"ԿԱՐՈՂ ԷԻ ԵՐԿՐՈՐԴ ՏԵՂԸ ԶԲԱՂԵՑՆԵԼ, ԲԱՅՑ ՉՍՏԱՑՎԵՑ"

"ԿԱՐՈՂ ԷԻ ԵՐԿՐՈՐԴ ՏԵՂԸ
ԶԲԱՂԵՑՆԵԼ, ԲԱՅՑ ՉՍՏԱՑՎԵՑ"

Կիպրոսի Լիմասոլ քաղաքում կայացած ծանրամարտի Եվրոպայի մինչեւ 21 տարեկանների առաջնությունում Հայաստանի ներկայացուցիչ Հակոբ Մկրտչյանը նվաճել է բրոնզե մեդալ: Հայ ծանրորդը նոյեմբեր ամսին մասնակցել էր նաեւ Ալմաթիում կայացած ծանրամարտի աշխարհի մեծահասակների առաջնությանը: Տղամարդկանց առաջնությունում 77 կգ քաշային կարգում (C խումբ) Հակոբ Մկրտչյանը պոկում վարժությունում բարձրացրել է 140 կգ, իսկ հրում վարժությունում գլխավերեւում է պահել 180 կիլոգրամանոց ծանրաձողը: Մկրտչյանը 10 մասնակիցներից կազմված աղյուսակում երկամարտի 320 կգ արդյունքով զբաղեցրել էր 4-րդ հորիզոնականը: Հիշեցենենք, որ այս տարի Հակոբը Նանկինի պատանեկան Օլիմպիական խաղերում երկամարտի 319 կգ արդյունքով նվաճել էր ոսկե մեդալ: Եվրոպայի, աշխարհի առաջնությունների եւ տարվա ձեռքբերումների մասին "Իրավունքի" հետ խոսեց ՀԱԿՈԲ ՄԿՐՏՉՅԱՆԸ:
-Ալմաթիում կայացած մեծահասակների առաջնությունում շատ լավ հանդես եկաք: Դժվար չէ՞ր արդյոք պայքարել փորձառու մարզիկների հետ:

- Մեծերի հետ պայքարելը իրականում շատ դժվար էր, եւ ժամանակը ցույց կտա, թե ինչ տվեցին այդ մրցումները: Մեծահասակների հետ մրցելով` փորձ ձեռք բերեցի, որն օգնում է իմ տարիքայինների հետ պայքարում: Ես իմ ելույթներից եւ կատարած աշխատանքից գոհ եմ:
- Եվրոպայի առաջնությունում բրոնզե մեդալակիր դարձաք, ինչի կապակցությամբ "Իրավունքը" Ձեզ շնորհավորում է: Ի՞նչ կասեք այս մրցաշարում Ձեր ելույթների եւ արդյունքի մասին:
- Եվրոպայի առաջնությունում կատարած իմ աշխատանքից գոհ չեմ, կարող էի երկրորդ տեղը զբաղեցնել, բայց չստացվեց` իմ տեխնիկական սխալի պատճառով:
- Օլիմպիական խաղերի ոսկե մեդալը հավելյալ պարտավորություն չէ՞ր առաջացնում մյուս մրցաշարերի ժամանակ:
- Այդ պահին պարտավորություն չկար: Բայց արդեն այդ մրցաշարերից հետո մտածում եմ Ռիո-2016-ի մասին: Թեեւ մյուս տարի եւս կարեւոր մրցաշարեր կան. աշխարհի առաջնությունըª արդեն երիտասարդների մեջ: Քիչ-Քիչ սկսում ենք պարապմունքները:
- Այս մարզական տարում բավականին մեծ ձեռքբերումներ ունեցաք, տարվա Ձեր ամփոփումը...
- Ընդհանուր` գոհ եմ, գոհ են նաեւ մարզիչս ու հավաքականների մարզիչները: Այս տարվա 4 մրցումներն էլ, որոնց մասնակցեցի, շատ ոգեւորող էին: Դժվարությամբ դրանց պատրաստվեցի, բայց կարողացա լավ անցկացնել:

ՔՐԻՍՏԻՆԵ ՊԵՏՐՈՍՅԱՆ