ԴԱՆԱԿԱՀԱՐՈՒԹՅԱՄԲ ԱՎԱՐՏՎԱԾ ՎԵՃԸ 16-ԱՄՅԱ ԱՇԱԿԵՐՏՈՒՀՈՒ ՊԱՏՃԱՌՈ՞Վ ԷՐ

ԴԱՆԱԿԱՀԱՐՈՒԹՅԱՄԲ ԱՎԱՐՏՎԱԾ ՎԵՃԸ
16-ԱՄՅԱ ԱՇԱԿԵՐՏՈՒՀՈՒ ՊԱՏՃԱՌՈ՞Վ ԷՐ

"Իրավունքը" անդրադարձել էր դեկտեմբերի 2-ին Վանաձորի թիվ 24 միջնակարգ դպրոցի բակում տեղի ունեցած վիճաբանությանը, որն ավարտվել էր դանակահարությամբ: Հիշեցնենք, որ դանակահարվել էր ոչ միայն այդ դպրոցում սովորող Տիգրանը, այլ նաեւ նրա դասընկեր, 17-ամյա Ռոբերտ Պետրոսյանը: Թե, ի վերջո, ինչն էր դանակահարության պատճառը, փորձեցինք պարզել դպրոցի տնօրեն Հասմիկ Հովսեփյանից, որն արդեն հասցրել էր զրուցել աշակերտների հետ եւ տեղեկացել էր կատարվածի մանրամասներին.
-Վեճը, որն ավարտվել է դանակահարությամբ, եղել է մեր դպրոցի աշակերտուհի Անահիտ Ադամյանի պատճառով, ով մեկ տարի է, ինչ սովորում է այստեղ: Ըստ ինձ հասած տեղեկության` իբր, 16-ամյա Անահիտի նկատմամբ աշակերտները նորմալ մոտեցում ցույց չեն տվել, ամեն անգամ տեսնելուց մի բան ասել են: Բայց աղջիկը, ինչպես նրա մայրն է ասել, դրան ուշադրություն չի դարձրել, չի պատասխանել, որ ավելորդ լարվածություն, կռիվ չլինի: Ըստ Անահիտիª Մաքսիմը մեկ տարուց ավել սիրահետել եւ հետապնդել է նրան, ու, իբր տեսնելով, որ ոչինչ չի ստացվում, նույնիսկ անձնական բնույթի վիրավորանքներ է հասցրել: Անահիտն էլ, իբրեւ այեւս չդիմանալով, զանգել է եղբորը` Նարեկին, ով էլ դանակահարել է աշակերտներիս` Տիգրանին եւ Ռոբերտին: Դեպքի օրն էլ, ինչպես ինձ պատմեց Մաքսիմը (միջադեպի ժամանակ ծեծված աշակերտը- Ի. Ա.), ընդմիջման ժամին խոսակցություն է եղել իր եւ Անահիտի միջեւ, վիրավորանք չի եղել: Բայց ընդմիջման ժամին աղջկա եղբայրը եկել է դպրոց եւ դուրս հրավիրել Մաքսին, Տիգրանին եւ Ռոբերտին` զրուցելու համար: Վերջիններս էլ գնացել են` չիմանալով,  թե ինչ է իրենց սպասվում. մտածել են, որ տղաները եկել են միայն զրուցելու: Սակայն սկսվել է վեճ, քաշքշոց, Մաքսիմին ծեծել են, գցել են գետնին, ինչը ուսմասվարն ու դասղեկը չեն կարողացել կանխել: Եվ Մաքսիմին պաշտպանելու ժամանակ դանակահարվել են Ռոբերտն ու Տիգրանը:
Տիգրանը, ով այժմ դեռ բուժվում է, վնասվածք էր ստացել կրծքավանդակի շրջանում, իսկ Ռոբերտը գոտկային շրջանում:
Ամեն դեպքում Մաքսիմը ժխտում է այդ աղջկան մեկ տարուց ավել պարբերաբար վիրավորելու փաստը, եւ այստեղ նույնիսկ հարց է, թե ում կողմից է եղել անձնական վիրավորանք` աղջկա՞, թե՞ տղայի: Բայց քանի որ ես այնտեղ չեմ եղել, հստակ ոչինչ ասել չեմ կարող:
Չնայած, եթե մեկ տարուց ավել տղան որեւէ աղջկա վիրավորանքներ հասցներ, վարկաբեկեր, ընդհուպ այն աստիճանի, որ աղջիկը ամանչում է, որ գրի, ապա այդ աղջիկը չի՞ ունեցել մեկը, ում հետ կարող էր կիսվել: Որեւէ մեկը չկա, ով կվկայի, որ Մաքսիմը գոնե մի անգամ նրան վարկաբեկել է, նվաստացրել: Չէր կարող տասնվեց16հել. ամբողջ 750 հոգիանոց դպրոցում չկա՞ մեկը, որ տեսած լինի, որ Մաքսիմը գնացել է իրենց դասարան, ավելինª հետապնդել է... Անահիտի ասածները հիմնավորող որեւէ ապացույց, որեւէ փաստ չկա:
Համենայնդեպս` Անահիտը դեպքի օրվանից մինչ օրս դասի չի հաճախում: Դասղեկը զանգել է ծնողներին, մայրն ասել է, որ դուստրն այլեւս մեր դպրոցի չի հաճախելու, բայց փաստաթղթերը դեռ դպրոցից չեն տարել:

ԻԼՈՆԱ ԱԶԱՐՅԱՆ