ՀԱՅ ԵՐԻՏԱՍԱՐԴ ԾԱՆՐՈՐԴՆԵՐԸ ՃԻՇՏ ԴԱՍԵՐ ԷԻՆ ՔԱՂԵԼ ՄԵԾԱՀԱՍԱԿՆԵՐԻ ԱՇԽԱՐՀԻ ԱՌԱՋՆՈՒԹՅՈՒՆԻՑ

ՀԱՅ ԵՐԻՏԱՍԱՐԴ ԾԱՆՐՈՐԴՆԵՐԸ ՃԻՇՏ ԴԱՍԵՐ ԷԻՆ
ՔԱՂԵԼ ՄԵԾԱՀԱՍԱԿՆԵՐԻ ԱՇԽԱՐՀԻ ԱՌԱՋՆՈՒԹՅՈՒՆԻՑ

Կիպրոսի Լիմասոլ քաղաքում շարունակում են ընթանալ մինչեւ 20 եւ 23 տարեկանների ծանրամարտի Եվրոպայի առաջնությունները: Այս ստուգատեսում Հայաստանի մարզական պատիվը պաշտպանելու են 10 ծանրորդ եւ 2 ծանրորդուհի:
Մինչեւ 23 տարեկանների մրցապաքարում, 21-ամյա Սմբատ Մարգարյանը 56 կգ քաշային կարգում դարձել է փոխչեմպիոն. Սմբատը պոկում վարժությունում բարձրացրել է 107 կգ, իսկ հրումումª 145 կգª երկամարտում 4 կգ-ով զիջելով չեմպիոն դարձած իսպանացի Ջոշուե Բրաչին: Հիշեցնենք, որ Ղազախստանի Ալմաթի քաղաքում կայացած ծանրամարտի աշխարհի առաջնությունում տղամարդկանց 56 կգ քաշային կարգում Սմբատ Մարգարյանը երկամարտի 250 կգ (107+143) արդյունքով գրավել էր 7-րդ տեղը` C եւ B խմբերի մասնակիցների մեջ:

Լիմասոլում մինչեւ 20 տարեկան երիտասարդների պայքարին կմասնակցեն Րաֆֆի Գալստյանը, Գեւորգ Բաղդասարյանը (երկուսն էլ` 62 կգ), Դավիթ Հովհաննիսյանը (69 կգ), Գարուշ Ղուկասյանը (երկուսն էլ` 94 կգ), Մհեր Պողոսյանը (105 կգ) եւ գերծանրքաշային Սիմոն Մարտիրոսյանը:
Իսկ մինչեւ 20 կգ քաշային կարգում Նորայր Ավետիսյանն ու Հակոբ Մկրտչյանը արդեն հասցրել են մեդալներ նվաճել. 77 կգ քաշային կարգում Նորայր Ավետիսյանը երկամարտի 318 կգ (138+180) արդյունքով գրավել է երկրորդ տեղը, իսկ բրոնզե մեդալը բաժին է հասել Հակոբ Մկրտչյանին, ով երկամարտում հավաքել է 313 կգ (137+176): Եվրոպայի չեմպիոն է դարձել ռուս Վիկտոր Գետիսը, ում երկամարտի արդյունքը եղել է 355 կգ (160+195): Հակոբ Մկրտչյանը Նանկինի պատանեկան Օլիմպիական խաղերում երկամարտի 319 կգ արդյունքով նվաճել էր ոսկե մեդալ: Իսկ Ալմաթիում կայացած մեծահասակների աշխարհի առաջնությունում հատկապես տպավորիչ ելույթներ էր ունեցել պատանիների աշխարհի չեմպիոն եւ ռեկորդակիր, 17-ամյա Սիմոն Մարտիրոսյանը, ով ելույթ ունեցավ 105 կգ քաշային կարգում եւ երկամարտի 396 կգ (183+213) արդյունքով 38 մասնակիցների մեջ զբաղեցրեց 7-րդ տեղը: Այնպես որ, Լիմասիում Մարտիրոսյանի հնարավորությունները հսկայական են:
Մեծահասակների աշխարհի առաջնությունում Իզաբելա Յայլյանը երկամարտի 207 կգ (97 +110) ցուցանիշով 40 մասնակիցների մեջ զբաղեցրել էր 19-րդ տեղը, իսկ ահա Եվրոպայի առաջնությունում հայ ծանրորդուհին 58 կգ քաշային կարգում դարձավ չեմպիոն: Իզաբելան պոկում վարժությունում բարձրացրել է 85 կգ, իսկ հրումումª 106 կգ: Աղջիկների մրցավեճի մեր մյուս մասնակիցը Տաթեւ Հակոբյանն էր, ով պոկում վարժությունում ցույց տվեց 93 կգ (չորրորդ արդյունք), հրումումª 108 կգ (հինգերորդ արդյունք) ու երկամարտի 201 կիլոգրամով զբաղեցրեց 5-րդ տեղը:
Փաստորեն, մեծահասակների աշխարհի առաջնությունում փորձառու ծանրորդների հետ պայքարը հայ երիտասարդ մարզիկներին անհատական ցուցանիշները բարելավելու եւ երիտասարդների մեջ ավելի կայուն պայքար ցուցադրելու հնարավորություն տվեց:

ՔՐԻՍՏԻՆԵ ՊԵՏՐՈՍՅԱՆ