ԻՆՉՈ՞Ւ ՄԻԱՅՆ ՀԻՄԱ ՄԵՂԱԴՐԱՆՔ ԱՌԱՋԱԴՐԵՑԻՆ ԳԻՇԵՐՕԹԻԿԻ ՆԱԽԿԻՆ ՏՆՕՐԵՆԻՆ

ԻՆՉՈ՞Ւ ՄԻԱՅՆ ՀԻՄԱ ՄԵՂԱԴՐԱՆՔ ԱՌԱՋԱԴՐԵՑԻՆ
ԳԻՇԵՐՕԹԻԿԻ ՆԱԽԿԻՆ ՏՆՕՐԵՆԻՆ

- Ամիսներ առաջ էր, որ Բյուրեղավանի գիշերօթիկ դպրոցի անվան շուրջ տարբեր խոսակցություններ սկսեցին ծավալվել: Նախ, որ այնտեղ մեծ գումարներ են յուրացվել: Եվ ամենակարեւորը, որն էլ տպավորվել էր, թե դպրոցում դաժան հաշվեհարդար են տեսնում երեխաների հետ: Եվ միայն օրերս լրատվամիջոցներում խոսակցություններ եղան, որ այդ հաստատության տնօրենի նկատմամբ քրեական գործ կա, եւ նրան կալանքի տակ են առել: Մի՞թե պետք էր երկար ամիսներ քննել նման մի գործ, չէ՞ որ եթե տնօրենն իրոք մեղավոր է, ապա այս ընթացքում կհասցներ բոլոր հետքերը մաքրել:
Գեւորգ Հովսեփյան, թոշակառու, նախկին իրավաբան:
Հարցին պատասխանում է
Բյուրեղավանի գիշերօթիկ հաստատության նախկին տնօրեն Գայանե Մարգարյանի փաստաբան
ՏԻԳՐԱՆ ՀԱՅՐԱՊԵՏՅԱՆԸ.
-Ամենայն հավանականությամբ, քննիչը գտել է, որ գիշերօթիկ դպրոցի նախկին տնօրենը կարող է խոչընդոտել, ասենք, վկաների կողմից ցուցմուք տալու հարցում: Քանի որ կալանավորումը` որպես խափանման միջոց, ընտրվում է նման դեպքերում այն ժամանակ, երբ վտանգ կա, որ մեղադրյալը կարող է խոչընդոտել գործի քննությանը: Բացի այդ, քանի որ այսքան ամսվա ընթացքում ճնշում է եղել քննչական մարմնի վրա, այդ պատճառով էլ, միայն հիմա է տնօրենին մեղադրանք առաջադրվել:
Լսելով փաստաբանի տեսակետը` նաեւ նշենք, որ տնօրենին մեղադրանք ներկայացնելու եւ կալանքի որոշման հետ կապված` ՀՀ քննչական կոմիտեն պարզաբանել էր, թե Գ. Մարգարյանը մեղադրվում է առանձնապես խոշոր չափերի յուրացում եւ առանձնապես խոշոր չափերով վատնում կատարելու մեջ: Խոսքն ընդհանուր առմամբ մոտ 55 միլիոն դրամի մասին է: Սակայն երեխաների հանդեպ դաժան վերաբերմունքի մասին դեռ տվյալներ չկան, սակայն հուսանք, որ եթե գործը մեռյալ կետից շարժվել է, այս հարցով եւս հստակեցումներ կլինեն:

ԻԼՈՆԱ ԱԶԱՐՅԱՆ