«ՀԱՅ ՋՐՄՈՒՂԻ» ԱՇԽԱՏԱԿԻՑՆԵՐԸ ԽՈԶԻ ԲՈՒԴ, ԼՈԲԻ ԵՆ ՎԵՐՑՐԵԼ ԳՅՈՒՂԱՑԻՆԵՐԻՑ ՋՐԻ ԿՈՒՏԱԿՎԱԾ ՎԱՐՁԸ ԶՐՈՅԱՑՆԵԼՈ

«ՀԱՅ ՋՐՄՈՒՂԻ» ԱՇԽԱՏԱԿԻՑՆԵՐԸ  ԽՈԶԻ ԲՈՒԴ, ԼՈԲԻ ԵՆ ՎԵՐՑՐԵԼ ԳՅՈՒՂԱՑԻՆԵՐԻՑ ՋՐԻ ԿՈՒՏԱԿՎԱԾ ՎԱՐՁԸ ԶՐՈՅԱՑՆԵԼՈՒ ՀԱՄԱՐ, ՍԱԿԱՅՆ… ՏԵՍԱՆՅՈՒԹ

Արմավիրի մարզի Այգեշատ  գյուղի բնակիչները հայտնվել են  անելանելի վիճակում: Գյուղապետ Ռուբեն Հովսեփյանն «Իրավունքի» հետ զրույցում հայտնեց, որ  «Հայ ջրմուղ կոյուղի»  ՓԲԸ-ը  գրավոր  ծանուցել է   գյուղի բնակիչների մեծամասնությանը վճարել  ամիսներով, նույնիսկ տարիներով կուտակված ջրի վարձը, հակառակ դեպքում  բնակիչները դատարանի հետ գործ կունենան:  Գումարները, ըստ գյուղապետի, մեծ  չափերին են հասնում. 100.000-ից մինչեւ 500.000 դրամ. «Իմ ձեռքին է  Բաբայան Փիրուզային ուղարկված  ծանուցումը, որտեղ  տիկին Փիրուզան տուգանվել է  500.000 դրամով: Եթե տասը տարի առաջ ունենար անասնագոմ, հիսուն գլուխ անասուն, ջրաչափ, հաստատ 500.000 դրամի մասին խոսք չէր կարող լինել»:

Պրն Հովսեփյանի խոսքով` ինքը յոթ տարի շարունակ  համոզում է  «Հայ ջրմուղ կոյուղի» ՓԲԸ-ին գյուղացիների բնակարաններում ջրաչափ տեղադրել, սակայն ապարդյուն: «Եթե ջրաչափերի տեղադրումից հետո գյուղացիները ջրի վարձը չեն վճարի, թող գան ինձնից տանեն այդ գումարը»,- ասել է գյուղապետը «Հայ ջրմուղ կոյուղի» ՓԲԸ-ի աշխատակիցներին: Ռ.Հովսեփյանի խոսքով` եթե  որոշ գյուղացիներ էլ  ունեն ջրաչափեր, դրանք  թաղված են խոնավության մեջ. «Կնիքները փտում են խոնավությունից, «Հայ ջրմուղի» ներկայացուցիչը գալիս եւ գյուղացուն ասում է` կնիքը պոկել ես, քեզ պետք  է  տուգանենք»:

ՀՀԿ-ական գյուղապետի խոսքով` ջրի վարձի մեծ պարտքերի տակ հայտնված այգեշատցիների մոտ երեսուն տոկոսը երկար տարիներ գյուղում չի բնակվում. «Մարդ կա, որ քսան տարի գյուղում չի բնակվում, բայց տուգանվել է 400.000 դրամով»:

Սակայն սա դեռ ամենը չէ: Գյուղապետի հավաստմամբ Այգեշատում գրեթե ամեն ամիս գալիս է «Հայ ջրմուղի» մի նոր տեսուչ, պահանջում գյուղացիներից ջրի վարձը, բայց այդ պահին կտրոն չի  տրամադրում: Իսկ անվճարունակներին էլ «Հայ ջրմուղի» ներկայացուցիչները «ուրույն» մոտեցում են ցուցաբերում. «Իմ գանձապահ Անահիտից տասը կգ լոբի են պահանջել տուգանքը զրոյացնելու համար, սակայն եղել է հակառակը, տուգանքը զրոյանալու փոխարեն ավելացել է: Դեպքեր են եղել, որ անգամ խոզի բուդ, պոմիդոր, վարունգ, բադրիջան են պահանջել»:

Ի դպ, այգեշատցիներին, այսպես ասած, վախեցնելու համար բնակիչներից մեկի գործը Ռ. Հովսեփյանի տեղեկացմամբ «Հայ ջրմուղն» ուղարկել է  դատարան:

«Հայ ջրմուղ» կոյուղի» ՓԲԸ-ից դժգոհություններն այսքանով չեն սահմանափակվում. այդ ընկերության անգործության պատճառով քանդվում է Այգեշատի  դպրոցի հիմքը, իսկ  մի քանի  փողոցներ ջրակոլոլ վիճակում են գետնի տակ գտնվող խողովակների պայթելու պատճառով:

«Իրավունքը» զրուցեց նաեւ  «Հայ ջրմուղ կոյուղի» ՓԲԸ-ի մամլո քարտուղար Ալեքսանդր Օհանյանի հետ: Վերջինիս խոսքով` «Հայ ջրմուղ կոյուղի» ՓԲԸ-ն ոչինչ չի կարող անել, եթե գյուղացիները  օգտագործել են ջուրն ու դրա դիմաց չեն վճարել: «Օրենքով   բնակիչը պարտավոր է ունենալ ջրաչափ, իսկ  եթե չունի,  ջրի վարձը հաշվարկվում  է խողովակի կտրվածքով»,-մանրամասնեց  մամլո քարտուղարը:

Ինչ վերաբերում է գյուղապետի այն պնդումներին, թե  տուգանվածների երեսուն տոկոսը  գյուղում չի բնակվում, Ալեքսանդր Օհանյանի խոսքով` էդպիսի բան հնարավոր չէ. «Միգուցե հին պարտքն է: Շատ հնարավոր է` տուգանվածները տարիներ առաջ ապրել են Այգեշատում, ջուր են օգտագործել, կամ խախտում են արել, պարտքեր են կուտակել, հետագայում էլ գնացել են, օրինակ, Ռուսաստան: Ինչ վերաբերում է այն բողոքներին, թե գյուղացիները չգիտեն` ինչպիսի ջրաչափ գնեն, դա խնդիր չէ: Նրանք  կարող  են հանգիստ գնալ ջրմուղի իրենց մասնաճյուղ եւ հետաքրքրվել, թե ինչպիսի ջրաչափ պետք է տեղադրեն»:

Անդրադառնալով «Հայ ջրմուղի» որոշ ներկայացուցիչների` գյուղացիներից կաշառք վերցնելու հայտարարությանը, պրն Օհանյանը խնդրեց մեզ փաստ ներկայացնել, ոչ թե մեջբերել գյուղապետի հայտարարությունը: «Փաստեր հրապարակեք, մենք կոշտ ձեւով այդ հարցը կլուծենք»,- վստահեցրեց մամլո քարտուղարը, ապա հորդորեց մեր քաղաքացիներին ոչ մի տեսուչի առձեռն ջրի վարձի գումար չտալ:

«Հայ ջրմուղ կոյուղի» ՓԲԸ-ի կոմեցիոն տնօրեն Վահագն Մանանդյանն էլ մեզ հետ  զրույցում անդրադառնալով Այգեշատի դպրոցի շենքի ու մի քանի փողոցների տակ գտնվող խողովակների պայթելուն ու ջրի արտահոսքին` ասաց, որ այս պահին  այդ գյուղում ներքին ցանց է փոխվում. «Էջմիածնի «Հայ ջրմուղի» շահագործման պետը վաղը կլինի Այգեշատում, կտեսնեն` ինչն է խնդիրը, կզեկուցեն ինձ, ես հանձնարարականներ կտամ: Ներքին ցանցի մոտ ութսուն տոկոսը փոխված է, մի քսան տոկոս բան է մնացել»:

Իսկ գյուղացիների ջրի վարձի  կուտակված պարտքերի  խնդիրը, ըստ պրն Մանանդյանի, «Հայ ջրմուղը» կքննարկի. «Եթե սխալներ են եղել, կուղղենք, իսկ եթե  ճիշտ է հաշվարկը, պետք է վճարեն: Ովքեր չեն կարող միանգամից վճարել, պատրաստ ենք ժամանակացույց կազմել: Ջրաչափեր  չունենալու հետ կապված էլ ասեմ, որ ովքեր ջրաչափ ունեն, հանձնարարել ենք դուրսը դնել, իսկ ովքեր չունեն, մեզ մոտից  կգան ու կտանեն»:

«Իսկ ինչու մինչ  այսօր ջրաչափեր չէր տրամադրվում գյուղացիներին» հարցին ի պատասխան` «Հայ ջրմուղ կոյուղի» ՓԲԸ-ի կոմերցիոն տնօրենի պարզաբանմամբ`ջրաչափերի տրամադրման  որոշում  ու թույլտվություն կառավարությունը վերջերս է կայացրել:

Հ.Գ.Եթե հիմք ընդունենք  2004 թ-ի «խմելու ջրի մատակարարման եվ ջրահեռացման կանոնները, ջրամատակարարման եվ ջրահեռացման պայմանագրերի օրինակելի ձեվերը, ջրամատակարարման եվ ջրահեռացման համակարգերին միացման տեխնիկական պայմանների սահմանման կարգը հաստատելու եվ հայաստանի հանրապետության կառավարության 1999 թվականի մարտի 13-ի n 149 որոշումն ուժը կորցրած ճանաչելու մասին N 130  որոշման  4-րդ կետի «բ» ենթակետը (ջրաչափական սարքերը, բացառությամբ բազմաբնակարան շենքերի ներքին ցանցերի մուտքագծերի ջրաչափական սարքերի (որոնց ձեռք են բերվում և սահմանված կարգով տեղադրվում` խմելու ջրի մատակարարման և ջրահեռացման ծառայություններ մատուցող կազմակերպությունների կողմից), ձեռք են բերվում և սահմանված կարգով տեղադրվում բաժանորդների միջոցների հաշվին), ապա հարց է առաջանում` «Հայ ջրմուղը» ո՞ր օրենքով է իր հաշվին բնակիչներին ջրաչափեր տրամադրում, կառավարության այդ ի՞նչ որոշման մասին է խոսքը: Կարծում ենք`այս հարցերն անպատասխան չի թողնի  «Հայ ջրմուղ կոյուղի» ՓԲԸ-ն:

Մանրամասները` տեսանյութերում:

Սոնա Դավթյան