ՀՐԱՅՐ ԿԱՐԱՊԵՏՅԱՆ. "ՀՀ ԱՌԱՋԻՆ ԻՇԽԱՆՈՒԹՅՈՒՆՆԵՐԸ ԲԱԶՄԱԹԻՎ ՍԽԱԼՆԵՐ ԵՆ ԹՈՒՅԼ ՏՎԵԼ ԱՐՑԱԽԻ ՀԱՐՑՈՒՄ"

ՀՐԱՅՐ ԿԱՐԱՊԵՏՅԱՆ. "ՀՀ ԱՌԱՋԻՆ ԻՇԽԱՆՈՒԹՅՈՒՆՆԵՐԸ ԲԱԶՄԱԹԻՎ ՍԽԱԼՆԵՐ ԵՆ ԹՈՒՅԼ ՏՎԵԼ ԱՐՑԱԽԻ ՀԱՐՑՈՒՄ"

Սանկտ Պետերբուրգում ՀՀ գլխավոր հյուպատոս, դաշնակցական Հրայր Կարապետյանը ակտիվ մասնակցություն է ունեցել 1989 թ.-ի դեկտեմբերի 1-ի Հայկական ԽՍՀ-ի եւ ԼՂ-ի վերամիավորման մասին որոշման ընդունմանը: 25 տարի անց հետադարձ հայացքով անդրադառնալով դեկտեմբերի 1-ի որոշմանը` նա "Իրավունքի" հետ զրույցում ասաց, որ այդ որոշմամբ ամրագրվեց` Արցախը Հայաստանի մի մասն է, ավելին` այդ որոշումը հետագայում համալրվեց այլ որոշումներով եւս:
"Կարծում եմ, այդ որոշումը ուրվագծեց Արցախի ռազմավարական ուղղությունը, հաստատեց Հայաստանի մաս լինելն ու արտահայտեց արցախահայության կամքը: Բարոյական առումով, կարծում եմ, տեղին էր նման որոշում կայացնելը: Հետագայում մարտավարական ինչ-ինչ նկատառումներ հաշվի առնելով` որոշվեց, որ Արցախը հանդես գա որպես առանձին հանրապետություն",- ասաց պրն Կարապետյանը:
Արդյո՞ք ՀՀ առաջին իշխանությունները դեկտեմբերի 1-ի որոշումն օգտագործեցին որպես դիվանագիտական հաղթաթուղթ` Արցախի հարցում: "Կարծում եմ` ոչ: Այն ժամանակվա իշխանությունները` հատկապես Արցախի հարցում, բազմաթիվ սխալներ են թույլ տվել` թե՛ դիվանագիտական, թե՛ այլ առումներով: Արցախի խնդիրն էր նաեւ պատճառը, որ իշխանափոխություն տեղի ունեցավ (նկատի ունի 1998-ի փետրվարի 3-ին Լեւոն Տեր-Պետրոսյանի հրաժարականն ու ՀՀՇ-ի հեռացումը-խմբ.)",- պատասխանում է հյուպատոսը:
Հրայր Կարապետյանի խոսքով` Հայաստանում ինչ իշխանություն էլ լինի, եթե անտեսեց Արցախի խնդիրը եւ այն չհամարեց առաջնահերթ, չի կարող լինել իշխանության ղեկին: "Այսօր մեր բոլոր ջանքերը պետք է ուղղենք Արցախի անկախության ճանաչմանը: Կյանքը ցույց է տալիս, որ ազգերի ինքնորոշման իրավունքն այլընտրանք չունի եւ այն վաղ, թե ուշ ճանաչվում է միջազգային հանրության կողմից",- եզրափակեց Հրայր Կարապետյանը:

ՍՈՆԱ ԴԱՎԹՅԱՆ