ՀԱՅ ՍԱՄԲԻՍՏՆԵՐԸ ԿՄԵԿՆԵՆ ԲԱՔՈՒ

ՀԱՅ ՍԱՄԲԻՍՏՆԵՐԸ ԿՄԵԿՆԵՆ ԲԱՔՈՒ

Հայաստանի սամբոյի ֆեդերացիան քննարկել է հայ սամբիստների մասնակցության հայտը 2015թ. հունիսին Ադրբեջանի մայրաքաղաք Բաքվում կայանալիք Եվրոպայի առաջին մարզական խաղերում եւ որոշել է մասնակցել "Բաքու-2015" Եվրոպական առաջին Օլիմպիական խաղերին:
Այս մարզաձեւի խնդիրներին բազմիցս անդրադարձել ենք մեր էջերում: Մասնավորապես, որ ֆինանսական խնդիրների պատճառով Հայաստանի սամբոյի հավաքականը մի շարք մրցաշարեր ստիպված է լինում ուղղակի բաց թողնել, իսկ այն մրցաշարերին էլ, որոնց մասնակցում է, հաճախ պատշաճ նախապատրաստական փուլ անցկացնել չի կարողանում: Այդ իսկ պատճառով այս մարզաձեւից սպասումները` ապահովված պայմաններին համապատասխան են լինում, թեեւ դեռ հայ սամբիստները բազմիցս ապացուցել են, որ անգամ առանց ուսումնամարզական հավաքներ անցկացնելու, խոշոր մրցաշարերում կարողանում են լուրջ մրցակցություն ցույց տալ եւ վերադառնում են մեդալներով: Բացառություն չէր նաեւ աշխարհի առաջնությունը, որը նաեւ ապացուցեց, որ մեր թիմը կարող է մեկնել Բաքուª վստահ իր "խոսքն ասելու":

Բաքվում կայանալիք Եվրոպական առաջին Օլիմպիական խաղերին մասնակցելու որոշման հետ կապված կլինեն նաեւ ծրագրային փոփոխություններ. կվերանայվի 2015թ. մարզական միջոցառումների օրացուցային պլանը, եւ լրացումներ կկատարվեն Հայաստանի սամբոյի հավաքական թիմերի նախապատրաստման ծրագրում, հանրապետական ընտրական մրցումները կանցկացվեն մինչեւ 57, 90 կգ (տղամարդիկ) եւ մինչեւ 52 կգ (կանայք) քաշային կարգերում ուժեղագույն մարզիկներին բացահայտելու համար: Ինչպես նաեւ կկազմակերպվեն ուսումնամարզական հավաքներ եւ կապահովեն մարզիկների մասնակցությունը երկու միջազգային մրցաշարերիª "Բաքու-2015"-ին պատշաճ պատրաստվելու եւ մասնակցելու համար: Ընդ որումª Բաքվում կան առնվազն 2 մեդալ նվաճելու լուրջ ակնկալիքներ, եթե իհարկե Հայաստանի Ազգային օլիմպիական կոմիտեի կողմից անհրաժեշտ ֆինանսական օգնություն հատկացվի:
Իսկ այն, որ այդ ծրագրերն իրատեսական են, վկայում է Բաքու մեկնելու որոշմանը զուգահեռ` հայ սամբիստների ելույթները 2014թ. աշխարհի առաջնությունում: Ճապոնիայի Նարիտա քաղաքում կայացած այդ մրցաշարին, որին մասնակցում են 80 պետության 600 մարզիկ, Հայաստանը ներկայացել էր 11 մարզիկով: Թիմում ընդգրկված էին աշխարհի չեմպիոններ Աշոտ Դանիելյանը, Վաչիկ Վարդանյանը, համաշխարհային ունիվերսիադայի եւ Եվրոպայի այս տարվա չեմպիոն Տիգրան Կիրակոսյանը, Եվրոպայի առաջնության մրցանակակիրներ Մխիթար Մխիթարյանը, Էդիկ Պետրոսյանը, ինչպես նաեւ Մարտին Միրզոյանը, Արեն Անտոնյանը, Արթուր Հակոբյանը, Ռոզա Խաչատրյանը եւ Սոսե Բալասանյանը: Մրցումների առաջին օրը խաղարկվեցին կանանց մարզական եւ տղամարդկանց մարզական ու մարտական սամբոյի մեդալների 3-ական հավաքածու: Հայաստանի մարզիկներից գերազանց հանդես եկավ արցախցի Մավրիկ Նասիբյանը, ով հաղթելով բոլոր գոտեմարտերում, նվաճեց ոսկե մեդալ ու մարտական սամբոյի 74 կգ քաշային կարգում հռչակվեց աշխարհի չեմպիոն:
Հայաստանի հավաքականի մյուս մեդալը նվաճեց 2013թ. աշխարհի չեմպիոն Աշոտ Դանիելյանը, ով 82 կգ քաշային կարգում չկարողացավ պահպանել տիտղոսը եւ բավարարվեց միայն բրոնզով:

ՔՐԻՍՏԻՆԵ ՊԵՏՐՈՍՅԱՆ