ԵՏՄ-Ի ՀԱՐՑՈՎ ԱԺ ԽՄԲԱԿՑՈՒԹՅՈՒՆՆԵՐԸ ԳՐԵԹԵ ՉԵՆ ՓՈԽԵԼ ԻՐԵՆՑ ՏԵՍԱԿԵՏՆԵՐԸ

ԵՏՄ-Ի ՀԱՐՑՈՎ ԱԺ ԽՄԲԱԿՑՈՒԹՅՈՒՆՆԵՐԸ
ԳՐԵԹԵ ՉԵՆ ՓՈԽԵԼ ԻՐԵՆՑ ՏԵՍԱԿԵՏՆԵՐԸ

ԱԺ տնտեսական հարցերի մշտական հանձնաժողովն օրերս քննարկեց եւ դրական եզրակացություն տվեց Եվրասիական տնտեսական միությանը Հայաստանի անդամակցելու պայմանագիրը, որն առաջիկայում կընդգրկվի ԱԺ քառօրյայի օրակարգում: Ի՞նչ ցույց տվեցին այդ քննարկումները, ԱԺ խմբակցություններն ի՞նչ դիրքորոշում ունեն: "Իրավունքը" փորձեց ճշտել, թե ԵՏՄ Հայաստանի անդամակցության պայմանագրի քննարկման ժամանակ եղե՞լ է նախնական տեսակետների փոփոխություն, թե ոչ:
"Ժառանգություն" կուսակցության տեսակետում կարծես թե փոխվել է միայն այն, որ, ի տարբերություն պատգամավոր Զարուհի Փոստանջյանի, կուսակցության մյուս պատգամավորներն ազգի դավաճան չեն համարում այն գործընկերներին, ովքեր կողմ են քվեարկել  ԵՏՄ անդամակցության պայմանագրին:
Իսկ ահա ՀՅԴ-ից իրենց տեսակետը հայտնեցին յուրօրինակ ձեւով. "Մենք խիստ զբաղված ենք":
ԱԺ "Օրինաց երկիր" կուսակցության պատգամավոր, ՕԵԿ փոխնախագահ ՀՈՎՀԱՆՆԵՍ ՄԱՐԳԱՐՅԱՆԸ մի քանի բառ ավել ասաց, բայց հստակ կարծիք կար.
- Մենք միշտ էլ կողմ ենք եղել, որ Հայաստանը անդամակցի ԵՏՄ-ին: ԱԺ-ում պայմանագրի քննարկման ժամանակ մենք մնացել ենք մեր նախնական կարծիքին, եւ ոչինչ չի փոխվել:
ԱԺ ԲՀԿ խմբակցության պատգամավոր ԼՅՈՎԱ ԽԱՉԱՏՐՅԱՆՆ ընդգծեց.
- Մենք մեր կուսակցության ներսում կատարել ենք քննարկումներ, սակայն վերջնական որոշում դեռեւս չենք կայացրել ¥այս կարծիքն առնվազն տարօրինակ է նրանով, որ ԵՏՄ-ի հարցով գլխամասային համարվող ԱԺ տնտեսական հարցերի մշտական հանձնաժողովի համապատասխան նիստը վարում էր եւ "կողմ" քվեարկեց հանձնաձողովի ԲՀԿ-ական փոխնախագահ Միքայել Մելքումյանը, ով այնուհետեւ անթաքույց ակնարկեց, որ նման քվեարկությունը ոչ միայն իր անձնական, այլª կուսակցության տեսակետն էր- հեղ.¤:
Քաղաքագետ ԼԵՎՈՆ ՇԻՐԻՆՅԱՆՆ էլ հետեւյալ կերպ մեկնաբանեց ԵՏՄ-ին Հայաստանի անդամակցության պայմանագրի քննարկման գործընթացը.
- Ակնհայտ է, որ հայ հասարակությունը ԵՏՄ-ին Հայաստանի անդամակցությանը չի դիմադրում: Նույնիսկ քաղաքական կառույցներ կոչվածներն առանձնապես բողոք չունեն, քանի որ հասկանում են Հայաստանի աշխարհաքաղաքական դիրքի տեղաբախշվածությունը եւ խոշոր տերությունների մեջ բարեկամների բացակայությունը այլ տարբերակի հնարավորություն չի տալիս: Կարծում եմ` ԵՏՄ-ին անդամակցելու ընտրությունը շատ ճիշտ է: ԱԺ-ում ԵՏՄ պայմանագրի վերաբերյալ պետք է տեղի ունենար լայն քննարկում` ոչ թե մերժելու կամ ընդունելու տարբերակով, այլ դրա բացասական ու դրական կողմերը  քննելու իմաստով: Իհարկեª կան որոշ բողոքողներ, որոնք համարվում են հասարակության մի փոքր հատվածը, եւ նրանց բարձրացրած աղմուկն անիմաստ է: Այստեղ գործում է ժողովրդավարական սկզբունքը` ձայն բազմաց, ձայն Աստծո: Մենք պետք է կարողանանք այս հնարավորությունից օգուտներ քաղել, ռեալ գնահատել դրականն ու բացասականը եւ առաջ գնալ: Հայաստանը համապատասխան կողմնորոշման դեպքում կարող է դառնալ Ռուսաստանի, Բելառուսի, Ղազախստանի մոդեռնիզացիայի դարբնոցը: Սա Աստծո կողմից տրված հնարավորություն է, բայց դե  հարց է` մենք այն կօգտագործենք, թե ոչ:


Z-PR սոցհարցման կենտրոնը Երեւան քաղաքում 100 հոգու շրջանում կատարել է հարցում`պարզելու համար, թե մինչեւ դեկտեմբերյան հերթական քննարկումնները, խմբակցությունները կփոխե՞ն իրենց դիրքորոշումները, թե՞ ոչ:
1. Ոչ, բոլորն էլ հասկանում են, որ ԵՏՄ-ին անդամակցելու գործընթացն անշրջելի է, փորձում են իրավիճակին հարմարվել- 63%:
2. Այո, ԱԺ-ում կան ԵՏՄ-ին դեմ ուժեր, որոնք դեռ ի հայտ կգան- 29%:
3. Դժվարանում եմ պատասխանել- 8%:

ԶՎԱՐԹ ԽԱՉԱՏՐՅԱՆ