"ԿՑԱՆԿԱՆԱՅԻՔ, ՈՐ ԱԴՐԲԵՋԱՆԸ ՌՄԲԱԿՈԾԵՐ ԱՄԵՐԻԿՅԱ՞Ն ԶԵՆՔՈՎ"

"ԿՑԱՆԿԱՆԱՅԻՔ, ՈՐ ԱԴՐԲԵՋԱՆԸ ՌՄԲԱԿՈԾԵՐ ԱՄԵՐԻԿՅԱ՞Ն ԶԵՆՔՈՎ"

Միջազգային հարաբերությունների Մոսկվայի պետական ինստիտուտի Կովկասի խնդիրների եւ անվտանգության կենտրոնի գիտաշխատող, "Կովկասյան համագործակցություն" ՀԿ տնօրեն  ՆԻԿՈԼԱՅ ՍԻԼԱԵՎԸ "Իրավունքի" հետ զրույցում Հայաստանի կողմից ԵՏՄ-ի անդամակցությունը գնահատեց բարձր` ասելով.
-ԵՏՄ Հայաստանի անդամագրությունը բնական եմ համարում, քանի որ ՌԴ-ն լավագույն տնտեսական գործընկերն է Հայաստանի համար, որը վերաբերվում է առեւտրին, ներդրումներին, փոխադրումներին եւ այլն: Բայց անդամագրվելով այս տնտեսական մեծ կառույցին` պետք չէ միանգամից  սպասել կամ պահանջել մեծ արդյունքներ, բայց սա մի պրոյեկտ է, որը հաշվարկված է տասնյակ տարիների համար: Բացի տնտեսական համաձայնագրից, մենք Հայաստանի հետ ունենք անվտանգության պայմանագիր, եւ այս ամենը այդքան էլ գնահատելի չէր լինի, եթե համագործակցեինք միայն անվտանգության կամ միայն տնտեսական ասպեկտներում:  
- Հայ-ադրբեջանական սահմանային գծում բավականին հաճախ են լինում կրակահերթեր: Դուք որեւէ կապ տեսնո՞ւմ եք ԵՏՄ-ի անդամակցության հետ, միգուցե դա գազազեցնո՞ւմ է Ադրբեջանին:
- Ես ուղիղ կապ չեմ տեսնում այդ ողբերգական իրադարձությունների միջեւ: Ամենակարեւորն այն է, որ հանկարծ լայնամասշտաբ պատերազմ չսկսվի, եւ այս պարագայում մեծ նշանակություն ունեն հայ-ռուսական ռազմատեխնիկական փոխհարաբերությունները: Բացի այդ, գոյություն ունեն միջազգային պայմանագրեր, տեխնոլոգիաներ, որոնց նկատմամբ, այո, հնարավոր է լինեն որոշակի պահանջներ, բայց, այնուամենայնիվ, այն գործում է, որոնք  ուղղված են նման դեպքերին: Օրինակ` Մինսկի խումբը իրավունք չունի Ռուսաստանի եւ Արեւմուտքի միջեւ հարաբերությունները պարզել:
- Մեր ընդդիմությունն անընդհատ շեշտադրում է այն հանգամանքը, որ գոնե այս տարվա մեր սահմանին տեղի ունեցած ողբերգական իրադարձությունները իրականացվել են ՌԴ-ից գնված զենքով: Ի՞նչ կասեք:
- Ես կարծում եմ, որ դա հռետորական չափազանցություն է: Որքանով, որ ես տեղեկացված եմ, այն զենք-զինամթերքը, որոնք կիրառել է Ադրբեջանը, մեզանից գնվածը չի եղել:
- Բայց չէ՞ որ հույս չկա, որ մի օր էլ այդ զենքերը չեն կիրառի:
- Այո, ես հասկանում եմ Ձեր հարցի իմաստը, հայ ժողովրդի մտահոգությունը: Բայց ես  հետեւյալը կասեմ, որ Ռուսաստանը, քանի որ ունի ռազմատեխնիկական հարաբերություններ թե՛ Հայաստանի, թե՛ Ադրբեջանի հետ, հենց դա, այդ լարված իրավիճակը դարձնում է ավելի կանխատեսելի: Կցանկանայիք, որ Ադրբեջանը ռմբակոծեր ամերիկյա՞ն զենքով:
- Իհարկե ոչ, բայց եւ այնպես մենք ՌԴ-ի հետ ունենք 49 տարվա անվտանգության պայմանագիր:
- Այո, ճիշտ եք ասում, բայց այդ պայմանագիրը չի սահմանափակում այն, որ մենք կարող ենք զենք չվաճառել երրորդ երկրին: Հասկանում եմ այս հարցի էմոցիոնալությունը, բայց վերլուծելով` պետք է կարեւորել այն, որ ճիշտ կլինի քիչ զգացմունքայնություն դրսեւորել: Կա փաստ, որ Ռուսաստանն ունի թե՛ Հայաստանի, թե՛ Ադրբեջանի հետ վստահելի հարաբերություններ, եւ կողմերից մեկին դա հաստատ դուր չի գալիս, եւ, ըստ էության, կարելի է ասել, որ դա երկու կողմերին էլ դուր չի գալիս:

ԱՐՄԵՆՈՒՀԻ ՀԱԿՈԲՅԱՆ