"ՀԱՅԱՍՏԱՆՆ ՈՒ ԿԻՊՐՈՍԸ ՈՒԺԵՂ ԵՆ ԻՐԵՆՑ ԿԱՄՔՈՎ ԵՎ ՓՈՐՁՈՒԹՅՈՒՆՆԵՐՈՎ"

"ՀԱՅԱՍՏԱՆՆ ՈՒ ԿԻՊՐՈՍԸ ՈՒԺԵՂ ԵՆ ԻՐԵՆՑ ԿԱՄՔՈՎ ԵՎ ՓՈՐՁՈՒԹՅՈՒՆՆԵՐՈՎ"

ՀՀ ԱԺ նախագահ Գալուստ Սահակյանը եւ Կիպրոսի Ներկայացուցիչների պալատի նախագահ Յանակիս Օմիրուն երեկ տեղի ունեցած համատեղ ասուլիսի ընթացքում ամփոփեցին Կիպրոսի պատվիրակության այցը Հայաստան: Պարոն Օմիրուն իր խոսքում նշեց, որ Կիպրոսը 40 տարի է գտնվում է շրջափակման մեջ Թուրքիայի կողմից, եւ իրենք այսօր վճռական են տրամադրված` Հայաստանի հետ համատեղ շարունակել պայքարը: Իսկ թե որո՞նք են լինելու պայքարի հայ-կիպրական մեխանիզմները, "Իրավունքը" հետաքրքրվեց բանախոսներից, հատկապես, որ հայ-թուրքական սահմանի բացման հարցը նույնպես փակուղում է գտնվում: Ըստ ՅԱՆԱԿԻՍ ՕՄԻՐՈՒԻ. "Մենք պետք է համակարգենք մեր երկրները եւ ազգային ժողովները, որպեսզի Թուրքիան սկսի հարգել միջազգային օրենքը եւ բանաձեւերը, որոնք ընդունվել են ՄԱԿ-ի, ինչպես նաեւ տարածաշրջանային կազմակերպությունների կողմից: Ուզում եմ նշել, որ այս այցի շրջանակներում համաձայնության եկանք պարոն նախագահի, ինչպես նաեւ միջխորհրդարանական հանձնաժողովի հետ` ընդհանուր քայլեր ձեռնարկելով տարբեր միջխորհրդարանական կազմակերպություններում, ինչպես եվրոպական, այնպես էլ այլ, որպեսզի խորհրդարանական դիվանագիտության շրջանակներում կարողանանք իրականացնել մեր ընդհանուր ազգային խնդիրների լուծումը": Իսկ ԱԺ նախագահ ԳԱԼՈՒՍՏ ՍԱՀԱԿՅԱՆՆ անդրադառնալով վերոնշյալ հարցին` հավելեց. "1974 թվականին թուրքերն իրենց բարբարոսական ներխուժումով, Կիպրոսի տարածքի մի որոշակի մաս, գրավեցին եւ մինչեւ այսօր պայքարում են իրենց տարածքների համար: Այս այցը դեռեւս պետք է 20-25 օր առաջ լիներ, բայց քանի որ այդ ներխուժման վտանգը կար, դրա համար այցը հետաձգվեց: Կիպրոսի նախագահը ՀՀ խորհրդարանում երբ ելույթ ունեցավ, մասնավորապես նշեց, որ դեռեւս Կիպրոսը եւ Հայաստանը համարվում են, որ ուժեղ պետություններ չեն, բայց ուժեղ են իրենց կամքով եւ փորձություններով: Եվ թուրքական դիվանագիտության եւ Թուրքիայի մոտեցումների առումով` երկու երկրների փոխհարաբերությունները համատեղվում են: Այս հանդիպումը մեծ արդյունք կունենա, քանի որ քննարկման շրջանակները շատ մեծ էին: Միջազգային հարթակներում երկու երկրների ներկայացուցիչներն այն հարցերին, որոնք վերաբերում են Կիպրոսին եւ մեզ` կապված տարածաշրջանների խնդիրներին, մեկս մյուսին սատարելու ենք":

ՀՐԱՆՏ ՍԱՐԱՖՅԱՆ