"ԹՈՂ ՓՈՍՏԱՆՋՅԱՆՆ ԱՌԱՋԱՐԿԻ ԵՎՐԱՄԻՈՒԹՅՈՒՆԸ ՑՐԵԼ"

"ԹՈՂ ՓՈՍՏԱՆՋՅԱՆՆ ԱՌԱՋԱՐԿԻ
ԵՎՐԱՄԻՈՒԹՅՈՒՆԸ ՑՐԵԼ"

Երեկ ԱԺ նիստի ընթացքում պատգամավոր Զարուհի Փոստանջյանն անդրադառնալով ՀՀ-ի ԵՏՄ-ին անդամակցելու գործընթացին` դիմեց խորհրդարանի գործարար պատգամավորներին. "Առաջին տուժողները հենց գործարարներն են լինելու": Թե ինչու է տիկին Փոստանջյանը հանկարծ սկսել մտածել խորհրդարանական գործարարների մասին, որոնցից շատերը ներկայացնում են մեր հայրենի օլիգարխիան, այսինքնª նրանց տուժելը պետք է որ, առաջին հերթին հենց տիկին Զառայի սրտով լիներ, մնում է հանելուկ: Բայց ամեն դեպքում փորձեցինք ԱԺ գործարար-պատգամավորներից հետաքրքրվել` արդյոք նրանք ինչքան են հուզված` պատգամավորուհու այդ "անկեղծ" մտահոգություններից:
Այսպես, ԱԺ ՀՀԿ խմբակցության պատգամավոր ԱԼԻԿ ՊԵՏՐՈՍՅԱՆԸ մեզ հետ զրույցում մասնավորապես նշեց. "Շատ մեծ եւ դրական ազդեցություն կունենա ԵՏՄ-ն: Առաջին հերթին` կօգնի Հայաստանի արդյունաբերության եւ արտահանման խթանմանը: Այսինքն այն, որ այսօր Հայաստանն ավելի շատ ներմուծող, քան արտահանող երկիր է, փաստ է, եւ ԵՏՄ-ին անդամակցելը կօգնի, որ Հայաստանը ճիշտ տնտեսական կառավարման պայմաններում սկսի ավելի շատ արտահանումներ անել: Բացի դրանից, Հայաստանը շատ նպաստավոր շուկա է դառնում` դրսի ներդրողների համար, այսինքն` մեր երկիրը էլ չի դիտվի որպես 3 միլիոնանոց, այլ միանգամից կընդունվի որպես 170 միլիոնանոց շուկա: Ինչ վերաբերում է Զարուհի Փոստանջյանի ասածներին, ապա նա երեւի չգիտի, որ առանց ԵՏՄ մտնելու, մենք մեր ապրանքը վաճառում ենք Ռուսաստանին. եթե դա վնաս է, ուրեմն` հիմա էլ պետք է այդ վնասը կրեինք, ինչ տարբերություն: Ինքը չգիտի, որ նույն պրոցեսը այսօր էլ է ընթանում, ուղղակի խնդիրն այն է, որ անդամակցությունից հետո մեր ներկայիս հնարավորությունները էլ ավելի կաճեն: Ամբողջ աշխարհը գիտի, որ ինչքան մենք բյուրոկրատական խոչընդոտներից խուսափենք, ինչքան դրսի գործընկերների նկատմամբ վստահությունը մեծացնենք, այնքան կհզորանա մեր տնտեսությունը: Էդ դեպքում թող Զարուհի Փոստանջյանն առաջարկի Եվրամիությունը ցրել, թող ասիª ժողովուրդ, դա շատ վատ բան է, թող ամեն երկիր իր համար աշխատի: Թող էդ ասի, բայց հո Փոստանջյանի ասելով չի":
ԱԺ ՀՀԿ խմբակցության պատգամավոր ՄՀԵՐ ՍԵԴՐԱԿՅԱՆԸ եւս կողմ է ԵՏՄ-ին Հայաստանի անդամագրմանը. "ԵՏՄ-ին անդամակցելը ամենաճիշտ տարբերակն է մեզ համար: Սաղ կյանքներս մեկի գաղութը եղել ենք, դե հիմա ավելի լավ չի՞ Ռուսաստանի գաղութ դառնանք: Եվրոպա գնալը հաստատ մեր համար չէր, շատ վատ կլիներ մեր համար Եվրոպան: Մենք չենք կարա Ռուսաստանից առանձնանանք, պետք է միշտ ռուսի հետ լինենք":
ԲՀԿ-ական գործարար պատգամավոր ՄԵԼԻՔ ՄԱՆՈՒԿՅԱՆԸ նույնպես կողմ է Հայաստանի` ԵՏՄ-ին անդամագրվելուն. "ԵՏՄ-ն շատ դրական ազդեցություն կունենա մեր երկրի տնտեսության զարգացման վրա, իսկ Զարուհի Փոստանջյանի ասածները ես չեմ մեկնաբանում":

ԻԼՈՆԱ ԱԶԱՐՅԱՆ