"ՄԱՐՏԻՄԵԿՅԱՆ ԽԱՐԱՆԸ ՀԱՎԵՐԺ ԿՄՆԱ ՏԵՐ-ՊԵՏՐՈՍՅԱՆԻ ՃԱԿԱՏԻՆ"

"ՄԱՐՏԻՄԵԿՅԱՆ ԽԱՐԱՆԸ ՀԱՎԵՐԺ ԿՄՆԱ ՏԵՐ-ՊԵՏՐՈՍՅԱՆԻ ՃԱԿԱՏԻՆ"

Երեկ "Ազդակ" լրագրողական ակումբում ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ ԱՐՏԱԿ ԴԱՎԹՅԱՆԸ մինչ կխոսեր ՀՀ-ի` ԵՏՄ անդամակցության ռիսկերի եւ դրական կողմերի մասին, նախ նշեց, որ խորհրդարանում քննարկումներ են ծավալվել, որը խորհրդարանականներին հնարավորություն է տալիս այս ընթացքում, մինչ համաձայնագիրը լիագումար նիստ ներկայացնելը, արտահայտեն իրենց մտքերն ու մտահոգությունները.
-Անկախ ամեն ինչից, երբ  միջազգային այս կամ այն ձեւաչափին միանալու հայտ է ներկայացվում, իսկ հետագայում, եթե միանում ես, ապա ինչպես կա դրականը, այնպես էլ ռիսկայինը, առանց որի անհնարին է: Դրականի մասին խոսելիս` կասեմ, որ գտնվելով բավականին մեծ տնտեսական տարածքում, ինչը շատ մոտ է ոչ միայն մեր սպասելիքներին, այլեւ այն ամենին, ինչ որ մեր երկիրն ունի այս պահին: Տասնամյակներ շարունակ ամբողջ տնտեսական ենթակառուցվածքներով, ստանդարտներով համապատասխանել ենք հենց այս տարածքին: Ավելորդ ռեսուրսներ ներդնելու, դա լինի մարդկային, ֆինանսական, ժամանակային, անհրաժեշտություն չկա: Մեր ապրանքները շատ ավելի մրցունակ են հենց այդ շուկայում: Դրականի մասին կարող ենք մի քանի տասնյակ բաներ նշել: Իսկ ռիսկերից առաջինը տրանսպորտային հիմնախնդիրն է, մենք գտնվում ենք շրջափակման մեջ, ունենք երկաթուղային մեկ կապ` նախկին չորս կցահանգույցներից, այն էլ` հարեւան Վրաստանի ուղղությամբ: Զուտ տնտեսական առումով դա քիչ թե շատ լուրջ խնդիր է, բայց որոշակի ենթակառույցներ գործում են: Իսկ թե կգործարկվի Աբխազական երկաթուղին, ոչ ոք չի կարող հստակ պատասխան տալ, բայց միգուցե առաջիկա ամիսներին ավելի որոշակիություն լինի:
- Պարոն Դավթյան, ինչպես դուք նշեցիք, երկուշաբթի օրը ԱԺ-ում պատգամավորների համար լսումներ եւ քննարկումներ էին կազմակերպվել, սակայն այդ քննարկումներին ակտիվ էր միայն ՀՀԿ-ն, ԲՀԿ-ից բավականին քիչ էին եւ լռում էին, ՀՅԴ-ն եւ ՀԱԿ-ն ընդհանրապես բացակայում էին, "Ժառանգությունից" միայն Զարուհի Փոստանջյանը դեմ արտահայտվեց, իսկ ՕԵԿ-ից շատ քիչ հարց եւ ելույթներ եղան: Հավանակա՞ն է, որ ՀՀԿ-ն արդեն քվեարկության ժամանակ մենակ մնա:
- Կարծում եմ, որ սա այն հարցն է, որ յուրաքանչյուր քաղաքական ուժ պետք է հստակ արտահայտի իր դիրքորոշումը` կողմ են, թե դեմ: Սա այն հարցը չէ, որ որեւէ մեկը փորձի ձեռնպահ մնալ, քանի որ այն կապ ունի մեր երկրի ապագայի հետ: Եվ, այո, ճիշտ եք նկատել, որ միակ քաղաքական ուժը, որը հստակ արտահայտում է իր տեսակետը, ՀՀԿ-ն է: Ասել ենք ու ասում ենք, որ կողմ ենք, եւ դա մեր գիտակցված քայլն է եղել: Հիմա թե ինչու են այս կամ այլ կերպով խուսանավում, սա իրենց խնդիրն է: Կարծում եմ, երբ առաջիկայում կրկին քննարկումներ լինեն խորհրդարանում, կոնկրետ ջրբաժան պետք է լինի, եւ ամեն մեկը պետք է արտահայտի իր դիրքորոշումը:
- Կարելի՞ է ասել, որ խուսափում են պատասխանատվությունից:
- Չէի ցանկանա այդպես ասել, բայց եթե նույնիսկ այդպես է, ապա ինչպես են պատկերացնում ավելի լուրջ դերակատարություն ստանձնել` պետական որոշումներ կայացնելու առումով, եթե այսօր դրված է հարց, որին պետք է տալ կոնկրետ պատասխան: Առաջիկա` դեկտեմբերի 1-3-ի քառօրյայի ժամանակ անպայման հստակություն կտեսնենք այդ հարցում:
- Օրերս Րաֆֆի Հովհաննիսյանը մի ուշագրավ հայտարարություն արեց, նշելով, որ "եռյակում" չկա միասնական օրակարգ: Ըստ էության, "եռյակը" վերածվում է դուետի: Ի՞նչ անելիքներ ունեն մնացյալ երկու ուժերը:
- Երբ ասում են դուետ, պատկերացնում եմ, որ քաշային առումով եւս այս ուժերը տարբեր են: Մեկը ծանր քաշայինն է` ԲՀԿ-ն, եւ թեթեւ քաշայինը` ՀԱԿ-ը: Իսկ որպես կանոն ծանր քաշայինը միշտ քիչ է խոսում, գործ է անում, իսկ թեթեւ քաշայինը միայն խոսում է:  Բայց այս երկուսի պարագայում եւս կան ռազմավարության տարբերություններ, եւ ծանր քաշայինը մարզերում ցանկանում է շտաբներ ձեւավորել, իր ասելիքը տեղերում ասել, իսկ թեթեւ քաշայինը առաջարկում է Ազատության հրապարակում ճնշման տակ պահել իշխանություններին: Այսինքն, այս դուետի մեջ էլ գործողությունների հստակություն չկա: Րաֆֆին ընտրել է մի ուղղություն, մի անգամ էլ տեսանք դա, որ ամեն ինչ ավարտվեց Աստծո առաջ ապաշխարանքով, իսկ եթե այս ընթացքում էլի մեղքեր է գործել, եւ ցանկություն ունի էլի ապաշխարելու, դա իր գործն է: Բայց մեկ անգամ տեսել ենք, թե ինչպես դա ավարտվեց: Տա Աստված, այդ երկու ուժերը վաղ թե ուշ եւս գնան Աստծո տաճար, չնայած թեթեւքաշայինի պարագայում ես մեծ կասկած ունեմ, քանի որ նրանք անընդհատ սատանայական մեհյանում են եւ այդ ուղղությամբ, աստիճանաբար մաշվելով: Իսկ թե ԲՀԿ-ն կոնկրետ ո՞ր ուղղության գայթակղության մեջ է` ընկնելով թեթեւագույն գործընկերոջ ազդեցության տակ, դժվարանում եմ ասել: Առաջիկայում նրանց քայլերից ամեն բան պարզ կլինի:
- Չե՞ք կարծում, որ քաղաքական դաշտում բոլոր գայթակղությունները ուղղված են լինում իշխանության հասնելուն կամ աթոռներ զավթելուն:
- Իշխանության ձգտելը վատ բան չէ, բայց եթե այդ պայքարը տեղավորվում է օրենքների տիրույթում: Բայց երբ փորձում են սոցիալական որոշակի լարվածություն բերել, ուղղորդել իշխանություններին եւ տանել ատելության, տանել ոչ օրինական գործողությունների, որոնք, ինչպես գիտեք, ԼՏՊ-ի գործողություններն են, դա նրա խարանն է` ճակատին դրոշմված է եւ երբեւէ դրանից չի հրաժարվի ու չի ազատվի, դա իհարկե ընդունելի չէ: Այստեղ խնդիրն այն չէ, որ եթե մենք կամ դուք լինենք, ավելի լավ կկառավարենք երկիրը, այլ խնդիրը համակարգի մեջ է: Իսկ այն ձեռքբերումները, որոնք մենք ունենք,  ակնհայտ է: Օրինակ` մեր բանակը ապացուցում է, որ ամենահզորներից է, եւ այն ներդրումները, որոնք կատարվել են, եղել են տեղին ու արդյունք ենք ստացել: Պետք չէր չարախնդալ եւ մեջբերել ՎՊ-ի տվյալները, որ այս ոլորտում կա ռիսկայնություն: Մենք շատ լավ գիտենք, թե Խորհրդային Հայաստանի փլուզման դափնին ում է պատկանում: Հիշում եք չէ՞, երբ խոսում էին, որ ջերմուկով կպահեն Հայաստանը, բայց կոնկրետ քայլեր այդ ուղղությամբ չէին անում:
- ՀՀ 2-րդ նախագահին տեսնո՞ւմ եք ԲՀԿ-ի գործողություններում, քանի որ նրանց հայտարարությունների մեջ շատ ընդհանրություններ ենք տեսնում:
- Երկրորդ նախագահն ունի իր արժանի տեղը մեր նորանկախ պետության մեջ: Տասը տարի շարունակ ապահովել է մեր երկրի անվտանգությունը, սահմանների պաշտպանությունը, երկրի զարգացման դինամիկան: Ես կցանկանայի, որ նրա ասածները, խոսքը ընդունեինք` որպես քաղաքական պետական գործչի խոսքեր, ով իրավունք ունի այն անելու: Իսկ թե որքանով են դրանք համընկնում ԲՀԿ-ի ասածների հետ, եւ թե հետո ԲՀԿ-ն որքան է ոգեւորվում եւ դրա վրա կառուցում իր խոսքը, սա այլ բան է: Ես համենայնդեպս ուղիղ կապ չեմ տեսնում: Ամեն դեպքում, մենք պետք է արժանվույնը մատուցենք ՀՀ երկրորդ նախագահին` իր պաշտոնավարման տարիներին Հայաստանի Հանրապետության ձեռքբերումների համար:

ԱՐՄԵՆՈՒՀԻ ՀԱԿՈԲՅԱՆ