ԳԱՌՆՈՒ ԳՅՈՒՂԱՊԵՏՆ ԻՐԵՆ ՄԵՂԱՎՈՐ ՉԻ ՃԱՆԱՉՈՒՄ

ԳԱՌՆՈՒ ԳՅՈՒՂԱՊԵՏՆ ԻՐԵՆ ՄԵՂԱՎՈՐ ՉԻ ՃԱՆԱՉՈՒՄ

Մոտ տասն օր առաջ Կոտայքի մարզի դատախազի ցուցումով մեղադրանք է առաջադրվել հայաստանյան եւս մեկ համայնքապետի, այս անգամª Գառնու գյուղապետին: Դատախազության կարծիքով. "Աշոտ Վարդանյանը, դրսեւորելով անգործություն, միջոցներ չի ձեռնարկել Գառնի համայնքում գործող իր ազգականին պատկանող գազալցակայանի 2 տարվա եւ բենզալցակայանի 3 տարվա տեղական տուրքը գանձելու ուղղությամբ, ինչի արդյունքում համայնքին պատճառվել է էական վնաս: Ինչպես նաեւª Վարդանյանը դիտավորությամբ անհրաժեշտ միջոցներ չի ձեռնարկելª կանխելու գյուղի "Գառնու ձոր" տարածքում գյուղատնտեսական նշանակության համայնքային սեփականություն հանդիսացող հողատարածքում 6 ջրավազանների ապօրինի կառուցումը եւ կասեցնելու հողատարածքի ինքնակամ զավթումը: Վարդանյանը նաեւ նույն գյուղի բնակչին համայնքի սեփականություն հանդիսացող տնամերձ հողամասի օտարման վերաբերյալ մրցույթ անցկացնելու եւ նրան հաղթող ճանաչելու վերաբերյալ սուտ խոստումներ տալովª խաբեությամբ նրանից վերցրել է զգալի չափերի գումար եւ հափշտակել այն":
Ընդունո՞ւմ է առաջադրված մեղադրանքները, թե ոչ` հարցով սկսեցինք մեր զրույցը Աշոտ Վարդանյանի փաստաբան ՀՈՎԻԿ ԱՐՍԵՆՅԱՆԻ հետ, ով մասնավորապես նշեց.
- Իմ պաշտպանյալը մեղադրվում է պաշտոնեական դիրքը չարաշահելու, պաշտոնեական կեղծիքի եւ խարդախության մեջ: Հիմա հերթով ասեմ. ըստ մեղադրանքներից մեկի` իբր գյուղապետի բարեկամը, որը ունեցել գազալցակայան, բենզալցակայան, Վարդանյանը հովանավորություն է իրականացրել, ազատել կամ չի գանձել հարկերը: Կառավարության որոշմամբ` գազալցակայանների տեղական հարկեր սկսել են վճարել 2013թվականից, իսկ գործում ներառել են նաեւ 2012թվականը: Այսինքն` 2012թվականի հարյուր հիսուն հազար դրամը այստեղ միանգամայն անհիմն է: Ինչ վերաբերում 2013 եւ 2014 թվականների գումարներին, ապա բնականաբար, այդ գումարները վճարված են:
Հաջորդ մեղադրանքը նրանում է, որ իբր "Գառնու ձոր" տարածքում գյուղատնտեսական նշանակության համայնքային սեփականություն հանդիսացող հողատարածքում 6 ջրավազանների ապօրինի կառուցումը չի կասեցրել եւ հողատարածքի ինքնակամ զավթում է արել պաշտպանյալս: Սակայն իրականում Վարդանյանը դիտողություն է արել գյուղացուն` ապօրինի շինության համար եւ վարչական պատասխանատվության է ենթարկել 200 հազար դրամի չափով:
Հաջորդ մեղադրանքի համաձայն, իբր պաշտպանյալս իր բարեկամից ինը հարյուր եվրո է վերցրել` շինարարություն տրամադրելու համար, սակայն չի իրականացրել խոստումը: Նշեմ, սակայն, ժամանակի ընթացքում, վերոնշյալ անձը հերքել է այդ փաստը: Բայց արի ու տես, մեկ է` մեղադրանք առաջադրել են: Երբ ես ծանոթացա մեղադրանքին, հասկացա, որ չափազանց շատ են դուրս եկել քրեական հարթությունից, եւ հաշվի չեն առել իմ պաշտպանյալի մաքուր կենսագրությունը, ով բազմաթիվ պարգեւատրումների եւ խրախուսանքների է արժանացել: Եվ ո՞նց են կարողանում նման մարդուն այսպիսի մեղադրանքներ առաջադրել եւ քարկոծել: Կարծում եմ` այդ երեւույթի հիմքը պետք է փնտրել այլ տեղ, բայց ոչ երբեւէ Քրեական օրենսգրքում: Այսինքնª պաշտպանյալս երեք հոդվածներով էլ իրեն մեղավոր չի ճանաչում:

ԻԼՈՆԱ ԱԶԱՐՅԱՆ