ԻՍԿ ՄԵՆՔ ԴԵՌ ՇԱՐՈՒՆԱԿՈՒՄ ԵՆՔ ԲԱՔՎԻ ՄՈՒՂԱՄ ՀԻՇԵՑՆՈՂ ԵՐԳԵՐ ԵՐԳԵԼ

ԻՍԿ ՄԵՆՔ ԴԵՌ ՇԱՐՈՒՆԱԿՈՒՄ ԵՆՔ
ԲԱՔՎԻ ՄՈՒՂԱՄ ՀԻՇԵՑՆՈՂ ԵՐԳԵՐ ԵՐԳԵԼ

Երեկվանից մեկնարկեց եւ մինչեւ նոյեմբերի 22-ը Հայաստանում կընթանա Թատրոնի միջազգային ինստիտուտի (ՅՈՒՆԵՍԿՈ) 34-րդ համաշխարհային կոնգրեսը`"Նոր ձայներ, նոր հանդիսատես. ժամանակն է երկխոսության" կարգախոսով: Նրա անդամները ներկա են աշխարհի բոլոր ծայրերում: Թատրոնի միջազգային ինստիտուտը, համարվելով կատարողական արվեստների խոշորագույն ցանցը աշխարհում, միավորում է ավելի քան 100 երկրների կենտրոններ: Կոնգրեսին Հայաստան են ժամանել մոտ 300 պատվիրակներ` Ասիայից, Եվրոպայից, Լատինական Ամերիկայից եւ Աֆրիկայից:
Ի դեպ, երեկ լրագրողների հետ հանդիպմանը Թատրոնի միջազգային ինստիտուտի նախագահ ԹՈԲԻԱՍ ԲԻԱՆԿՈՆԵՆ նշեց, որ թեեւ նախատեսված էր այցելություն Ադրբեջան, սակայն կազմակերպության գլխավոր խորհուրդը որոշել է այցելել Հայաստան եւ հենց այստեղ անցկացնել թատրոնի 34-րդ համաշխարհային կոնգրեսը, քանի որ Հայաստանում կա խոսքի ազատություն, թատրոնի մեծ սիրտ. "Ինձ համար մեծ երջանկություն է լինել Հայաստանում, այստեղ մենք արժանացել ենք լավ հյուրընկալության, գտել ենք ընկերներ: Իսկ Բաքվում շատ խնդիրներ չէին լուծվելու, բայց Հայաստանում Մշակույթի նախարարությունը դրանք լուծեց մեկ օրում: Պիտի ասեմ, որ Հայաստանի թատրոնում ես հոգի եմ տեսնում":
Թատրոնի միջազգային ինստիտուտի նախագահն ու կազմակերպության գլխավոր խորհուրդը իրենց այս քայլով, կարելի է ասել, երկու ոտքով մտավ հայերիս 80 տոկոսի աչքը, որ Հայաստանը գերադասել են Ադրբեջանից: Բայց ի՞նչ անել այն 20 տոկոսի հետ, երբ սեփական գրպանի պարունակությունը անծայրածիր դարձնելու համար պատրաստ են անգամ Բաքվի մուղամը երգել: Վերջին շրջանում որքան գնում` ավելանում է Բաքվի մուղամ երգել ցանկացողների թիվն ու պահանջարկը, ու օրեցօր հեռուստաեթերի տարբեր երաժշտական տասնյակներում հայտնվում են նման երգեր ու տեսահոլովակներ: Այ այստեղ ակնկալում ենք Կոմպոզիտորների ու երգիչների միության օգնությունը, որ ձեռքներս ծալած նստելու փոխարեն` ժամանակն է անցնենք գործի ու զբաղվենք այս գործով: Այլապես ստիպված կլինենք ամեն օր լսել հերթական ադրբեջանական մեղեդին` ինչպես երաժշտագետ Արմեն Արաբյանն է որակել երգչուհի Սյուզի Մելիքյանի նոր "Տանեմ բերեմ" երգը ու ցավով ասել. "Խոսում ենք խոցված ուղղաթիռի մասին, բայց պարզվում է, որ արվեստը շատ ավելի վաղուց է խոցվել...":

Կույտը մշակեց ԼԻԼԻԹ ԵՂԻԱԶԱՐՅԱՆԸ