«ԱՅՍ ՃԱՆԱՉՈՒՄԸ ՆՈՐ ԷՋ Է ԲԱՑՈՒՄ ՀԱՅՈՑ ՑԵՂԱՍՊԱՆՈՒԹՅԱՆ ՄԻՋԱԶԳԱՅԻՆ ՃԱՆԱՉՄԱՆ ԵՎ ԴԱՏԱՊԱՐՏՄԱՆ ԳՈՐԾԸՆԹԱՑՈՒՄ»

«ԱՅՍ ՃԱՆԱՉՈՒՄԸ ՆՈՐ ԷՋ Է ԲԱՑՈՒՄ ՀԱՅՈՑ ՑԵՂԱՍՊԱՆՈՒԹՅԱՆ ՄԻՋԱԶԳԱՅԻՆ ՃԱՆԱՉՄԱՆ ԵՎ ԴԱՏԱՊԱՐՏՄԱՆ ԳՈՐԾԸՆԹԱՑՈՒՄ»

Այսօր Բուենոս Այրեսի Հայ Առաքելական Սուրբ Գրիգոր Լուսավորիչ Մայր տաճարում կիրակնօրյա պատարագից հետո տեղի է ունեցել Բոլիվիայի Սենատի եւ Պատգամավորների պալատի կողմից` Օսմանյան կայսրության իրականացրած 1915թ. Հայոց ցեղասպանության ճանաչման վերաբերյալ փաստաթղթերը Արգենտինայում ՀՀ արտակարգ եւ լիազոր դեսպան ՎԱՀԱԳՆ ՄԵԼԻՔՅԱՆԻՆ եւ Արգենտինայի Հայոց թեմի առաջնորդ, Գերաշնորհ ՏԵՐ ԳԻՍԱԿ արքեպիսկոպոս ՄՈՒՐԱԴՅԱՆԻՆ հանձնելու արարողությունը:

Բոլիվիայի խորհրդարանի երկու պալատների կողմից ընդունված փաստաթղթերում մասնավորապես հայտարարված է. «1915 թվականի ապրիլի 24-ի գիշերը Օսմանյան կայսրության իշխանությունները, «Միություն եւ առաջադիմություն» կուսակցության առաջնորդները, երիտթուրքերը սկսեցին հայ մտավորականների, քաղաքական գործիչների, գիտնականների, գրողներին, արվեստի գործիչների, հոգեւորականների, բժիշկների, հասարակական գործիչների եւ մասնագետների ձերբակալությունները, ծրագրված աքսորները, իսկ այնուհետեւ պատմական Արեւմտյան Հայաստանի եւ Անատոլիայի տարածքներում հայազգի քաղաքացիական բնակչության զանգվածային ջարդերը:

Խորհրդարանի երկու պալատները «հաստատում են իրենց հավատարմությունը մարդու իրավունքներին, ճշմարտության եւ արդարության արժեքներին, արտահայտում են իրենց զորակցությունն ու դատապարտում Հայոց ցեղասպանության եւ հայ ժողովրդի դեմ իրականացված մարդկային ծանր հանցագործության ժխտողականության քաղաքականությունը»:

Նշենք, որ ըստ ՀՀ արտաքին գործերի նախարարության տեղեկության, միջոցառմանը, որպես հատուկ հյուրեր, հրավիրված են եղել Բոլիվիայի Սենատի նախագահի տեղակալ, Սենատի գործող նախագահ ՍՈՆՅԱ ԳՈՒԱՐԴԻԱ ՄԵԼԳԱՐԸ եւ Պատգամավորների պալատի պատգամավոր ՖԱՐԻԴԵՍ ՎԱԼԱ ՍՈՒԱՐԵՍ դե ՍՈՒԱՐԵՍԸ:

Ի դեպ, իր ելույթում Ս. ՄԵԼԳԱՐԸ անդրադառնալով Բոլիվիայի խորհրդարանի կողմից Հայոց ցեղասպանության ճանաչմանը` նշել է. «Բոլիվիայի ժողովուրդն ու իշխանությունները ոչ միայն իրենց համերաշխությունն ու զորակցությունն են հայտնում հայ ժողովրդին` հանուն արդարության պայքարի գործում, այլ նաեւ դատապարտում են 1915թ. Օսմանյան կայսրության կողմից իրականացված Հայոց ցեղասպանության փաստի ժխտողականության ցանկացած դրսեւորում: Միայն Հայոց ցեղասպանության ճանաչման եւ դատապարտման միջոցով հնարավոր կլինի ազգերի եւ պետությունների կյանքում կանխարգելել նման ոճիրների կրկնությունը»: Ի պատասխան, Վ. ՄԵԼԻՔՅԱՆԸ ՀՀ իշխանությունների անունից շնորհակալություն է հայտնել Բոլիվիայի ժողովրդին եւ իշխանություններին ու հավելել. «Հայոց ցեղասպանության հարյուրամյա տարելիցի նախաշեմին Բոլիվիայի կողմից այս ճանաչումը նոր էջ է բացում Հայոց ցեղասպանության միջազգային ճանաչման եւ դատապարտման գործընթացում եւ եւս մեկ անգամ ապացուցում, որ ժխտողականության եւ մերժողականության քաղաքականությունը ի զորու չէ պայքարելու արդարության եւ ճշմարտության հաստատման դեմ»:

ՀՐԱՆՏ ՍԱՐԱՖՅԱՆ