ԿՈԱԼԻՑԻԱՅԻ ՄԱՍ ԼԻՆԵԼԸ ԿԱՇԿԱՆԴՈ՞ՒՄ Է ԱՐԾՎԻԿ ՄԻՆԱՍՅԱՆԻՆ

ԿՈԱԼԻՑԻԱՅԻ ՄԱՍ ԼԻՆԵԼԸ ԿԱՇԿԱՆԴՈ՞ՒՄ Է ԱՐԾՎԻԿ ՄԻՆԱՍՅԱՆԻՆ

ՀՅԴ պատգամավոր Արծվիկ Մինասյանից այսօր «Իրավունքը» հետաքրքրվեց` ինչու  դաշնակցությունը 20  րոպե ընդմիջում  խնդրեց, եթե ՀԱԿ խմբակցության պատգամավոր Արամ Մանուկյանի վրա կատարված հարձակման համար հարուցվել է քրեական գործ եւ հայտնի է, թե ով է հարձակում կատարողը, իսկ ծեծի ենթարկված ազատամարտիկները չեն բողոքում:  Այս պարագայում ինչ պետք   է քննարկեր ԱԺ-ը: «Ընդմիջման ժամանակ պետք է քննարկվեր ստեղծված վիճակի վերաբերյալ ԱԺ-ի արձագանքի անհրաժեշտությունն ու ձեւը, եթե անգամ բողոքներ չկան»,- ասաց պատգամավորը, ապա հավելեց, որ երկրում անպատժելիության մթնոլորտն օր օրի ահագնանում է:

-Պրն Մինասյան, ոչ միայն  պատգամավորի, այլեւ շարքային քաղաքացիների ու անգամ մամուլի ներկայացուցիչների նկատմամբ բռնություններ եղել են  նախկինում: Այն ժամանակ կարիք չկա՞ր  ԱԺ նիստերը բոյկոտել:

-Կարծում եմ` բոլոր ժամանակներում էլ  առանձնահատկություններ կան, չեմ ուզում անցյալի մասին խոսել: Պարզապես ջայլամի քաղաքականություն չի կարելի վարել. եթե զգում ես, որ մթնոլորտն այնպիսին է, որ խրախուսվում է բռնությունը`անկախ նրանից, թե ում նկատմամբ  է այն, պետք է քայլ իրականացնես: Եթե արագ արձագանք չլինի, վիճակը կարող է թեժանալ:

-Անպատժելիություն կար նաեւ նախորդ իշխանությունների օրոք, ինչո՞ւ  ընդդիմադիրները  չէին բոյկոտում խորհրդարանի աշխատանքները:

-Եթե անգամ չեն եղել, չի նշանակում, որ չպետք է լինեն հետայսու: Յուրաքանչյուր ժամանակ ունի իր առանձահատկությունը: Պետք է  փորփրել ու գտնել`ինչու չեն եղել:

-Իսկ այն, որ ԲՀԿ պատգամավոր Կարո Կարապետյանը ծեծի էր ենթարկել մի քաղաքացու, Ռուստամ Գասպարյանի որդին այս տարի մի քաղաքացու առեւանգել եւ ծեծի էր ենթարկել,Ֆարմանյան եւ Զուրաբյան ձեռնամարտը տեղի ունեցավ ԱԺ-ում: Դրանց  վերաբերյալ ինչու  բոյկոտ չեղավ խորհրդարանում:

-Քանի որ դա շարունակական բնույթ չունի, կարծում եմ` պատճառներից մեկը դա է: Բայց այն, ինչ տեղի է ունենում ազատամարտիկների հանդեպ, առանձին պաշտոնատար անձանց մասով, դա նշանակում է, որ օր առաջ պետք է կանխվի: Գուցե պատճառներից մեկն այն է, որ ժամանակին նման դրսեւորումները դատապարտվեին, ավելի բացասական հետեւանքներ այսօր չէի՞ն լինի: Չգիտեմ, չեմ  կարող ասել: Բայց չեմ ուզում ու կողմնակից չեմ  առանձին պատգամավորների մեղադրել իրենց զավակների պահվածքի համար...

-Որովհետեւ հայրերը պատասխանատու չե՞ն իրենց զավակների արարքների համար:

-Ոչ: Որովհետեւ մինչեւ վերջ չեն բացահայտվում ու պարզաբանվում նման դեպքերը: Իսկ դա կարող է լինել այն դեպքում, երբ իրավապահ համակարգն արդյունավետ գործի:

-Արամ Մանուկյանի կուսակցության` ՀՀՇ-ի  ղեկավարման տարիներին  ծեծ ու ջարդի պակաս չի  զգացվել: Դաշնակցությունն էլ ՀՀՇ-ի ղեկավարման շրջանում տուժողի կարգավիճակում է հայտնվել: ՀԱԿ-ը մոռացե՞լ է, թե իր ժամանակ ինչպես էին ծեծում պատգամավորներին:

-Ես չգիտեմ`իրենք ինչ են մոռացել, ինչ չեն մոռացել, բայց ՀՅԴ-ը միշտ հանդես է եկել այն դիրքերից, որ բռնությունը երկրում չպետք է տեղ գտնի, հատկապես ներքին կյանքում: Այսօր մենք համախմբված ուժերով պետք է դուրս գանք այս վիճակից, ոչ թե մեկը մյուսի վրա կեղտ բռնի ու դրանով շարժվի:

Հ. Գ. ՀՅԴ-ը 2003-2009 թթ-ին կոալիցիայի մաս էր: Միգուցե  ժամանակին կոալիցիայի անդամ լինելն է  կաշկանդում  ՀՅԴ պատգամավորին  օբյեկտիվ գնահատական հնչեցնել այդ տարիներին  կատարված բռնությունները:

ՍՈՆԱ ԴԱՎԹՅԱՆ