ԵՐԵԽԱՆԵՐԻ ԹՈՒՆԱՎՈՐՄԱՆ ՀԵՏ ԿԱՊՎԱԾ ՍՏՈՒԳՎՈՒՄ Է ՆԱԵՎ "ՄՈՒՇ"-Ի ՆՐԲԵՐՇԻԿԸ

ԵՐԵԽԱՆԵՐԻ ԹՈՒՆԱՎՈՐՄԱՆ ՀԵՏ ԿԱՊՎԱԾ
ՍՏՈՒԳՎՈՒՄ Է ՆԱԵՎ "ՄՈՒՇ"-Ի ՆՐԲԵՐՇԻԿԸ

Եղվարդի մանկապարտեզում մասսայաբար թունավորված երեխաների առողջական վիճակի մասին ՀՀ ԱՆ լրատվական ծառայությունից երեկ տեղեկացրին. "Եղվարդի Նաիրիի բժշկական  կենտրոնում բուժում ստացող  17 երեխա այսօր դուրս է գրվել հիվանդանոցից: Երեւանի "Նորք" ինֆեկցիոն հիվանդանոցում բուժում ստացած 19 երեխայից 18-ը եւս դուրս է գրվել: Եղվարդի մանկապարտեզում թունավորման հետեւանքով այս պահին  հիվանդանոցային բուժում է ստանում 15 հիվանդ, որից 13-ը Եղվարդում: Երեւանի "Նորք" ինֆեկցիոն հիվանդանոցում եւ "Սուրբ Աստվածամայր" բժշկական կենտրոնում շարունակում է բուժվել մեկական երեխա":
Չնայած պաշտոնական տվյալների համաձայնª երեխաների մոտ թունավորում է նկատվել, Եղվարդի թիվ 1 մանկապարտեզի տնօրենը` ՄԱՐԻԵՏԱ ՄԱՆՈՒԿՅԱՆԸ, գտնում է, որ միայն ամբողջական հետազոտությունները կպարզեն, թե ինչն է իրականում երեխաների հոսպիտալացման պատճառը.
-Դա մեզ համար շատ արտառոց եւ անսպասելի էր: Ես չեմ կարող ասել, թե ինչն է եղել հարուցիչը: Չնայած ասում են` դիզենտերիա է, բայց ես իսկապես չեմ կարող բացատրել, թե դա ինչից կարող էր լինել: Սերտիֆիկացված ընկերության հետ ենք աշխատում, պայմանագրեր կան, շաբաթը մեկ կամ երեք օրը մեկ սնունդ ենք ստանումª թարմ վիճակում, եւ ես չեմ կարող պատկերացնել, թե ինչ պատճառ կարող է լինել: Չէինք էլ պատկերացնի, որ նման բան կարող էր պատահել: Առաջին երեխան, որը հոսպիտալացվել է, ինքնազգացողության վատացում է ունեցել նախակրթարանում. նկատվում էր թուլություն եւ սրտխառնոց: Դրանից հետո միայն մենք ապահովության համար կապվել ենք բացակա երեխաների ծնողների հետ եւ նրանց խնդրել զգուշանալու նպատակով բժշկի տանել:
Այդ օրն էլ որեւէ արտառոց բան չի եղել սննդակարգում. առավոտյան կերել են թթվասեր, կաթնաշոռ, ճաշին` մակարոնով ապուր, հետճաշիկին` վերմիշելով փլավ:
Կարող եմ նույնիսկ նշել մեզ սնունդ մատակարարողների անունները: Դրանք են` "Հայկազունքը", "Աշտարակ կաթը", "Արզնին", "Հելթի-Ֆուդ" եւ "Հակ-Մակ" ՍՊԸ-ն:
- Շրջանառվում են խոսակցություններ, որ մանկապարտեզի դայակներից մեկը եւս թունավորման ախտանիշներով դիմել էր հիվանդանոց:
- Չէ, գիտեք, նա պարզապես վատ էր զգացել եւ ապահովության համար էր գնացել հիվանդանոց, բայց նրա մոտ ոչինչ չի հայտնաբերվել:
Նշենք, որ թունավորման նախորդ օրը մանկապարտեզի ճաշացանկում` որպես ետճաշիկ` տրվել է "Մուշ" ՍՊԸ-ի արտադրության նրբերշիկ, չնայած այն բանի, որ ՀՀ առողջապահության նախարարի 12.08.2013թ. թիվ 42-Ն հրամանով` նախադպրոցական ուսումնական հաստատություններում չի թույլատրվում օգտագործել երշիկեղեն: Թե այդ հրամանի պարագայում ինչպես է մսամթերք արտադրող ընկերությունը մանկապարտեզին մատակարարումներ իրականացրել, դեռ պարզելու հարց է: Բայց ամեն դեպքումª Սննդամթերքի անվտանգության պետական ծառայության պետի կողմից  "Մուշ" ՍՊԸ-ում ստուգում իրականացնելու հանձնարարական է տրվել: Ասենքª ՍԱՊԾ-ի կողմից ուսումնասիրվել են մանկապարտեզ սննդամթերք մատակարարող ընկերությունները եւս: Պարզվել է, որ մատակարարները Եղվարդի թիվ 1 մանկապարտեզ մատակարարած նույն սննդից մատակարարել են նաեւ այլ մանկապարտեզների: Բայց այդ մյուս մանկապարտեզներում թունավորումների մասին տեղեկատվություն չկա: Այսինքն, եթե վերջնականապես հաստատվի, որ պատճառը նրբերշիկն է, ապա բացի արտադրողից, կարող է խոսք լինել նաեւ դրա` Եղվարդի մանկապարտեզ հասցնելու կամ մանկապարտեզում պահպանման կանոնների խախտման մասին: Չնայած մյուս կողմից էլª արդեն իսկ ստուգվել են մանկապարտեզում եղած կարագի, պանրի, ձվի, հավի եւ տավարի մսի տեսականիները, սակայն անվտանգության ցուցանիշներով` անհամապատասխանություններ չեն հայտնաբերվել: Իսկ դա ակնարկ է, որ թունավորման հարուցիչն ավելի շուտ պետք է մանկապարտեզից դուրս փնտրել:
Ինչեւէ, երեխաների թունավորման պատճառները պարզելու համար հարուցված գործով նախաքննությունը շարունակվում է: Մանկապարտեզում կատարվել է զննություն, փորձանմուշներ են վերցվել պահեստավորված սննդի տեսակներից, օրվա ճաշատեսակից: Առգրավվել են նաեւ մանկապարտեզին մատակարարված սննդի փաստաթղթերը:

ԻԼՈՆԱ ԱԶԱՐՅԱՆ