ԶԱՐՄԱՆՔ

Հայտնի է դարձել առավել քան ապշեցուցիչ նորություն ՄԱԿ-ի ՄԱՆԿԱԿԱՆ ՀԻՄՆԱԴՐԱՄԻ` ոչ անհայտ ՅՈՒՆԻՍԵՖ-ի մասին: Նոյեմբերին սույն կառույցը հայտարարություն է տարածել, որը նվիրված է "երեխաների եւ ծնողների` սեռական կողմնորոշման եւ գենդերային ինքնության հատկանիշով խտրականության ոչնչացմանը": Ահա մի մեջբերում այդ գարշելի փաստաթղթից. "Բոլոր երեխաները` անկախ իրենց իրական կամ ենթադրելի սեռական կողմնորոշման կամ գենդերային ինքնության, ունեն խտրականությունից զերծ անվտանգ եւ առողջ մանկության իրավունք": Պատկերացնո՞ւմ եք` արդեն պաշտոնական փաստաթղթերի մակարդակով խոսվում է երեխաների սեռական կողմնորոշումների եւ նման այլ զահրուզիբիլների մասին, այսինքն` ենթադրվում է, որ նորմալ է, երբ երեխան ներքաշված է տարատեսակ սոդոմական գործընթացների մեջ: Զարմանալով հանդերձ, մնում է հարցադրել` իսկ արդյո՞ք հանդուրժելի է սրանից հետո ՅՈՒՆԻՍԵՖ-ի հետ պետական որեւէ կառույցի կողմից որեւէ ծրագրի իրականացում կամ ընդհանրապես համագործակցություն:
Ազատամարտիկների հետ կապված զազրելի միջադեպերի առնչությամբ շատերը զարմանալի ու տարօրինակ մտքեր են հնչեցրել: Այսպես, ոստիկանապետ ՎԼԱԴԻՄԻՐ ԳԱՍՊԱՐՅԱՆԸ պատասխանելով լրագրողի այն հարցին, որ ընդդիմադիր շարժման թիրախներից մեկն էլ ինքն է, այսպես արձագանքեց. "Ո՞վ է թիրախ: Չգիտեմ, թե ում ֆանտազիան է` ես թիրախ երբեք չեմ լինում, թիրախավորում եմ": Լավ, այդպիսի պարծենկոտ-կիսագողական կեցվածքը ինչքանո՞վ է սազական որեւէ պաշտոնյայի, առավել եւս ոստիկանապետի: Բայց պարզվում է, որ տուժողների մեջ էլ կան լրիվ նույն մակարդակի մարդիկ: Ծեծի ենթարկված ՍՈՒՐԵՆ ՍԱՐԳՍՅԱՆՆ ասում է. "Զանգեցի ընկերներիս, հետո Վովա Գասպարյանի տղերքին` մենթերին, իրենք ասացին` բողոք ունե՞ք, ասեցի` ոչ, ես բողոքող չեմ": Ու այդ մարդը հավակնում է ընդդիմադիր գոծունեություն ծավալել: Ուստի, զարմանալով հանդերձ, մնում է ասել` դե հերիք եղավ, բոլ եղավ, լրիվ իրար արժանի եք, եթե ժողովրդի մոտ ձեր բերանններն եք բացում, բարի եղեք նորմալ բառապաշար օգտագործել եւ հեռու մնալ տարատեսակ "գողաԳան" դրսեւորումներից:
Զարմանալի բան էր տեղի ունեցել ՋԵՄԱԼ ՓԱՇԱՅԻ թոռան` Ցեղասպանությանը նվիրված գրքի շնորհանդեսի ժամանակ: Հնչեցին ծափեր, ինչը վրդովեցրեց շատ շատերին, այդ թվում եւ ներկա գտնվող թուրքագետ Ռուբեն Մելքոնյանին, ով նշեց, որ իրենք եկել են հարցեր տալու, այլ ոչ թե մեծարելու: Զարմանալի է, այդ ինչքա՞ն է արմատավորված մեր որոշ հայրենակիցների մոտ, "լավ թուրք" տեսնելու մոլուցքը: Վերջապես ե՞րբ եք, գրողը տանի, հասկանալու, որ լավ թուրք բնության մեջ գոյություն ունենալ չի կարող: Ջեմալի թոռն ո՞վ է, որ այդպիսի պատիվների եք արժանացնում, ո՞ւմ շունն է: Ախր, այդպիսի տրամաբանությամբ մի որոշ ժամանակ անց էլ, Ռամիլ Սաֆարովի թոռանը կսկսեք մեծարել:
Ես միշտ համոզված եմ եղել, որ Հայաստանի, Արցախի եւ Սփյուռքի հայերը անքակտելի ամբողջություն են: Բայց փոքր-ինչ այլ տեսակետ է հայտնել ԼՂՀ նախագահ ԲԱԿՈ ՍԱՀԱԿՅԱՆԸ. "Ցեղասպանություն վերապրած հայոց Սփյուռքը Հայաստանի եւ Արցախի մեջ տեսնում է իր հայրենիքը: Արցախի, Հայաստանի եւ հայկական Սփյուռքի միջեւ ինքնության առումով կա մի տեսակ սիմբիոտիկ հարաբերություններ": Ճիշտն ասած, միշտ կարծել ենք, որ բոլոր հայերի ինքնությունը միասնական է, իսկ Արցախի պարագայում ունենք միասնական նպատակ` կյանքի կոչելու 1989-ի վերամիավորման որոշումը: Բայց, ըստ Արցախի նախագահի` "սիմբիոտիկ" հարաբերությունների առկայությունը "չի ազդում մեր դե ֆակտո անկախության եւ մեր հանրապետության դե յուրե ճանաչմանը հասնելու վճռականության վրա": Դե ինչ, միգուցե մե՞նք ինչ-որ կարեւոր բան չգիտենք...

Զարմացած է  
ՀՈՎՀԱՆՆԵՍ ԳԱԼԱՋՅԱՆԸ