"ՀԱՅԱՍՏԱՆՈՒՄ ՍԵՌԱՎԱՐԱԿՆԵՐԸ "ԵՐԻՏԱՍԱՐԴԱՆՈՒՄ" ԵՆ"

"ՀԱՅԱՍՏԱՆՈՒՄ ՍԵՌԱՎԱՐԱԿՆԵՐԸ
"ԵՐԻՏԱՍԱՐԴԱՆՈՒՄ" ԵՆ"

"Մասնագիտական փորձը վկայում է, որ սեռավարկներով պայմանավորված` սեռական խնդիրներ ունեցող պացիենտների թիվը, ցավոք, գնալով մեծանում է: Սեռավարակների մասին խոսելիս` շատերն ամոթխածությամբ լռում են, բժշկի չեն դիմում, ինչի հետեւանքով կարող են առաջանալ մի շարք բարդություններ: Սեռավարակները թաքցնելու պարագայում վտանգի տակ կարող ես դնել ե՛ւ քո, ե՛ւ ընտանիքիդ անդամների առողջությունը: Առանձնահատուկ ռիսկի խումբ են կազմում արտագնա աշխատանքի մեկնողները: Ամուսիններն արտագնա աշխատանքից վերադառնում են ու վարակում իրենց կանանց: Ժամանակին չհայտնաբերելու եւ չբուժելու դեպքում սեռավարակները կարող են բացասաբար ազդել վերարտադրողական (մանկածնման) ֆունկցիայի վրա",- մեզ հետ զրույցում անդրադառնալով հարցին` սեռավարակներով հիվանդների աճի, թե նվազման միտում է նկատվում, ասաց ԵՊԲՀ Սեքսապաթոլոգիայի կլինիկայի բժիշկ-սեքսապաթոլոգ, սեքսոլոգիայի ամբիոնի դասախոս Վրեժ Շահրամանյանը: Մասնագետի խոսքով.
-Հայաստանում սեռավարակները "երիտասարդանում" են, այսինքնª շատ ավելի վաղ տարիքի անձանց մոտ են դրսեւորվում, քան, օրինակ, երկու-երեք տասնամյակ առաջ: Սա պայմանավորված է սեռական կյանքի ազատականացմամբ, վաղ սեռական կյանքով, այսօրվա ազատ բարքերով, սեռական առողջության վերաբերյալ ունեցած թերի գիտելիքներով:
Այսօր սեռավարակները 30-ից ավելի են: Որոշ սեռավարակներ շատ վտանգավոր են մոր եւ պտղի համար: Որոշ սեռավարակներ, չունենալով կլինիկական դրսեւորումներ մոր մոտ, կարող են լուրջ վտանգ ներկայացնել պտղի համար, հանգեցնել ինքնաբեր վիժման, հղիության զարգացման կասեցման, պտղի զարգացման արատների, ներարգանդային վարակվածության:
Սեռավարակների վաղ ախտանշանները հաճախ դժվար է լինում զատորոշել, եւ պացիենտները հիմնականում անտեսում են դրանք` մինչեւ ի հայտ են գալիս ավելի լուրջ ախտահարումներ: Երբեմն սեռավարակների ախտանշանները կարող են անցնել առանց բուժման, սակայն հարուցիչն ամեն դեպքում մնում է օրգանիզմում: Ցանկացած պահին, հատկապես իմունետետի անկման դեպքում, հիվանդությունը կարող է գլուխ բարձրացնել, ունենալ ավելի ծանր ընթացք եւ առաջացնել բարդություններ: Աշնանը իմունիտետի հարաբերական անկում է նկատվում` խաբուսիկ եղանակի հետեւանքով: Արդյունքում որոշ սեռավարակներ եւ սեռական խանգարումներ գլուխ են բարձրացնում, ինչով էլ պայմանավորված է դիմելիության աճը:
Սեռավարակների առկայության մասին վկայում են հետեւյալ ախտանշանները` տհաճ զգացողություններ` սեռական օրգանների շրջանում (քոր, ծակոց, մրմռոց, ոչ սովորական արտադրություն եւ հոտ), միզարձակման խանգարումներ, ջերմությամբ ուղեկցվող ցավեր որովայնի շրջանում, ցավեր` սեռական հարաբերությունների ժամանակ, սեռական օրգանների վրա առաջացած խոցեր: Սեռավարակների զգալի մասը կարող է ընթանալ առանց ակնառու ախտանշանների: Սակայն այդ դեպքում էլ, վարակված անձինք վարակի աղբյուր են զուգընկերների համար: Ավելին` անախտանիշ ընթացող սեռավարակները եւս կարող են առաջացնել բարդություններ: Բոլոր սեռավարակները գործնականորեն բուժելի են, եթե ախտորոշվել են ժամանակին:

ԻԼՈՆԱ ԱԶԱՐՅԱՆ