ՊՈՒՏԻՆ-ԷՐԴՈՂԱՆ ՀԱՆԴԻՊՈՒՄԸ ՀԱՅԱՍՏԱՆԻ ՎՐԱ ՉԻ ԱԶԴԻ

ՊՈՒՏԻՆ-ԷՐԴՈՂԱՆ ՀԱՆԴԻՊՈՒՄԸ
ՀԱՅԱՍՏԱՆԻ ՎՐԱ ՉԻ ԱԶԴԻ

Ռուսաստանի նախագահ Վլադիմիր Պուտինը, ինչպես հայտնի է, այցելել էր Թուրքիա: Այդ այցի, դրա ժամանակ քննարկումների եւ ձեռք բերված պայմանավորվածությունների մասին այս օրերին հանգամանորեն խոսվել է: Սակայն մեկ հանգամանք եւս կա, որը սակայն գրեթե չի արծարծվել: Հազիվ թե, այդ այցի ընթացքում, թեկուզեւ հպանցիկ, անդրադարձ չլիներ նաեւ Հայաստանին կամ Ղարաբաղին: Դրանից զատª Թուրքիան մեր հարեւանն է, իսկ Ռուսաստանըª այն միության առանցքը, ուր պատրաստվում է մտնել Հայաստանը: Իսկ դա հուշում է, որ այդ ամենը պետք է ինչ-որ անդրադարձ ունենա նաեւ Հայաստանի վրա: Ուրեմն` ի՞նչ կարող ենք սպասել. այս հարցի պատասխանը "Իրավունքը" փորձեց ճշտել հայաստանյան վերլուծաբաններից:
ՀՀ ԳԱԱ արեւելագիտության ինստիտուտի տնօրեն, թուրքագետ ՀՐԱՆՏ ՍԱՖՐԱՍՏՅԱՆԸ փաստեց.
- Ռուս-թուրքական հարաբերությունների նշմարվող տնտեսական նոր մակարդակի բարձրանալը, կարծում եմ, Հայաստանի համար առանձնապես նշանակություն չունի: Տեսնենք հետագայում  իրադարձություններն ինչ զարգացում կունենան: Ամեն դեպքում, ես համոզված եմ, որ Ռուսաստանի եւ Թուրքիայի միջեւ  ռազմավարական ստրատեգիական հարաբերությունները շատ հեռուն չեն գնա, քանի որ երկու երկրներն ունեն տարբեր նպատակներ: Ըստ իս, այս առումով Հայաստանը Ռուսաստանի համար ունի կարեւոր նշանակություն, քանի որ մեր երկրում տեղակայված է ռուսական ռազմակայանը:
Քաղաքագետ ԱԼԵՔՍԱՆԴՐ ՄԱՐԿԱՐՈՎԸ մեկնաբանեց.
- Մեզ համար մեկը հարեւան է, իսկ մյուսը` ռազմավարական նշանակություն ունեցող գործընկեր: Նրանք հանդիպել են եւ միմյանց հետ քննարկել հարցեր, որոնք ունեն ավելի շատ տարածաշրջանային նշանակություն: Իսկ դա նշանակում է, որ մեզ համար կարեւոր է հաշվի առնել այն զարգացումները, որոնք կան ռուս-թուրքական երկկողմանի հարաբերություններում: Սակայն տվյալ այցելությունն անմիջական ազդեցություն չի կարող ունենալ Հայաստանի վրա: Ամեն դեպքում, պետք է հետեւել այն ամենին, ինչ տեղի  կունենա մեր տարածաշրջանում:
Թուրքագետ ԳԵՎՈՐԳ ՊԵՏՐՈՍՅԱՆԸ նշեց.
- Հանդիպման օրակարգում հայկական հարցը այդքան էլ բարձր տեղում չէր, այսինքն` անդրադարձի, հայտարարությունների մասին տեղեկություններ` թեկուզ լրատվական մակարդակով, մենք չենք ստացել: Հանդիպումից հետո ավելի շատ կարող ենք խոսել Ռուսաստան-Թուրքիա հարաբերությունների մասին: Այդ հարաբերությունները ցույց են տալիս, որ թեեւ երկու պետությունների միջեւ առկա է քաղաքական, ռազմաքաղաքական հարցերում տեսակետների տարբերություններ, այնուամենայնիվ, կարողանում են եզրեր գտնել` տնտեսական հարցերը լուծելու առումով: Երկու երկրների քննարկման հիմնական թեման էներգետիկ ոլորտն էր, Թուրքիայում Ռուսաստանի կողմից կառուցվող ատոմակայանը: Անդրադարձ եղավ նաեւ ուկրաինական ճգնաժամին, քանի որ այս հարցում է, որ երկու պետությունները լրիվ հակառակ դիրքորոշումներ ունեն:  Ռուսաստանն այժմ տնտեսական ճգնաժամի մեջ է եւ իր հարաբերությունները պետք է ավելի լավացնի տնտեսական գործընկերների հետ:

Z-PR սոցհարցման կենտրոնը Երեւան քաղաքում 100 հոգու շրջանում կատարել է հարցում`պարզելու համար, թե ի՞նչ ազդեցություն կարող է ունենալ Պուտին-էրդողան հանդիպումը Հայաստանի վրա:
1. Հայկական թեման այս հանդիպման ժամանակ տեսանելի չէր: Այսինքնª արտառոց սպասելիքներ եւս պետք չէ ունենալ- 42%:
2. Ռուսաստանի եւ Թուրքիայի ցանկացած հանդիպում էլ ինչ-որ կերպ կարող է Հայաստանի վրա անդրադառնալ, եթե անգամ այդ մասին չի խոսվում- 20%:
3. Եթե մեր դաշնակից ՌԴ-ն ամրապնդվում է Թուրքիայում, դա մեզ համար օգտակար է- 18%:
4. Եթե բարելավվում են ռուս-թուրքական հարաբերությունները, ապա դա մեզ համար վտանգավոր է- 14%:
5. Դժվարանում եմ պատասխանել- 6%:

ԶՎԱՐԹ ԽԱՉԱՏՐՅԱՆ