ՌԱԲԻՆՈՎԻՉԸ ՇՐՋԱՆՑԵՑ ԻՍՐԱՅԵԼԻ ԿՈՂՄԻՑ ՀԱՅՈՑ ՑԵՂԱՍՊԱՆՈՒԹՅԱՆ ՃԱՆԱՉՄԱՆ ՀԱՐՑԸ

ՌԱԲԻՆՈՎԻՉԸ ՇՐՋԱՆՑԵՑ ԻՍՐԱՅԵԼԻ ԿՈՂՄԻՑ ՀԱՅՈՑ

ՑԵՂԱՍՊԱՆՈՒԹՅԱՆ ՃԱՆԱՉՄԱՆ ՀԱՐՑԸ

Այսօր Ազգային ժողովում Ցեղասպանության իրավական հարցերի շուրջ լսումների ընթացքում հանդես եկավ Եվրոպական հրեական խորհրդարանի համանախագահ, Ուկրաինայի խորհրդարանի անդամ, Համաուկրաինական կոնգրեսի նախագահ Վադիմ Ռաբինովիչը: Թեեւ Ռաբինովիչը խոսեց հանցագործության կատարումների պատասխանատվության մասին,  այնուամենայնիվ շրջանցեց Իսրայելի կողմից հայոց ցեղասպանության ճանաչման հարցը: Բացի այդ, հրեական կազմակրպության նախագահը իր ելույթում շեշտը դրեց հայ-թուրքական փոխհարաբոերությունների վերականգնման, իր խոսքերով ասած, պատմության էջը շրջելու համար: Նա կոչ արեց ավելի շատ նայել դեպի ապագան եւ առաջարկեց իրենց միջնորդական ջանքերը հայ-թուրքական հարաբերությունները բարելավելու համար:

Հյուրի <լղոզված> եւ, ինչ որ տեղ վիրավորական ելույթը բնականաբար ունի իր բացատրությունը: Հրեաները հայոց ցեղասպանության ճանաչումը շատ անգամ օգտագործում են որպես մահակ՝ Թուրքիայի գլխին այս-կամ այն հարցում համապատասխան դիրքորոշում ստանալու համար: Այսպես Իսրայելի պառլամենտում, հայոց ցեղասպանության վերաբերյալ քննարկումները սկսում են այն պահերին, երբ սրվում են իսրաելաթուրքական հարաբերությունները: Մասնավորապես այդպես եղավ, երբ Իսրայելը կասեցրեց թուրքական <Մարմարա> նավի ընթացքը, որը պաղեստինցիներին հումանիտար օգնություն էր տանում: Սակայն Իսրայելի Կնեսեթում հայոց ցեղասպանության հարցի քննարկումները անարդյունք են ավարտվում:

Հավանաբար Իսրայելի կողմից հայոց ցեղասպանության չճանաչման հարցը ունի եւս մեկ դրդապատճառ, որը իր ելույթում նշեց քաղաքագիտության դոկտոր, գեներալ Հայկ Քոթանջյանը: Նա նշեց, որ գոյություն ունի դոկտրին, հոլոքոստի բացառիկության վերաբերյալ, եւ այլ ժողովուրդների հանդեպ կատարած ցեղասպանությունների չճանաչումը Իսրայելի կողմից ուղղված է հենց այդ բացառիկությունն ընդգծելու վրա:

ԱՐՄԵՆՈՒՀԻ ՀԱԿՈԲՅԱՆ