ԵՐԿՐԱՇԱՐԺԻՑ ՎՆԱՍՎԱԾ ՄԻՆԱՍ ԱՎԵՏԻՍՅԱՆԻ "ՀԱՅԱՍՏԱՆ" ՈՐՄՆԱՆԿԱՐԸ ՎԵՐԱԿԱՆԳՆՎԵԼ Է

ԵՐԿՐԱՇԱՐԺԻՑ ՎՆԱՍՎԱԾ ՄԻՆԱՍ ԱՎԵՏԻՍՅԱՆԻ "ՀԱՅԱՍՏԱՆ"
ՈՐՄՆԱՆԿԱՐԸ ՎԵՐԱԿԱՆԳՆՎԵԼ Է

1988 թվականի ավերիչ երկրաշարժից, երբ փլվեց Շիրակի մարզի Վահրամաբերդ գյուղի մշակույթի տունը, միայն կանգուն մնաց այն պատը, որի վրա գտնվում էր գեղանկարիչ ՄԻՆԱՍ ԱՎԵՏԻՍՅԱՆԻ "Հայաստան" որմնանկարը: Չնայած պատը կանգուն էր մնացել, որոշ չափով որմնանկարը վնասվել էր: Այսօր արդեն պետական բյուջեի միջոցներով եւ "Մինաս Ավետիսյան" մշակութային բարեգործական հիմնադրամի կողմից ավարտվել է հանրապետական նշանակություն ունեցող որմնանկարի վերականգնման աշխատանքները: Վերականգնման վերջնական արդյունքը գոհացրել է Մինաս Ավետիսյանի որդուն` ԱՐՄԱՆ ԱՎԵՏԻՍՅԱՆԻՆ, ով "Իրավունքի" հետ զրույցում փաստեց. "Կարող էինք ամբողջությամբ վերականգնել որմնանկարը, սակայն կան նորմատիվներ, որոնց հետեւել ենք: Որմնանկարում միայն վերջին կերպարն է ամբողջությամբ վերականգնվել",- շեշտեց Ա. Ավետիսյանը եւ ավելացրեց. "Մինաս Ավետիսյանի 12 որմնանկարներից 2-ը կորցրինք երկրաշարժի ժամանակ: Մնացել է 10-ը, որոնցից 2-ը կառավարությունում են,  2-ը` օդանավակայանում, իսկ  6-ը` Շիրակի մարզում":
Մինաս Ավետիսյանի "Հայաստան" որմնանկարն ստեղծվել է գաջի կրային սվաղի հիմքի վրա: Բնական, մեխանիկական ազդեցությունների հետեւանքով  որմնանկարի սվաղաշերտերը տեղաշարժվել էին, ներկի շերտերը քայքայվել եւ առաջացել էր տարանջատված, դատարկ հատվածներ: Որմնանկարի պահպանությունն ապահովելու եւ մշակույթի տունը վերակառուցելու նպատակով վերջին 20 տարիներին տեղի են ունեցել բազմաթիվ միջոցառումներ: Որմնանկարի վերականգնման աշխատանքներն իրականացրել են հայ մասնագետները` իտալացի վերականգնող մասնագետ Ֆաբրիցիո Յակոպինիի ղեկավարությամբ:

ԶՎԱՐԹ ԽԱՉԱՏՐՅԱՆ