"ԱԼԻԵՎԸ ԵՐԲԵՔ ՉԻ ԵՂԵԼ ՆԱԽԱՆՁԵԼԻ ԻՐԱՎԻՃԱԿՈՒՄ"

"ԱԼԻԵՎԸ ԵՐԲԵՔ ՉԻ ԵՂԵԼ
ՆԱԽԱՆՁԵԼԻ ԻՐԱՎԻՃԱԿՈՒՄ"

Օրեր առաջ ԼՂՀ հատուկ ստորաբաժանումների իրականացրած օպերացիայի արդյունքում տարհանվեցին Ադրբեջանի կողմից խոցված հայկական ուղղաթիռի անձնակազմից մեկի դին, երկու օդաչուների մասունքները եւ ուղղաթիռի որոշ անհրաժեշտ մասեր: Այսօր զոհված օդաչուների աճյունները Սուրբ Սարգիս եկեղեցուց կտեղափոխվեն "Եռաբլուր" զինվորական պանթեոն: Թե ինչու դիվանագիտական քայլերով չկարողացանք հասնել նրան, որ Ադրբեջանն ինքնակամ վերադարձներ մեր օդաչուների աճյունները, հատկապես որ կային միջազգային կառույցների միջնորդություններ, "Իրավունքը" պարզեց ՀՀ արտաքին գործերի փոխնախարար ՇԱՎԱՐՇ ՔՈՉԱՐՅԱՆԻՑ.
-Շատ ակնհայտ է` Ադրբեջանի (արդեն նույնիսկ դժվարանում եմ ձեւակերպում գտնել), կարելի է ասել, դեստրուկտիվ քաղաքականության պատճառով: Այսինքն` սա այն դեպքն է, որ ուղղակի ակնհայտ էր, որ եթե կար Կարմիր խաչ, եռանախագահներ, միջնորդներ` չկարողացան դա իրականացնել, ապա, բնական է, որ հայկական կողմերից մեկը` Լեռնային Ղարաբաղը, պետք է ինքնուրույն գործեր ու լուծեր խնդիրը:
- Ըստ Ձեզ, հայկական կողմի իրականացրած փայլուն օպերացիայից հետո, ինչպիսի՞ իրավիճակում հայտնվեց Ադրբեջանի նախագահ Իլհամ Ալիեւը:
- Դա արդեն իր խնդիրն է, կարծում եմ` Ալիեւը երբեք չի եղել նախանձելի իրավիճակում ու հիմա էլ նախանձելի իրավիճակում չէ:
- Պարոն Քոչարյան, ըստ էության, մեկ ուղղաթիռ խոցելով` Ադրբեջանը ռազմական նպատակներ չէր հետապնդում, իսկ քաղաքական առումով, ասենք, ընդդեմ ՀՀ ԵՏՄ անդամակցման, ո՞րն էր հայկական ուղղաթիռ ոչնչացնելու ադրբեջանական շահը:
- Ադրբեջանը միշտ էլ այդպես անտրամաբանական է գործել: Այնպես որ, պետք չէ կապել ինչ-որ քաղաքական գործընթացի հետ: Երբ Ռամիլ Սաֆարովը իր անմարդկային արարքը կատարեց (կացնահարել է հայ սպային-խմբ.), խնդիրն այն չէր, որ ինչ-որ քաղաքական վնաս հասցնի, այլ, ցավոք սրտի, դա նրանց էությունն է:

ՀՐԱՆՏ ՍԱՐԱՖՅԱՆ