"ՆԱԽԿԻՆ ՆԱԽԱԳԱՀՆԵՐԸ ՎԱՐՈՒՄ ԷԻՆ ՋԱՅԼԱՄԻ ՔԱՂԱՔԱԿԱՆՈՒԹՅՈՒՆ". ԱՐԱՄ ՍԱՐԳՍՅԱՆԸ` ԴԵԿՏԵՄԲԵՐԻ 1-Ի ՈՐՈՇՄԱՆ ՄԱՍԻՆ

Արխիվ 12-16 25 Նոյեմբեր, 2014 17:10

"ՆԱԽԿԻՆ ՆԱԽԱԳԱՀՆԵՐԸ ՎԱՐՈՒՄ ԷԻՆ ՋԱՅԼԱՄԻ ՔԱՂԱՔԱԿԱՆՈՒԹՅՈՒՆ".
ԱՐԱՄ ՍԱՐԳՍՅԱՆԸ` ԴԵԿՏԵՄԲԵՐԻ 1-Ի ՈՐՈՇՄԱՆ ՄԱՍԻՆ

1989 թ. դեկտեմբերի 1-ին կայացվեց Խորհրդային Հայաստանի եւ Լեռնային Ղարաբաղի վերամիավորման մասին որոշում: ՀԴԿ ղեկավար ԱՐԱՄ ԳԱՍՊԱՐԻ ՍԱՐԳՍՅԱՆՆ "Իրավունքի" հետ զրույցում 25 տարի անց հետադարձ հայացքով անդրադառնալով այդ որոշմանը` հայտարարեց, որ այդ որոշումը, ըստ էության, մեր ցանկության` հայրենիքը միասնական տեսնելու իրականացումն էր: "Այն ժամանակ այդ որոշումն ուներ կարեւոր նշանակություն: Եթե մենք առաջնորդվեինք վերամիավորման ճանապարհով, այսօր իրավիճակն անհամեմատ հեշտ կլիներ: Միեւնույնն է, պատերազմը լինելու էր: Կարծում եմ` վերամիավորման ճանապարհն ավելի ճիշտ էր, քան թե այն, որ թող Արցախն անկախ լինի, նոր կորոշենք",- ասաց ՀԴԿ ղեկավարը:
Արամ Սարգսյանի խոսքով` այսօր, ցավոք, դեկտեմբերի 1-ի որոշումը դիվանագիտական հաղթաթուղթ չի կարող լինել. "Չնայած ոչ ոք այդ որոշումը չեղյալ չի հայտարարել, բայց դա չգործող որոշում է, քանի որ ի հայտ եկան իրավական այլ ակտեր. ձեւավորվեց միջազգային ու ԽՍՀՄ-ի իրավական նորմերին համապատասխան ԼՂՀ հանրապետություն: Բացի այդ` այդ որոշումն էլ որպես հաղթաթուղթ այն ժամանակ ճիշտ չօգտագործվեց` իրավական տեսանկյունից հարցը չքննարկվեց, որը մենք համարում ենք մեր կորուստներից մեկը":
ՀԴԿ ղեկավարի կարծիքով` ՀՀ առաջին նախագահ Լեւոն Տեր-Պետրոսյանը` փոխանակ ԼՂ հարցի իրավական ճանապարհը ընտրեր եւ օգտագործեր դեկտեմբերի 1-ի որոշումը, ընտրեց հարցի քաղաքական, պրն Սարգսյանի համոզմամբ, սխալ ճանապարհը. "Ստեղծվեց Մինսկի խումբ, համանախագահներն արդեն իրենց առաջարկներն արեցին: Հնարավոր էր, Ռ.Քոչարյանի օրոք ինչ-որ ձեւով փոխել այդ ձեւաչափը, բայց կար, այսպես ասած, իներցիոն մի քաղաքական գիծ, եւ այդպես էլ շարունակվեց":
Արամ Սարգսյանի խոսքով` հիմնական մեղքն ընկած է նախկին երկու նախագահների վրա, որոնք վարում էին ջայլամի քաղաքականություն, այն է` Ադրբեջանի հետ կռվում է Արցախը, ու ՀՀ-ն դրա հետ իբր կապ չունի:

ՍՈՆԱ ԴԱՎԹՅԱՆ