«ՀԱՅԱՍՏԱՆԸ ՄԻՇՏ ԷԼ ՇԱՀԵԼ Է` ՄԻՈՒԹՅՈՒՆ ԿԱԶՄԵԼՈՎ ՌՈՒՍԱՍՏԱՆԻ ՀԵՏ»
Արխիվ 12-16
«ՀԱՅԱՍՏԱՆԸ ՄԻՇՏ ԷԼ ՇԱՀԵԼ Է` ՄԻՈՒԹՅՈՒՆ ԿԱԶՄԵԼՈՎ ՌՈՒՍԱՍՏԱՆԻ ՀԵՏ»
«ՄԵՆՔ ՆՈՒՅՆՊԵՍ ՄԵԶ ՉԵՆՔ ՊԱՏԿԵՐԱՑՆՈՒՄ ԱՌԱՆՑ ՀԱՅԱՍՏԱՆԻ»
-Որոշ արեւմտամետ քաղաքական գործիչներ եւ վերլուծաբաններ չէին հավատում, որ, ի վերջո, Հայաստանը կանդամակցի Եվրասիական տնտեսական միությանը, սակայն այն այսօր իսկ իրականություն է: Ի՞նչ կասեք այս մասին:
- Հայերն այսօր չէ, որ իրենց ընտրությունը կատարել են, այլ այդ ընտրությունն իրենք կատարել են 200 տարի առաջ: Եվ ինչո՞ւ պետք է այսօր փոխեին այդ ընտրությունը: Միշտ էլ Հայաստանը շահել է` միություն կազմելով Ռուսաստանի հետ: Ընդհանուր առմամբ` առաջին հերթին ԵՏՄ-ն միություն է Ռուսաստանի հետ, ի՞նչ է, կա՞ր այլ ճանապարհ... Նույնը կարող եմ ասել նաեւ Ռուսաստանի համար, քանի որ մենք նույնպես մեզ չենք պատկերացնում առանց Հայաստանի:
- Հայաստանյան ընդդիմության որոշ գործիչների կողմից ՀՀ ԵՏՄ անդամակցման պայմանագրի խորհրդարանական լսումների ժամանակ շահարկվում էր, թե այսօր Ռուսաստանի տնտեսությունն էլ լավ վիճակում չէ, ուր մնաց, թե ԵՏՄ-ն բարելավի ՀՀ տնտեսության վիճակը:
- Ռուսաստանում տնտեսական վիճակն ավելի լավ է, քան Եվրամիությունում: Նայեք, թե Եվրամիությունում վերջին 8 տարիների ընթացքում ինչ է կատարվում. այնտեղ շարունակական անկում է: Մինչդեռ Ռուսաստանում աճ կա, եւ եթե անգամ ինչ-որ մի տարում Ռուսաստանում շահույթը մեծ չլինի, միեւնույնն է, տնտեսությունը կմնա կայուն վիճակում: Եվ որեւէ կասկած չկա, որ Ռուսաստանն ունի այնպիսի ռեսուրսներ, այնպիսի հնարավորություններ, որ միշտ կլինի առաջադեմ երկրների շարքում: Ընդհանրապես, Եվրասիական տնտեսական միությունը իր տարածքով երեւի ամենամեծ ինտեգրացիոն միությունն է, ու այն ամենահեռանկարային կառույցն է, քանի որ այստեղ նոր անդամներ են միանում: Եվ այստեղ կարեւոր է, թե ովքեր են միացել ԵՏՄ-ին. դրանք ԱՊՀ-ի բոլոր հաջողակ երկրներն են: Այնպես որ, որեւէ կասկած չունեմ, որ Ռուսաստանը կկարողանա հաղթահարել եղած խնդիրները:
«ՊԱՀՈՒՍՏԱՅԻՆ ՖՈՆԴԵՐԸ ՈՐՈՇԵՑԻՆ ԽԱՂ ԽԱՂԱԼ
ՌՈՒԲԼՈՒ ՎՐԱ»
-Վերջին շրջանում մեծ անհանգստության առարկա դարձան ռուբլու փոխարժեքի կտրուկ տատանումները: Իրականում դա ինչո՞վ էր պայմանավորված ու ինչի՞ կբերի:
- Կարծում եմ, որ այդ գործընթացը կարելի է կտրուկ փոփոխել: Եվ բավական հեշտ է դա անելը, ինչպես գիտեք, նախագահն արդեն համապատասխան հրահանգ տվել է: Իսկ պատճառները հասկանալի են, պահուստային ֆոնդերը որոշեցին խաղ խաղալ ռուբլու վրա, դրան գումարած նաեւ այն, որ մեր արտահանողները ձգձգել էին ռուբլու փոխանցումը արտարժութային շահույթի: Նրանք, միեւնույնն է, պետք է ռուբլով վճարեն, եւ ռուբլին պետք է, ուղղակի, որոշել էին առիթից օգտվել ու աշխատավարձերը վճարել արժեզրկված ռուբլով: Դա զուտ սպեկուլյատիվ քայլ էր եւ որեւէ օբյեկտիվ հիմքեր չուներ:
«ԵՏՄ ԿԱԶՄՈՒՄ ԴՈՒՔ ԿՈՒՆԵՆԱՔ ԱՅՆՔԱՆ ՆԱԽԱՐԱՐՆԵՐ
ԵՎ ԱՅՆՔԱՆ ԿՇԻՌ, ՈՐՔԱՆ ՈՒՆԻ ՌՈՒՍԱՍՏԱՆԸ»
-Կրկին անդրադառնալով Եվրասիական տնտեսական միությանը` հետաքրքիր է, թե Հայաստանն անդամակցելով այս միությանը` ի՞նչ առավելություններ է ձեռք բերում, ինչը չէր ունենա Եվրամիություն մաս կազմելով:
- Եվրամիությունում կա այդ կառույցի դոմինանտությունը անդամ երկրների վրա, որտեղ սահմանափակ է նրանց սուվերենությունը: Անգամ անդամ երկրների որոշ ներքին հարցեր, այդ թվում` ներքին տնտեսական, հնարավոր չէ լուծել առանց Եվրամիության հաստատման: Իսկ Եվրասիական տնտեսական միությունը հավասար պայմաններ է ստեղծում միության անդամ երկրների համար: Օրինակ, Հայաստանն ընտրելով ԵՏՄ անդամակցման ուղին` պահպանում է իր սուվերենությունը: Հաճախ հարց է հնչում, թե որտեղ են այն երաշխիքները, որ Հայաստանի սուվերենությունը վտանգված չէ այս միությունում: Բայց շատ պարզ է` ԵՏՄ-ն դա Եվրասիական տնտեսական միության բարձրագույն խորհուրդն է` ԵՏՄ անդամ երկրների ղեկավարների կազմով, եւ իհարկե, ԵՏՄ հանձնաժողովը, այսինքն` երաշխիքներն ակնհայտն են` դա կոնսենսուսն է` ղեկավարների հավասար ներկայացվածությունը միության մեջ: Հաջորդ տարվա ընթացքում ԵՏՄ կազմում դուք կունենաք այնքան նախարարներ եւ այնքան կշիռ, որքան ունի Ռուսաստանը: ԵՏՄ-ն հենց առանձնանում է մյուս միություններից նրանով, որ այստեղ հավասար պայմաններ են ստեղծված անդամ երկրների համար: Նույնը նաեւ լեզվի հարցում` ԵՏՄ-ում հայերենի, ռուսերենի, բելառուսերենի ու ղազախերենի դերը հավասար է, այլ կերպ չի էլ կարող լինել: Այսինքն` ԵՏՄ-ում որոշումներն ու պայմանագրերն ընդունվում են 4 լեզվով, հակառակ դեպքում, օրինակ, ռուսները կասեն` ռուսերենում այդպես չի թարգմանվում այսինչ կետը, ու արդյունքում կլինեն մեծ տնտեսական կորուստներ: ԵՏՄ-ի գլխավոր նպատակն է հավասար պայմաններ ստեղծել բիզնեսի եւ մեր երկրների քաղաքացիների համար: Իսկ կրկին վերադառնալով Եվրամիությանը` նշեմ, որ ես կարծում եմ` հետագայում մենք կգանք նրան, որ կունենանք եվրոպական-եվրասիական ինտեգրացիոն միություն, քանի որ Եվրամիությունը նույնպես հետաքրքրված է ԵՏՄ-ով: Նրանց առեւտրային հարաբերություններն ամենուր զրո են: Այնպես որ, մենք ցանկանում ենք ինտեգրացվել Եվրամիության հետ, բայց ոչ այնպես, ինչպես Բուլղարիան, Ռումինիան, այլ մենք ուզում ենք ինտեգրվել հավասար պայմաններով: Ուզում ենք, օրինակ, Հայաստանը Եվրամիությունում ունենա այնպիսի կշիռ, ինչպես մյուս եվրոպական երկրները, իսկ դա կարող է անել Հայաստանը` լինելով Ռուսաստանի եւ Ղազախստանի հետ: Եթե միայնակ ուզենա իրականացնել դա, կներեք, բայց պարզ է, որ ուժերը չեն ների:
ՀԱՍՈՒՆԱՆՈՒՄ Է ԵՏՄ ՊԱՌԼԱՄԵՆՏԱԿԱՆ
ԱՍԱՄԲԼԵԱՅԻ ՍՏԵՂԾՄԱՆ ԱՆՀՐԱԺԵՇՏՈՒԹՅՈՒՆԸ
-Ըստ Ձեզ, արդյո՞ք չի հասունացել պահը, որ ստեղծվի, ասենք, ԵՏՄ պառլամենտական խորհուրդ:
- Կարող եմ նշել, որ դեռեւս չկա նման խորհուրդ, բայց այն շատ կարեւոր է, քանի որ այսօր ողջ ծանրությունն ընկնում է ԵՏՄ անդամ երկրների Ազգային ժողովների վրա: Հիշեցի ԱՄՆ պետքարտուղար Հիլարի Քլինտոնի 2011 թվականին արված հայտարարությունը, թե իրենք թույլ չեն տա, որ կազմավորվի Եվրասիական տնտեսական միությունը, եւ իրենք ամեն ինչ անում էին դրա համար: Դա, իհարկե, կոպիտ խախտում էր ուղղված ոչ միայն մեկ ազգի դեմ, այլ մի շարք երկրների, այնպես որ, ԵՏՄ պառլամենտական ասամբլեա ստեղծելը ժամանակի հարց է: Դրա համար ԵՏՄ անդամ խորհրդարանները պետք է ոչ ֆորմալ կառույցներում կազմակերպեն համապատասխան աշխատանքները: Օրինակ, մենք բավական լուրջ ֆորումներ ենք անցկացնում Ղազախստանում, Բելառուսում, Ղրղզստանում եւ մեծ սիրով կցանկանայինք նաեւ Երեւանում անցկացնել` համապատասխան կոմիտեների մասնակցությամբ:
- Եվրասիական տնտեսական միությունում Հայաստանից հետո էլ ո՞ր երկրները շանսեր ունեն անդամակցելու:
- Արդեն պարզ է` Ղրղզստանը, քանի որ արդեն իսկ բոլոր հարցերը որոշված են:
ՀՐԱՆՏ ՍԱՐԱՖՅԱՆ
1
3116 դիտում
2
2469 դիտում
3
2109 դիտում
4
2007 դիտում
5
1682 դիտում
