ԶԱՐՄԱՆՔ

Մեր հալ, քո հավես... Հռչակավոր կինոաստղ ԲՐԻՋԻՏ ԲԱՐԴՈՆ ֆրանսիացիներին կոչ է արել ձիու միս չօգտագործել: Եվ հատուկ այդ նպատակով նա տարածել է ընդարձակ բաց նամակ, ուր ընդգծել էր, որ ակնկալում էր, որ սեպտեմբերին` իր 80-ամյակի առիթով, Ֆրանսիայի իշխանություններն իրեն նվեր կմատուցեն` սննդի արդյունաբերությունում արգելելով ձիու մսի օգտագործումը. "Ես չափազանց հիասթափված եւ տխուր եմ, որ դա տեղի չունեցով": Զարմանալի է, մի՞թե Ֆրանսիան էլ պրոբլեմ չունի, որ Բրիջիտ Բարդոն թիվ մեկ խնդիր է համարում կենդանիների պաշտպանությունը ու մասնավորապես ձիու միս չուտելը: Հետաքրքիր է, նա չի՞ նկատում, որ իր հայրենիքում ամենաբարձր մակարդակով վերացվում է ընտանիք հասկացությունը, պղծվում են ֆրանսիացու բոլոր ավանդական սրբությունները: Արդյո՞ք ավելի օգտակար չէր լինի նաեւ համամարդկային տեսակետից, որ այդ այլանդակության դեմ բողոքող ֆրանսիացիներին միանար նաեւ Բրիջիտ Բարդոն, ում խաղացած դերերը միշտ էլ եղել են կանացիության մարմնացում:
Ամերիկյան դեսպանատունը մերժել է մեր գործընկեր, orer.am կայքի գլխավոր խմբագիր ՎԱՐՈՒԺԱՆ ԲԱԲԱՋԱՆՅԱՆԻ մուտքը ԱՄՆ: Մեր գործընկերը զարմանքով հայտնաբերել էր, որ պետք է ներկայացնի հսկայական քանակությամբ տեղեկանքներ` գույքի, եկամուտների, այլ հանգամանքների մասին, որոնք կհաստատեն, որ ԱՄՆ-ում մնալու դրդապատճառ չունի: Եվ ինչպես նշում է Բաբաջանյանը. "Հարկ է նշել, որ այդ ամենին տիրապետող անձը յանկիների երկրում մնալու որեւէ պատճառ չպետք է ունենա, իսկ ինձ մերժող դեղնակտուց կոնսուլը, թերեւս, կերազեր տիրապետել այդ ամբողջի տասը տոկոսին, մինչդեռ հրավիրելով հարցազրույցի` մարտնչող հոմոսեքսուալի դեմքով այդ տղեկը անգամ չբարեհաճեց այդ փաստաթղթերը ուսումնասիրել: Հարցազրույցը տեւեց մոտ 40 վայրկյան, թարգմանչուհին այնքան վատ էր թարգմանում իմ խոսքերը, որ ես իմ ուդմուրտոանգլերենով անգամ փորձում էի շտկումներ անել: Այդ ընթացքում ընդամենը հասցրի ներկայացնել այցիս նպատակը, եւ երբ փորձեցի ներկայացնել փաստաթղթերիս տրցակը` անչափահաս կոնսուլը փոխանցեց, որ ինձ չի կարող տրամադրել մուտքի արտոնագիր…": Դե ինչ, մնում է միայն շնորհավորել մեր գործընկերոջը` այդ մերժման կապակցությամբ, քանզի եթե քեզ մերժել են ԱՄՆ մուտքի իրավունք, դա համահավասար է կարգին հայ եւ կարգին մարդ լինելու վկայագրին:
Հիշո՞ւմ եք դասականի հայտնի ասածը. "Փարա ունես` մարդ ես, փարա չունես` մարդ չես": ԱՄՆ-ի պարագայում դա կարելի է վերաձեւակերպել "ՍՄԱՐԹՖՈՆ ունես` մարդ ես, սմարթֆոն չունես` մարդ չես": Օրերս տեսել էի հայկական գովազդ, ուր առաջարկվում էր սմարթֆոնի ծրագիր, որը այդ հեռախոսասարքը վերածում էր նաեւ էլեկտրոնային դրամապանակի` թույլ տալով վճարումներ կատարել սուպերմարկետներում: Դե, եթե դա այստեղ կա, ուրեմն ԱՄՆ-ում հաստատ  վաղուց կա: Իսկ հիմա էլ մի նորություն են մոգոնել` ստեղծվել է հավելված սմարթֆոնի համար, որը ամերիկացի վարորդներին թույլ կտա հեռախոսն օգտագործել վարորդական վկայականի փոխարեն, իսկ, ինչպես հայտնի է, ԱՄՆ-ում վարորդական վկայականը նույնիսկ ավելի հարգի է, քան անձնագիրը: Կարճ ասած, զարմանալիորեն մարդկանց աստիճանաբար վերածում են սմարթֆոնի կցորդի: Հիմա պատկերացնո՞ւմ եք, թե ինչպիսի դժբախտություն կլինի մարդու համար այդ անտեր սարքը կորցնելը... Չի կարողանա նույնիսկ ապացուցել, որ իր անունը, ասենք, Պողոս է: Դե ինչ, իզուր չէր, որ հռչակավոր Սթիվ Ջոբսը սեփական զավակներին արգելում էր այդ սարքերից օգտվել:
Իսկ մեզանում վիրտուալ իրականության մեջ հայտնաբերեցինք ֆեյսբուքյան մի խումբ, որը կոչվում է "Ես բոյկոտում եմ ՍԵՐԺ ՍԱՐԳՍՅԱՆԻ ամանորյա շնորհավորանքը հեռուստատեսությամբ": Բոյկոտելն էլ ի՞նչ է` այս շնորհավորանքը պարզապես չնայելը: Դե, չես ուզում  նայել, մի նայիր, այ հոգուդ ղուրբան, էլ ի՞նչ կարիք կա դրա մասին հայտարարել աշխարհով մեկ: Իսկ զարմանալիորեն այդ խմբին միացել են առավել քան 3 հազար հոգի: Զարմանալի է, էլ ուրիշ բոյկոտելու բան չգտա՞ք: Ավելի լավ չէ՞ր լինի միասնաբար այս անգամ բոյկոտել ամանորյա ճոխ-ճոխ սեղաններ դնելու ավանդույթը, քանզի անբարեխիղճ ձեւով` Ամանորին ընդառաջ, ամեն ինչի գները թռցնելը դարձել է արդեն աննամուսության բոլոր սահմանագծերը հատող երեւույթ: Այ, եթե կազմակերպված ազգ լինեինք, այդ բոյկոտը կանեինք ու կստիպեինք ընչաքաղց առեւտրականներին ու "շուստրի" գործարարներին ահագին բան թափել աղբարկղերը եւ շոշափելի նյութական վնասներ կրել:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ