ՀԱՄԱՁԱՅՆԱԳԻՐԸ "ԴԵՊՈՐՏ" ԱՐՎԱԾՆԵՐԻՆ ՉԻ ՎԵՐԱԲԵՐՈՒՄ

ՀԱՄԱՁԱՅՆԱԳԻՐԸ "ԴԵՊՈՐՏ"
ԱՐՎԱԾՆԵՐԻՆ ՉԻ ՎԵՐԱԲԵՐՈՒՄ

"Հայաստանում ներկա պահին կան հաշվառված 924 փախստականների ընտանիքներ, որից վեց հարյուր յոթանասունը Երեւանում են բնակվում, իսկ երկու հարյուր հիսունչորսըª մարզերում: Վերջիններս էլ համարվում են առավել կարիքավորներ: Այսինքն` վերը նշված թվով փախստականների ընտանիքները դեռեւս շարունակում են սպասել իրենց համար ցանկալի, բաղձալի օրվան` ունենալ սեփական տանիք",- մեզ հետ զրույցում ասաց Միգրացիոն ծառայության ղեկավար ԳԱԳԻԿ ԵԳԱՆՅԱՆԸ: Ապա անդրադառնալով միգրացիայի հետ կապված այլ հարցերի` պարոն Եգանյանը ուրախությամբ նշեց.
-Արդեն գործում է ՌԴ-ի եւ ՀՀ-ի միջեւ ստորագրված համաձայնագիը, ըստ որի` Հայաստանի քաղաքացիները Ռուսաստանի տարածք մտնելիս` պետք է հաշվառվեին ոչ թե 7, այլ 30 օրվա ընթացքում: Դա էլ ավելի բարենպաստ եւ հարմարավետ պայմաններ կստեղծի Հայաստանի քաղաքացիների համար: Չնայած պայմանագիրը չի վավերացվել, բայց Ռուսաստանի օրենսդրությունը թույլ է տալիս մինչեւ վավերացնելը ժամանակավորապես այն կիրառել. դա է պատճառը, որ այդ ռեժիմը գործում է:
- Հանրության շրջանում շատ են խոսակցություններն այն մասին, որ այդ համաձայնագրերից շատերը կօգտվեն, որ դառնան ՌԴ քաղաքացի, որն էլ կնպաստի արտագաղթին: Դուք կիսո՞ւմ եք այդ տեսակետը:
- Պետք է առնվազն սպասենք. օրենքը գործելուց հետո միայն դրա մասին կարելի խոսել: Հետոª այդ օրենքը ամենեւին էլ չի նշանակում քաղաքացիություն ընդունել. միգրանտը կարող է այլ երկրում ապրել, բայց այլ երկրի քաղաքացի լինել: Դրա համար ավելի լավ է սպասել մեկ տարի, որպեսզի տեսնենք, այսպես կոչված, դյուրացումը բերել է միգրացիոն հոսքի ավելացմա՞ն, թե՞ միգուցե հակառակը լինի: Հնարավոր է, շատերը կձգտեն ունենալ ՌԴ քաղաքացիություն: Մարդիկ կմտածեն, որ դա իրենց համար շատ խնդիրներ կպարզեցնի` սկսած ՌԴ գնալ-գալուց, վերջացրած տարբեր հարցերի առնչությամբ ռուսական պատկան մարմիններին դիմելով:
- Հայտնի է, որ  արդեն երեսուն հազարից ավել հայ միգրանտ կա, որոնք, այսպես ասած, սեւ ցուցակի մեջ են հայտնվել: Հետաքրքիր է, նրանց համար այդ համաձայնագիրը որեւէ բան սահմանո՞ւմ է:
- Ոչ, դա նրանց վրա չի անդրադառնա, դա ուրիշ հարց է, սա` ուրիշ: ԵՏՄ-ին անդամակցելը անկանոն միգրացիայի խնդիրներին չի անդրադառնում, ԵՏՄ-ի իրավապայմանագրային դաշտում անկանոն միգրացիայի վերաբերյալ որեւէ դրույթ չկա, կա աշխատաքնային միգրացիայի առումով:
- Իսկ նրանց հետ կապված` ինչ-որ քայլեր ձեռնարկվո՞ւմ են, ի՞նչ է լինելու նրանց հետ:
- Դա այդպես դյուրին լուծվող հարց չէ, որովհետեւ այդ մարդիկ խախտել են ՌԴ սահմանված օրենսդրությունը եւ դրա պատճառով են հայտնվել անցանկալի մարդկանց ցուցակում: Տեսեք, օրինակ, եթե ասենք ԱՄՆ-ում կամ Ֆրանսիայում մարդիկ օրենք են խախտում, ի՞նչ կարող են անել. ոչինչ, չէ՞, որովհետեւ օրենք են խախտել: Բայց ի տարբերություն ԱՄՆ-ի եւ Ֆրանսիայի, Ռուսաստանը թույլ է տալիս նման մարդկանց անհատական դիմեն իրենց` փաստաթղթերի վերանայման համար, եւ եթե հիմքեր տեսնեն, նրանց խնդիրը կլուծվի:
Բայց կան դեպքեր, որոնք հումանիտար մոտեցման տակ կարելի է կիրառել: Օրինակ, եթե ընտանիքի մի մասը մնացել է այնտեղ: Կամ, ասենք, կա ուսման հարց. բուհում պետք է շարունակեն ուսումը, բուժման հետ կապված հարց, տարեց մարդու խնամքի հարց: Նմանատիպ դեպքերը քննության են առնվում եւ, որպես կանոն, դրական լուծում ստանում:

ԻԼՈՆԱ ԱԶԱՐՅԱՆ