ՀՐԱՆՏ ԲԱԳՐԱՏՅԱՆԸ "ԵՌՅԱԿԻ" ՄԱՍԻՆ Ո՛Չ ԹԱՑ, Ո՛Չ ՉՈՐ

ՀՐԱՆՏ ԲԱԳՐԱՏՅԱՆԸ "ԵՌՅԱԿԻ" ՄԱՍԻՆ Ո՛Չ ԹԱՑ, Ո՛Չ ՉՈՐ

Այս շաբաթ խորհրդարանն ավարտեց արտահերթ նիստերի աշխատանքը` դեռեւս անավարտ թողնելով ներքաղաքական մի շարք հարցեր: Ոչ իշխանական "եռյակը" այդպես էլ չհստակեցրեց իր քայլերի հաջորդականությունը` միայն բղավելով համազգային շտաբների ձեւավորման մասին, իսկ մյուս կողմից` կամաց-կամաց նոր ծիլեր են տալիս "եռյակից" դուրս կազմավորվող այլ քաղաքական "դուետներն" ու "տրիոները": Հենց ներքաղաքական մի շարք հարցերի շուրջ էլ "Իրավունքը" զրուցեց ԱԺ ՀԱԿ խմբակցության պատգամավոր, "Ազատություն" կուսակցության նախագահ ՀՐԱՆՏ ԲԱԳՐԱՏՅԱՆԻ հետ` նրանից ստանալով մեծամասամբ բլից պատասխաններ:
-Պարոն Բագրատյան, "Ազատություն" կուսակցությունն այդպես էլ չմիացավ ոչ իշխանական "քառյակին", ոչ էլ` "եռյակին", ինչո՞ւ:
- Մենք ունենք մեր մարտավարությունը: Այդ մարտավարությամբ` այս փուլում որեւէ դաշինքի անդամագրվելու խնդիր չենք դնում:
- Վերջին շրջանում լայնորեն քննարկվում է ԱԺ ՀԱԿ խմբակցության պատգամավոր Նիկոլ Փաշինյանի նախաձեռնած "Քաղաքացիական պայմանագիր" կոչվող ուժի մասին, որին մտադիր են միանալ մի քանի կուսակցություններ ու պատգամավորներ (օրինակ` Զարուհի Փոստանջյանը), հնարավո՞ր է, որ "Ազատություն" կուսակցությունը որոշի համալրել այս ուժի շարքերը:
- Ոչ: Մենք ինչո՞ւ պիտի մտնենք այլ կուսակցության մեջ: Համագործակցել` ինչքան ուզեք:
- Ոչ իշխանական "եռյակի" վերջին հանրահավաքի ժամանակ ԲՀԿ առաջնորդը խոսեց իշխանափոխության մասին, եւ նմանատիպ հայտարարություններ շարունակում են անընդհատ անել գրեթե բոլոր ԲՀԿ-ականները: Ըստ Ձեզ, արդյո՞ք սա նշանակում է, որ "Բարգավաճ Հայաստանն" այլեւս ընդդիմություն կդառնա:
- Հավանականություն կա: Տեսնենք: Ընդդիմություն դառնալու համար օրենքը պահանջում է համապատասխան հայտարարություն:
- ՀԱԿԿ առաջնորդ Լեւոն Տեր-Պետրոսյանն իր ելույթում ասել էր, որ ԵՏՄ անդամակցման շուրջ ջղաձգումներն ավելորդ են: Որքանո՞վ է սա ընդունելի հայտարարություն Ձեզ համար:
- Իմ կարծիքով` ԵՏՄ-ին անդամակցելը պետք է լինի հանրաքվեի միջոցով: Այդտեղ ինքնիշխանության խնդիր կա, ինչը նշանակում է, որ պարտադիր կարգով հանրաքվեի խնդիր կա:
- Շուտով խորհրդարանում կքննարկվի Հայաստանի Հանրապետության` ԵՏՄ անդամակցման հարցը: Հնարավո՞ր է, որ լինեն ֆորսմաժորային իրավիճակներ, ասենք, հայկական մայդանի տեսքով:
- Չգիտեմ:
- ՀՀ ԵՏՄ անդամակցման հարցում "եռյակը" միասնական տեսակետ չունի: Այս դեպքում որքանո՞վ եք իրատեսական համարում, որ նույն "եռյակը" իշխանափոխություն իրականացնելու հարցում միասնական կարող է լինել:
- Դա նորմալ է: Իշխանափոխությունը նրանց միավորում է, դրա համար էլ այն առկա է օրակարգում: Ցանկացած ուրիշ հարց ավելի շատ բաժանարար գիծ է լինելու եւ խանգարելու է պայքարին:
- Իսկ կկարողանա՞ "եռյակը" իր միտինգային ելույթներով համախմբել հասարակությանը, երբ նույն "եռյակի" անդամ կուսակցության անվան հետ կապվում էին ե՛ւ ընտրակեղծիքներ իրականացնելը, ե՛ւ մարտի 1-ի դեպքերը…
- Չեմ կարող ասել: Ըստ իս, մեկը մյուսի հետ կապ չունի: Եթե հասարակությունը բարելավում չի տեսնում, նա ոտքի է կանգնում:
- Ինչպե՞ս եք վերաբերվում "եռյակի" այն ծրագրին, որ մարզերում պետք է բացվեն իշխանափոխության շտաբներ:
- Դա իրենց գործն է:
- Ի վերջո, ո՞ր ուժն է այսօր իրական ընդդիմությունը, եւ ո՞վ կարող է թելադրող լինել ընդդիմադիր դաշտում:
- Ընդդիմադիր դաշտում տեսնում եմ առնվազն 4 ուժ:
- Որոշ ուժեր, կարծես թե, վաղաժամ սկսել են ընտրություններին պատրաստվել, այս մրցապայքարում որո՞նք են լինելու Ձեր առաջիկա քայլերը:
- Մենք հապշտապ քայլերի կողմնակից չենք:
- Ամփոփելով զրույցը` ըստ Ձեզ, ներքաղաքական ինչպիսի՞ իրավիճակ է սպասվում ձմռանը, քանի որ այնքան էլ թեժ չէր քաղաքական աշունը:
- Հիմա օրակարգում սկսելու են գերակշռել արտաքին հարցերը. տնտեսական վիճակը` կապված ՌԴ-ի հետ, եւ իրավիճակը շփման գծում:

ՀՐԱՆՏ ՍԱՐԱՖՅԱՆ