"ՆԿԱՏՈՒՄ ԵՄ ՌՈՒՍԱՍՏԱՆԻ ԱԶԴԵՑՈՒԹՅՈՒՆԸ ՀԱՅԱՍՏԱՆԻ ԹԱՏՐՈՆԻ ՎՐԱ"

"ՆԿԱՏՈՒՄ ԵՄ ՌՈՒՍԱՍՏԱՆԻ ԱԶԴԵՑՈՒԹՅՈՒՆԸ ՀԱՅԱՍՏԱՆԻ ԹԱՏՐՈՆԻ ՎՐԱ"

Նոյեմբերի 17-ից Հայաստանում մեկնարկած Թատրոնի միջազգային ինստիտուտի (ՅՈՒՆԵՍԿՈ) 34-րդ համաշխարհային կոնգրեսը` "Նոր ձայներ, նոր հանդիսատես. ժամանակն է երկխոսության" կարգախոսով ավարտվեց նոյեմբերի 22-ին` Հ. Պարոնյանի անվան երաժշտական կոմեդիայի թատրոնում "Կարինե" օպերետով: Հանդիսավոր փակմանը Թատրոնի միջազգային ինստիտուտի գլխավոր տնօրենի կողմից կոնգրեսի որոշ մասնակիցներին հանձնվեցին հավաստագրեր:
Հայաստանում եղած 6 օրերի ընթացքում աշխարհի տարբեր երկրներից Հայաստան ժամանած Թատրոնի միջազգային ինստիտուտի անդամները` շուրջ 300 պատվիրակ, կոնգրեսի ընթացքում հնարավորություն ունեցան երեկոյան ժամերին իրենց ընտրությամբ դիտելու հայ թատրոնների ներկայացումները, ինչպես նաեւ ծանոթացան Հայաստանի թատերական գործիչների հետ: Այդ 6 օրերին կայացած կոնգրեսի ընթացքում Թատրոնի միջազգային ինստիտուտի նոր նախագահ ընտրվեց Միացյալ Արաբական Էմիրությունների Ֆուջեիրա քաղաքի քաղաքապետ Մուհամադ Ալ Աֆկամը: Միջազգային ինստիտուտի դեսպան ընտրվեց վրաց հայտնի ռեժիսոր Ռոբերտ Ստուրուան, իսկ ՀԹԳՄ նախագահ Հակոբ Ղազանչյանն ընտրվեց դրամատիկ ֆորումի նախագահ:

"ՀԱՅԱՍՏԱՆԻ ԹԱՏՐՈՆՈՒՄ ԵՍ ՀՈԳԻ ԵՄ ՏԵՍՆՈՒՄ"

Թատրոնի միջազգային ինստիտուտի գլխավոր տնօրեն ԹՈԲԻԱՍ ԲԻԱՆԿՈՆԵՆ, ով առաջին անգամ չէր Հայաստանում, "Իրավունքին" ասաց, որ շատ է սիրում հայերին ու Հայաստանը, հատկապես հիացած է հայերի հյուրասիրությամբ ու ջերմությամբ, ինչը չի խանգարի իրեն հաճախակի գալ Հայաստան: Ի դեպ, կոնգրեսից առաջ լրագրողների հետ հանդիպմանը Թոբիաս Բիանկոնեն ասաց, որ թեեւ նախատեսված էր այցելություն Ադրբեջան, սակայն կազմակերպության գլխավոր խորհուրդը որոշել է այցելել Հայաստան եւ հենց այստեղ անցկացնել թատրոնի 34-րդ համաշխարհային կոնգրեսը, քանի որ Հայաստանում կա խոսքի ազատություն, թատրոնի մեծ սիրտ. "Ինձ համար մեծ երջանկություն է լինել Հայաստանում, այստեղ մենք արժանացել ենք լավ հյուրընկալության, գտել ենք ընկերներ: Իսկ Բաքվում շատ խնդիրներ չէին լուծվելու, բայց Հայաստանում Մշակույթի նախարարությունը դրանք լուծեց մեկ օրում: Պիտի ասեմ, որ Հայաստանի թատրոնում ես հոգի եմ տեսնում":

ՉԻ ՎԱԽԵՆՈՒՄ ՀԱՅՏՆՎԵԼ ԲԱՔՎԻ "ՍԵՎ ՑՈՒՑԱԿՈՒՄ"

"Իրավունքը" հենց այս թեմայի շուրջ էլ շտապեց սկսել զրույցը.
- Պարոն Թոբիաս, ասացիք, որ Բաքվի փոխարեն նախընտրել եք գալ Հայաստան, քանի որ Բաքվում շատ խնդիրներ լուծում չէին ստանա: Վախ չունե՞ք, որ կհայտնվեք Բաքվի "սեւ ցուցակում":
- Ոչ, ես այդպես չեմ կարծում, քանի որ թատրոնի մարդիկ ցանկացած տեղ տարբերվում են բոլորից: Ես ընկերներ ունեմ նաեւ Ադրբեջանում եւ հարգում եմ ե՛ւ հայերին, ե՛ւ Ադրբեջանցիներին:

"ԲՈԼՈՐԸ ԽՈՍՈՒՄ ԵՆ ՀԱՅԿԱԿԱՆ ԹԱՏՐՈՆԻ ՄԱՍԻՆ"

-Լավ, իսկ ի՞նչ տեսաք այս օրերի ընթացքում Հայաստանում:
- Առաջնայինը շատ ներկայացումներն էին` մնջախաղ, պար, երգ եւ այլն: Ինչպես նաեւ ծանոթացանք հայ մշակույթին: Երկրորդ իրադարձությունը շփումն էր` իմ, ձեր եւ մյուսների հետ, ինչի շնորհիվ ծանոթացա շատ հայերի հետ ու ընկերներ ձեռք բերեցի: Շատ եմ սիրում հայերին, դուք ամեն ինչով տարբեր եք, ունեք ձեր մշակույթը եւ տարբերվում եք աշխարհի բոլոր մնացած մարդկանցից: Եվ երրորդ կարեւոր բանը, որ տեղի ունեցավ, դա Թատրոնի միջազգային ինստիտուտի գլխավոր խորհրդի նիստերն էին. այդ ընթացքում ընտրեցինք գլխավոր խորհրդի նոր անդամներին, նոր ծրագրեր մշակվեցին:
- Այս օրերին ծանոթացաք գրեթե բոլոր հայկական թատրոններին` դիտեցիք շատ ներկայացումներ, ի՞նչ հեռանկար եք տեսնում հայկական թատրոնում:
- Ես նկատեցի, որ դուք ունեք լավ դերասաններ, լավ ներկայացումներ, եւ ամենակարեւորը` ունեք լավ դպրոց: Դա կապում եմ Ռուսաստանի հետ, քանի որ բոլորս էլ գիտենք, որ ռուսական թատրոնը եւ թատերական կրթությունը շատ որակյալ է: Հայաստանում էլ նկատում եմ Ռուսաստանի ազդեցությունը Հայաստանի թատրոնի վրա: Իսկ երբ գնում ենք ռուսական թատրոն, բոլորը խոսում են հայկական թատրոնի մասին:

"ՀԱՅԱՍՏԱՆԸ ԿՇԱՐՈՒՆԱԿԻ ՄՆԱԼ
ԹԱՏՐՈՆԻ ՄԻՋԱԶԳԱՅԻՆ ԻՆՍՏԻՏՈՒՏՈՒՄ"

-Ի՞նչ պլաններ կան` Թատրոնի միջազգային ինստիտուտի հետ կապված:
- Այժմ մեր գրասենյակը Փարիզից տեղափոխվում է Շանհայ, ինչը շատ մեծ փոփոխություն է: Որից հետո մենք կպատրաստվենք արդեն հաջորդ կոնգրեսին, որը տեղի կունենա Բրազիլիայում` երկու տարի անց:
- Իսկ հնարավո՞ր է, որ առաջիկա տարիներին Թատրոնի միջազգային ինստիտուտի կոնգրեսը որոշեք կրկին Հայաստանում անցկացնել:
- Հնարավոր է, որ այդպիսի բան լինի, բայց ոչ իմ կյանքի ընթացքում, քանի որ մենք ամեն անգամ մեր կոնգրեսի անցկացման համար նոր տեղեր ենք ընտրում, նոր մայրցամաքներ, նոր տարածաշրջաններ: Հայաստանը կշարունակի մնալ Թատրոնի միջազգային ինստիտուտում, քանի որ շատ հայեր կան ինստիտուտի կոմիտեներում, ինչպես նաեւ այս տարի Հակոբ Ղազանչյանն ընտրվեց եւ ղեկավարում է դրամատիկ թատրոնի կոմիտեն: Մի բան էլ` աշխարհում, որտեղ էլ գնաք, միեւնույնն է, կգտնեք հայերի:
- Եվ դա լա՞վ է:
- Այո, դրական մարդիկ իհարկե միշտ ցանկալի են:

"ԱՆՊԱՅՄԱՆ ԴԵՌ ԿԳԱՄ ՀԱՅԱՍՏԱՆ, ԲԱՅՑ ԼԱՎ ԵՂԱՆԱԿՆԵՐԻՆ"

-Դուք առաջին անգամ չէ, որ Հայաստանում եք, այս անգամ ի՞նչ եք տանում ձեզ հետ Հայաստանից:
- Այսօր ես մեքենայով գնացել էի Գառնի, ապա Գեղարդ եւ պիտի ասեմ, որ շատ տպավորված եմ ու անպայման դեռ կգամ Հայաստան` եւս մեկ անգամ վայելելու ձեր հրաշք բնությունն ու տեսարժան վայրերը, սակայն արդեն կաշխատեմ ավելի լավ եղանակներին լինել Հայաստանում:

Զրույցը` ԼԻԼԻԹ ԵՂԻԱԶԱՐՅԱՆԻ