«ՈՎ ՔՈ ԿԱՐԾԻՔԻՆ ՀԱՄԱՁԱՅՆ ՉԷ, ԱՍԵՆՔ` ԱԶԳԻ ԴԱՎԱՃԱՆ Է, ԱՅԴՔԱՆ ԷԼ ՃԻՇՏ ՉԷ»

«ՈՎ ՔՈ ԿԱՐԾԻՔԻՆ ՀԱՄԱՁԱՅՆ ՉԷ, ԱՍԵՆՔ`
ԱԶԳԻ ԴԱՎԱՃԱՆ Է, ԱՅԴՔԱՆ ԷԼ ՃԻՇՏ ՉԷ»

ՀԱԿ-ի հին կաղնու` ԼՏՊ-ի հորդորին, որ ավելորդ են ջղաձգումները` ՀՀ ԵՏՄ անդամակցման շուրջ, կարծես թե, ի գիտություն ընդունեցին բոլոր արեւմտամետ ուժերն ու գործիչները, բացի ԱԺ «Ժառանգություն» խմբակցության պատգամավոր Զարուհի Փոստանջյանից: Վերջինս ո՛չ ավել, ո՛չ պակաս խորհրդարանում ՀՀ ԵՏՄ անդամակցման հարցի քննարկման ժամանակ ամբիոնից հայտարարեց, թե ովքեր «կողմ» քվեարկեն այս որոշմանը, կհամարվեն ազգի դավաճան: Այս եւ այլ ներքաղաքական հարցերի շուրջ «Իրավունքը» զրուցեց ԱԺ «Ժառանգություն» խմբակցության պատգամավոր ԹԵՎԱՆ ՊՈՂՈՍՅԱՆԻ հետ:
-Պարոն Պողոսյան, համամի՞տ եք Զ. Փոստանջյանի այն տեսակետին, որ ովքեր կողմ են ՀՀ ԵՏՄ անդամակցմանը ազգի դավաճաններ են:
- Ես դատավոր չեմ, իսկ ազգի դավաճան կարող եմ համարել միայն նրան, ով, իսկապես, դատարանում ապացուցվել է, որ ազգի դավաճան է:

Այնպես որ, եթե մարդիկ ունեն տեսակետ, հավատում են դրան եւ իրենց ազգի զարգացման տեսլականը դրա մեջ են տեսնում, իրենց ընտրությունն է: Մենք ապրում ենք մի երկրում, որտեղ միասին մեր հողն ենք պաշտպանում սահմանագծում: Եվ այդ իմաստով նման բառերը ուղղակի «շռայլելը», երեւի այդքան էլ ճիշտ չէ: Բայց Զարուհի Փոստանջյանն էլ, իր իրավունքն ունի` իր կարծիքն այդպես ձեւակերպելու, ասելու: Ես երբեւէ որեւէ մեկին չեմ ասի ազգի դավաճան, եթե չեմ տեսել իր դավաճանությունը: Իսկ եթե այդ բառը փոքրացնենք, եւ ամեն մեկը, ով քո կարծիքի հետ համաձայն չէ, ուղղակի ասենք` ազգի դավաճան է, այդքան էլ ճիշտ չէ: Այս պարագայում ես չեմ ցանկանում որեւէ մեկին պիտակ կպցնել, այլ կասեմ միայն մեկ բան, ինչպես արդեն ասել եմ ԱԺ հայտարարությունների ժամին` խնդրում եմ, երբ քվեարկեք, ծանր ու թեթեւ արեք բոլորի տեսակետները` ե՛ւ դրականը, ե՛ւ բացասականը ու վերջում հավատալով, ձեր սեփական կամքով ձեր քվեարկությունն արեք: Իսկ թե ինչ կլինի, դա էլ կորոշի ժամանակը: Հիմա վաղը, օրինակ, եթե սոցիալական հարցում անեն, եւ պարզվի, որ բնակչության 80 տոկոսը կողմ է ԵՏՄ անդամակցմանը, մենք պետք է բոլորին ազգի դավաճա՞ն համարենք: Ամեն մարդ իր համար պետք է գնահատական տա, բայց ազգի դավաճան պետք չէ կոչել միմյանց:
- «Ժառանգություն» խմբակցությունն ի՞նչ տեսակետ ունի ԱԺ ՀԱԿ խմբակցության պատգամավոր Նիկոլ Փաշինյանի` ՀՀ նախագահին պաշտոնանկ անելու` Ազգային ժողովի որոշման նախագիծն արտահերթ կարգով խորհրդարանի օրակարգ մտցնելու նախաձեռնության մասին:
- Մենք այդ հարցը չենք քննարկել, որովհետեւ ֆիզիկապես դա հնարավոր չէր: Ես ամսի 20-ից բացակայել եմ ու վերադարձել եմ ընդամենը օրեր առաջ, իսկ պարոն Ռ. Հակոբյանը մեկնել է եւ կվերադառնա ամսի 29-ին: Երբ վերադառնա, դրանից հետո կկարողանանք հնարավորություն ունենալ նաեւ քննարկել դա: Գաղափարի մասին եթե խոսենք, ապա «Ժառանգությունը» եղել է եւ մնում է ընդհանուր համակարգային փոփոխությունների կողմնակից: Եվ այս շրջանակի մեջ` գաղափարային իմաստով, այդ նախագիծը շատ դրական է ընկալվում: Բայց մինչեւ տեքստը չլինի, չքննարկենք, դժվարանում եմ կարծիք ասել:
- Փաստորեն, հավանականություն կա՞, որ Ն. Փաշինյանը կստանա «Ժառանգության» պատգամավորների ստորագրությունները:
- Միշտ այդ հավանականությունը կա, եւ ինձ թվում է` ավելի շատ խնդիրն այդ կողմ է գնում: Ուղղակի, մանրուքներն են կարեւոր, թեպետ կարդացել եմ Նիկոլ Փաշինյանի հարցազրույցը, որտեղ ասել է, որ շատ պարզ եւ մատչելի տեքստ է լինելու: Այնպես որ, տեքստը կտեսնենք եւ ըստ դրա էլ կարձագանքենք, որեւէ խնդիր չեմ տեսնում:

ՀՐԱՆՏ ՍԱՐԱՖՅԱՆ