ՀԵՂԻՆԵ ԲԻՇԱՐՅԱՆԸ`ԲՀԿ-ՕԵԿ ՀԱՎԱՆԱԿԱՆ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

ՀԵՂԻՆԵ ԲԻՇԱՐՅԱՆԸ`ԲՀԿ-ՕԵԿ ՀԱՎԱՆԱԿԱՆ

ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Երեկ ԱԺ նախագահ Գալուստ Սահակյանը, հետեւելով ՀՀ վարչապետ Հովիկ Աբրահամյանի այն հայտարարությանը, թե պետք  է կառավարությունից ու ընդդիմությունից թիմ ձեւավորել 12 կետերը քննարկելու համար, հրավիրել էր քննարկման ընդդիմության ներկայացւցիներին: Զարմանալի է, բայց  քննարկմանը ներկա  է եղել նաեւ ՕԵԿ խմբակցության ղեկավար Հեղինե Բիշարյանն այն դեպքում, երբ ՕԵԿ-ը, ըստ էության, մասնակցություն չի ունեցել  12 կետերի ձեւավորմանը: «Իրավունքի» հետ զրույցում ՕԵԿ խմբակցության ղեկավար Հեղինե Բիշարյանն ասաց, որ որպես այդպիսին քննարկում չի եղել: «Պարզապես քննարկվում էր, որ անդրադաևձ կատարվի  այդ 12 կետերին, սակայն նման բան տեղի չունեցավ: Հետագայում քննարկումներ տեղի կունենան, թե ոչ, չեմ կարող ասել, քանի որ  պետք է համագործակցության ձեւաչափը հասկանալ» ,- մանրամասնեց  խմբակցության ղեկավարը:

Տիկին Բիշարյանից հստակեցրինք`ՕԵԿ-ը ոչ մի առաջարկ երեկվա դրությամբ 12 կետերի վերաբերյալ չի ներկայացրել, ՕԵԿ խմբակցության ղեկավարն ասաց, որ ընդհանրապես ոչ մի քաղաքական ուժ ոչինչ չի ներկայացրել: «Պարզապես հավաքվել էին ասելու, որ այդ համագործակցությունը չի կարող տեղի ունենալ եւ տեղի չունեցավ»,- ասաց պատգամավորը:

Ինչ վերաբերում է ԲՀԿ եւ ՕԵԿ առաջնորդների`  օրեր առաջ տեղի ունեցած հանդիպմանը եւ հավանական  համագործակցությանը, Հեղինե Բիշարյանն ասաց, որ ժամանակը կտա այդ հարցերի պատասխանը. «Եկեք ժամանակից առաջ չընկնենք»:

ՕԵԿ խմբակցության քարտուղար Մհեր Շահգելդյանից  պարզեցինք` իրենց համար զարմանալի չէ՞, որ ԱԺ նախագահը քննարկման է հրավիրել նաեւ ՕԵԿ-ին այն դեպքում, երբ նրանք որեւէ մասնակցություն չեն ունեցել 12 կետերի ձեւավորմանը, խմբակցության քարտուղարի խոսքով` այդ 12 կետերից մի շարք կետերը ՕԵԿ-ը ձեւակերպել է որպես օրենսդրական նախաձեռնություն, օրինակ անցում կատարել 100% համամասնական  ընտրակարգին:

Մհեր Շահգելդյանին հիշեցրինք, որ միայն անցում կատարել 100% համամասնական  ընտրակարգին եւ մերժել մեծամասնական ընտրակարգը  հակասահմանադրական է`ըստ ՀՀԿ պատգամավոր Հակոբ Հակոբյանի: Ի պատասխան ՕԵԿ խմբակցության քարտուղարը հայտարարեց, որ  սահմանադրական-հակասահմանադրական լինելը կարող է որոշել միայն Սահմանադրական դատարանը:

Պատգամավորը  հայտարարեց, որ ՕԵԿ-ը կողմ է քննարկումներին, բայց պետք է հասկանալ` դրանց արդյունքներն ինչպիսին են:

Սոնա Դավթյան