ՀՀ վարչապետ. «ՖԻՆԱՆՍԱԿԱՆ ՇՈՒԿԱՅՈՒՄ ՆԿԱՏՎՈՒՄ Է ԿԱՅՈՒՆԱՑՄԱՆ ՄԻՏՈՒՄ»

ՀՀ վարչապետ. «ՖԻՆԱՆՍԱԿԱՆ ՇՈՒԿԱՅՈՒՄ ՆԿԱՏՎՈՒՄ Է ԿԱՅՈՒՆԱՑՄԱՆ ՄԻՏՈՒՄ»

Այսօր ՀՀ կառավարության հերթական նիստը սկսվեց ՀՀ վարչապետ ՀՈՎԻԿ ԱԲՐԱՀԱՄՅԱՆԻ հայտարարությամբ, որտեղ մասնավորապես անդրադարձ կատարվեց ֆինանսական շուկայի ներկայից իրավիճակին. «Ցանկանում եմ տեղեկացնել, որ երեկ ես հանդիպում եմ ունեցել Արժույթի միջազգային հիմնադրամի եւ Համաշխարհային բանկի ներկայացուցիչների, համապատասխան գերատեսչությունների ու տնտեսվարողների հետ: Մեր միջազգային գործընկերներն ամբողջովին աջակցում են արտաքին շոկերով պայմանավորված փոխարժեքի սուր տատանումների իրավիճակում ֆինանսական շուկայի կայունացման մեր քայլերին: Երեկ օրվա երկրորդ կեսից եւ այսօր ֆինանսական շուկայում նկատվում է կայունացման միտում, որը վստահ եմ՝ շարունակվելու է: Սակայն, մենք անհանգստացած ենք փոխանակման կետերում գնման եւ վաճառքի մեծ տեմպերով ու սպառողական շուկայում տեղի ունեցող որոշ գործընթացներով: Մասնավորապես, երեկ շաքարի, ալյուրի եւ լայն սպառման մի շարք ապրանքների գծով ակնհայտ գների բարձրացում կար»: Ապա դիմելով ՏՄՊՊ հանձնաժողովի նախագահ Արտակ Շաբոյանին` շարունակեց. «Ես առաջարկում եմ պարոն Շաբոյանին, որ ՏՄՊՊ հանձնաժողովը մանրամասն ուսումնասիրի այս ապրանքատեսակների առեւտուրը ու ինձ տեղեկություն ներկայացնի ամենօրյա կտրվածքով: Հորդորում եմ Ձեզ ամենայն խստությամբ մոտենալ այս չարաշահումներին: Կառավարությունն անհիմն թանկացումները չի հանդուրժելու»:

Հավելենք նաեւ, որ ՀՀ վարչապետի կողմից համապատասխան հանձնարարական ստացավ նաեւ ՀՀ առողջապահության նախարարը, որպեսզի նրա ուշադրության կենտրոնում լինի դեղորայքի շուկայի իրավիճակը:

Ի դեպ, ՀՀ կառավարության նիստից հետո ՀՀ վարչապետ Հովիկ Աբրահամյանն անձամբ է շրջել երեւանյան սուպերմարկետներով ու ծանոթացել գնաճի տեմպերին, ինչպես նաեւ հենց տեղում հանձնարարականներ տվել գների շտկումներ կատարելու համար:

ՀՐԱՆՏ ՍԱՐԱՖՅԱՆ