ԶԱՐՄԱՆՔ

Գրեթե բոլորս վրդովվում ենք, թե ինչպիսի ցածրաճաշակ ու գռեհիկ սերիալներ են ցուցադրվում հայրենի հեռուստաեթերում: Իսկ հիշո՞ւմ եք խորհրդային տարիների մարդկային դեմքով սերիալները: Զորօրինակ` կապիտան ՀԱՆՍ ՔԼՈՍԻՆ: Նրա դերը կատարող լեհ դերասան Ստանիսլավ Միկուլսկին 86 տարեկանում հեռացավ կյանքից: Ինչեւէ, այսօր, երբ համացանցում գտնում ես այդ հին-բարի սերիալների տեսագրությունները, ապա զարմանքով տեսնում ես, որ այսօրվա աղբի հետ համեմատության ոչ մի եզր չկա: Այնպես որ, կարոտախտը բավականին հաճախ ամենեւին էլ վատ բան չէ: Եվ զարմանալով հանդերձ, բարի խոսքով հիշենք ե՛ւ Միկուլսկուն, ե՛ւ նրա մարմնավորած կապիտան Քլոսին:
Ինչպես հայտնի է, երեկ կեղծ ահազանգ էր եղել, իբր "Զվարթնոց" օդանավակայանում ռումբ կա: Եվ ահա ԱՀԱԶԱՆԳԻ հեղինակը ոստիկանության եւ ԱԱԾ աշխատակիցների ջանքերով հայտնաբերվել եւ բերման է ենթարկվել ոստիկանության Մաշտոցի բաժին: Ու ամենազարմանալին` ոստիկանությունում տված նրա պարզաբանումն է. "Անտեր տղա եմ, ասի` զանգեմ, մի քանի տարի կտանեն` կպահեն: Հացը կտան, ջուրը կտան, քնելու տեղն էլ կունենամ": Պատկերացնո՞ւմ եք, մարդը ցանկացել է հայտնվել բանտում, որպեսզի պետությունը նրան ձրի պահի: Հետաքրքիր է, արդյո՞ք հոգեպես առողջ է այդ անձնավորությունը: Չէ՞ որ անգամ ամենածանր վիճակում գտնվելու դեպքում, ազատությունը հնարավորություն է ընձեռում փորձել ինչ-որ ելքեր գտնել, իսկ բանտի պայմանները, բնականաբար, ընտրության որեւէ հնարավորություն չեն տալիս:  Բայց, խոշոր հաշվով, այսօր քիչ չեն այնպիսի հայորդիները, ովքեր չեն էլ ուզում ընտրության հնարավորություն ունենալ:
Իսկ Լեհաստանում տեղի է ունեցել ամենաապշեցուցիչ գողությունը: Թանգարանային համալիրի վերածված ՄԱՅԴԱՆԵԿ համակենտրոնացման ճամբարում, ի թիվս այլ ցուցանմուշների, պահվում են նաեւ նախկին կալանավորներին պատկանող շուրջ 56 հազար կոշիկ: Եվ ահա անհայտ չարագործը կտրել է պահոցի ցանցը եւ տարել 8 կոշիկ: Անշուշտ, այդ նմուշները պատմական մեծ արժեք ունեն, սակայն զարմանալի է, այդ գողությանը գնալով, ինչո՞ւ չարագործը բավարարվեց հենց 8 կոշիկով, այլ ոչ թե մի ամբողջ պարկ տանելով: Ո՞ւր է տրամաբանությունը: Եվ զարմանալին նաեւ այն է, որ սա առաջին գողությունը չէ, ավելի վաղ այդտեղից գողացել էին զոհերի մոխիր եւ կալանավորի գլխարկ: Դե ինչ , խելապակասների պակաս կարծես թե չի զգացվում:
Իսկ մեր հարեւան խելապակասների մասին էլ բավականին դիպուկ է արտահայտվել հայտնի ռուս վերլուծաբան ԿՈՆՍՏԱՆՏԻՆ ԶԱՏՈՒԼԻՆԸ: Վերլուծելով նրանց քաղաքականության դրդապատճառները` նա վերջում ասում է. "Ես ցանկանում եմ Ադրբեջանին ասել, որ իր ջանքերը, լարվածության ռազմավարությունը ի վերջո հենց իր դեմ շուռ կգան, քանի որ նավթի ու գազի շահույթի բաշխումն այնտեղ ասիական ձեւով է տեղի ունենում` գնում է իշխանության ու մերձավորների գրպանը": Դե ինչ, զգուշացումը միանգամայն տեղին է, բայց արդյո՞ք այդ քոչվորները ականջալուր կլինեն դրան, թե կգերադասեն իրենք իրենց գլխին փորձանք բերել:

Զարմացած է  
ՀՈՎՀԱՆՆԵՍ ԳԱԼԱՋՅԱՆԸ