ՀՐԱՉ ՔԵՇԻՇՅԱՆԻ THANK YOU, DAD ՖԻԼՄՆ ԱՐԺԱՆԱՑԵԼ Է "ՈՍԿԵ ՆՈՒՌ" ՄՐՑԱՆԱԿԻ
Օրերս Տորոնտոյում անցկացվող "Նուռ" կինոփառատոնում ռեժիսոր ՀՐԱՉ ՔԵՇԻՇՅԱՆԻ Thank You, Dad գեղարվեստական ֆիլմն արժանացել է փառատոնի գլխավոր` ՈՍԿԵ ՆՈՒՌ մրցանակին: Ռեժիսորը շնորհավորելով ֆիլմի ողջ անձնակազմին, շնորհակալություն է հայտնել փառատոնի կազմակերպիչներին ու ժյուրիի անդամներին` ֆիլմի ստեղծագործական խմբի աշխատանքը բարձր գնահատելու համար, ապա կիսվել տպավորություններով. "Առաջին անգամ ֆիլմը ցուցադրվեց անգլերեն եւ հայերեն օրիգինալ տարբերակով:
Հիանալի հանդիսատես, որ առաջին րոպեներից միացավ ֆիլմին ու վերապրեց հերոսների հետ ողջ պատմությունը: Ծիծաղն անդադար էր ու լիաթոք: Հետո շատերը խոստովանեցին, որ չեն զսպել նաեւ արցունքները: Ատոմ Էգոյանը գրկեց ու ջերմ խոսքեր ասաց: Հետո մարդիկ երկար չէին հեռանում, խոսում էին` ֆիլմից տպավորված ու Հայաստանը կարոտած: Պարզվեց, որ մի քանի հանդիսատես արդեն երկու անգամ Հայաստանում դիտել էին ֆիլմը, հիմա երրորդն էր, ու սա շատ շոյող է: Երբ ասացի, որ գլխավոր դերակատարուհին հայ չէ, դժվարությամբ էին հավատում, իսկ Միքայել Պողոսյանի մասին հիացական խոսքեր էին հնչում: Մի հարգարժան հայ, ով ճակատագրի բերումով Հայաստանում չի ծնվել ու ապրել, ինձ հարցրեց. "Հայաստանո՞ւմ եք ապրում": Իմ այո-ից հետո, աչքերը լցվեցին ու ասաց` արի ճակատդ համբուրեմ, ավելի լավ գնահատական չկա":
ԼԻԼԻԹ ԵՂԻԱԶԱՐՅԱՆ Հ.Գ. Հրաչ Քեշիշյանի հետ հարցազրույցը կարդացե՛ք տպագիր "Իրավունքի" առաջիկա համարներում:
1
3116 դիտում
2
2469 դիտում
3
2109 դիտում
4
1682 դիտում
5
1576 դիտում
