"ԺԱՌԱՆԳՈՒԹՅԱՆ" ԱԿՏԻՎԸ ՉԻ ԱՋԱԿՑՈՒՄ ՐԱՖՖԻ ՀՈՎՀԱՆՆԻՍՅԱՆԻՆ

"ԺԱՌԱՆԳՈՒԹՅԱՆ" ԱԿՏԻՎԸ ՉԻ ԱՋԱԿՑՈՒՄ
ՐԱՖՖԻ ՀՈՎՀԱՆՆԻՍՅԱՆԻՆ

Այն, որ Զարուհի Փոստանջյանը, Ստյոպա Սաֆարյանը եւ մի շարք այլ "ժառանգականներ", հրապարակավ հակադրվում են Րաֆֆի Հովհաննիսյանի տեսակետներին, մասնավորապես եռյակի շրջանակներում համատեղ գործունեությանը, հանրահայտ է: Սակայն պարզվում է` Րաֆֆիի հայտարարություններով, մեղմ ասած, հիացած չէ նաեւ "Ժառանգության" փոխնախագահ Արմեն Մարտիրոսյանը:

"Հայոց աշխարհ" թերթին տված հարցազրույցում նա խուսափել է իր կարծիքը հայտնել իր կուսակցության ղեկավարի հայտարարությունների վերաբերյալ եւ առաջարկել է Րաֆֆիի հետ կապված բոլոր հարցերն ուղղել հենց նրան. "Իհարկե, ես ունեմ իմ անձնական կարծիքը պարոն Հովհաննիսյանի հայտարարության մեջ արծարծված հարցերի եւ հարակից խնդիրների վերաբերյալ: Բայց համարում եմ, որ ավելի ճիշտ է` պահպանել կուսակցական կարգապահությունը... Գերադասում եմ իմ անձնական դիտարկումները ներսում արտահայտել, իսկ հրապարակավ ներկայացնել մեծամասնության կողմից ընդունված որոշումները":
Ակնհայտ է, որ Արմեն Մարտիրոսյանը համամիտ չէ Րաֆֆիի հետ, սակայն զուտ "կուսակցական կարգապահությունից" ելնելով` իր կարծիքը հրապարակավ չի արտահայտվում, ի տարբերություն նույն Փոստանջյանի, որն ըստ Ա. Մարտիրոսյանի` "օգտվում է ազատությունների ավելի լայն շրջանակից": Ի դեպ "Ժառանգության" փոխնախագահը նշել է, որ մոտակա հանրահավաքից մարդաշատության ակնկալիքներ չունի, քանի որ. "Ժառանգության" հավաքները երբեւիցե հայտնի չեն եղել իրենց մարդաշատությամբ...":

ԱՐՄԵՆՈՒՀԻ ՀԱԿՈԲՅԱՆ