ԳՅՈՒՂԱՊԵՏԸ "Ի ՇԱՀ ԺՈՂՈՎՐԴԻ՞" Է ԲԱԺՆԵՏԵՐ ԴԱՐՁԵԼ

ԳՅՈՒՂԱՊԵՏԸ "Ի ՇԱՀ ԺՈՂՈՎՐԴԻ՞" Է
ԲԱԺՆԵՏԵՐ ԴԱՐՁԵԼ

Սյունիքի մարզի Դաստակերտ համայնքի ղեկավարի կողմից պաշտոնական լիազորությունները չարաշահելու փաստի առթիվ հարուցված քրեական գործի շրջանակներում մեղադրանք է առաջադրվել համայնքի ղեկավար ՆԱԻՐԻ ՖԻԼՈՍՅԱՆԻՆ:
ստ դատախազության. "Դաստակերտ համայնքում հէկ կառուցելու նպատակով հողատարածք տրամադրելու, շինարարական աշխատանքներում աջակցելու, շահագործման ընթացքում հէկ-ի աշխատանքները վերահսկելու դիմաց Ֆիլոսյանը, ընկերության հիմնադիր-մասնակիցների հետ նախնական պայմանավորվածությամբ, նշված ընկերությունից բաժնեմաս է ձեռք բերել եւ դարձել ընկերության մասնակից: Բացի այդ, օգտվելով համայնքի ղեկավարի իր լիազորություններից եւ, ըստ էության, արդեն անցնելով հանցավոր պայմանավորվածության կատարմանը, Ֆիլոսյանը Դաստակերտ համայնքին սեփականության իրավունքով պատկանող 2000 քմ հողատարածքն ուղղակի վաճառքով օտարել է այն ընկերությանը, որի բաժնետեր է նաեւ ինքը: Ֆիլոսյանը որեւէ կերպ չի փորձել կանխել կամ կասեցնել իր վաճառած հողատարածքում կատարվող հէկ-ի ինքնակամ շինարությունը...": Մեզ հետ զրույցում Ն. Ֆիլոսյանը, մեղմ ասած, տարօրինակ պատասխան տվեց.
- Մի մարդ, որ սրտացավ է լինում համայնքի համար, էդպես է լինում, էլի:
- Այսինքն` ընդունո՞ւմ եք Ձեզ առաջադրված մեղադրանքը:
- Ընդհանուր առմամբ, որպես համայնքի շահերի մասին մտածող, մեղավոր չեմ, բայց օրենքով որոշակի չափով մեղավոր եմ: Այսինքն, որ շինարարությունը չեմ կանխել: Թե չէ բաժնետոմս եմ ձեռք բերել, թե ինչ եմ արել, դա հաստատ որեւէ մեկին չի վնասել, ընդհակառակը եղել է ի օգուտ համայնքի: Այսինքն, եթե համայնքապետը մի գրամ ավել փող ունենա, հաստատ կես լուման համայնքի վրա է ծախսելու, եթե իհարկե սրտացավ համայնքապետ է:
- Ձեզ մեղադրում են պաշտոնական լիրազորությունները չարաշահելու մեջ, դա համայնքի  նկատմամբ սրտացավության հետեւա՞նք եք համարում:
- Շինարարության հետեւանքով ոչ մի գյուղացի չի տուժել, ոչ էլ, առավել եւս, համայնքը: Էդ էական վնասն էլ իրականում էական օգուտ է եղել: Այսինքնª ապօրինի կառույցը գնահատվել է ավագանու կողմից, որի հետեւանքով համայնքի բյուջե փող է մտել: Դրանից բացի, համայնքում կամուրջ կար, որը փլվել էր. էդ կազմակերպությունը վերանորոգել է: Օրենքով, հա, հասկանում եմ, որ համայնքի ղեկավարը պարտավոր էր շինարարությունը դադարեցնել, բայց ժողովրդի վիճակը վատ էր, ու իրենք էդ շինարարության վրա` աշխատելով հացի փող են վաստակել: Համայնքի ղեկավարը անձնական շահից չի գնացել դրան: Եթե մի տեղ էլ աչքս փակել եմ, դա արել եմ` ի շահ ժողովրդի: Էդ համայնքի ղեկավարը` տեսնելով իր համայնքի բնակիչների վիճակը, որ մարդը էսօր երեք հազար դրամ գումար է աշխատում, մյուս օրը կարա մի պարկ ալյուր գնի` իր ընտանիքը պահի: Դա համայնքի ղեկավարի համար շատ ավելին է եղել, քան թե իր ութ տոկոս բաժնեմասը:

ԻԼՈՆԱ ԱԶԱՐՅԱՆ