀԿ-ի ու ՀՅԴ-ի  դատապարտող հայտարարությունն էլ ընդունեցին` ցույց տալով, որ դե  ծես է, ընդունում ենք: Դա ոչինչ չասող հայտարարություն  է:

- Եթե ոչինչ չասող էր, դա էլ բոյկոտեիք:

- Իմաստ  չենք տեսնում: Մեր խնդիրը վնաս տալը չէ: Մեր խնդիրն այն է, որ գոնե արտահերթ նիստ արվեր:

- Չե՞ք համարում, որ նիստ բոյկոտելը, հետո մասնակցելը քաղաքական քմահաճույք է:

- Ոչ: Մենք գտնում ենք, որ կարեւոր էր մեր ասածը: Դա մի քիչ սթափեցրեց: Ցանկանում էինք հասարակության համար  հնչեցնել մեր պահանջը, ասել հանրությանը, որ մենք սա ենք ուզում:

- ՀՀԿ պատգամավոր Սեդրակ Սարոյանը հայտարարեց, որ չի կարելի ազատամարտիկների հարցը քաղաքականացնել հատկապես այն դեպքում, երբ նրանք չեն բողոքում:

- Մենք իրավիճակի մասին  ենք խոսում: Իրավիճակն էր  քաղաքական, վերահսկողությունից դուրս գալու միտում  ուներ:  Վատ է, որ ազատամարտիկին ծեծում են, ու նա չի  բողոքում:

- Ս. Սարոյանը նաեւ ասում էր, որ կռված տղաներ են. խմել- կռվել են, վաղն էլ կհաշտվեն, իսկ դեպքը քաղաքականացրած պատգամավորներն են խայտառակ լինելու:

- Երկիրը մեղավո՞ր է, որ իրենք  վաղը կխոսեն, կհաշտվեն, կամ չեն  բողոքի, կամ կբողոքեն: Ես, հասարակությունը մեղավոր  չենք դրա համար: Իսկ երբ մարդու են ծեծում, հարձակվել են նրա վրա, դա կատարվում  է հանրության հաշվին:

- Գեներալ Սարոյանը իր ելույթում հիշեցրեց Արամ Մանուկյանի` Սերժ Սարգսյանին ուղղված հայհոյանքի մասին, որը, չգիտես ինչու, չդատապարտվեց:

- Շատ  վատ բան արեց Արամ Մանուկյանը: Մենք անգամ  հայտարարություն  արեցինք դրա համար: Գոնե ասվեց դրա մասին մեր կողմից, որ  վատ բան արեց Արամ Մանուկյանը:

Հ.Գ. Որքանով տեղեկացված ենք ԲՀԿ-ի անունից որեւէ հայտարարություն  չի տարածվել: Ընդամենը եղել են առանձին ԲՀԿ-ականների կողմից  մեղմ հակադարձումներ:

ՍՈՆԱ ԴԱՎԹՅԱՆ