«ԵԹԵ ՏԱՆԸ ՆՍՏԵՍ ՈՒ ՈՏՔԴ ՈՏՔԻԴ ԳՑԵՍ, ՄԻ ՏԱՐՎԱ ՄԵՋ ԿՄՈՌԱՆԱՆ ՔԵԶ»

«ԵԹԵ ՏԱՆԸ ՆՍՏԵՍ ՈՒ ՈՏՔԴ ՈՏՔԻԴ ԳՑԵՍ,

ՄԻ ՏԱՐՎԱ ՄԵՋ ԿՄՈՌԱՆԱՆ ՔԵԶ»

Արդեն համացանցում հասանելի է կոմպոզիտոր Առնո Բաբաջանյանի «Սերենադ շեփորի համար» երաժշտության տեսահոլովակը` դուդուկահար, ՀՀ վաստակավոր արտիստ ԿԱՄՈ ՍԵՅՐԱՆՅԱՆԻ մատուցմամբ: Սա Կամոյի այս տարվա երկրորդ տեսահոլովակն է: Իսկ հաջորդ տարի դուդուկահարը խոստանում է գարնանը հանդես գալ մեծ մենահամերգով: Կամոյի խոսքերով` այն կգերազանցի մինչ այս եղած մենահամերգներին, որի ընթացքում անպայման անդրադարձ կլինի նաեւ Ցեղասպանության 100-րդ տարելիցին: «Իրավունքի» հետ զրույցում դուդուկահարը տեղեկացրեց, որ «Սերենադ շեփորի համար» երաժշտությունը ձայնագրել է դեռեւս 2010 թվականին, հնչել է մի քանի անգամ արտասահմանյան համերգների ժամանակ եւ մեկ անգամ Երեւանում` Էրեբունի-Երեւան տոնակատարությանը.

ԹԵ ԻՆՉՊԵՍ ԿԱՄՈ ՍԵՅՐԱՆՅԱՆԸ ՇԵՓՈՐԸ
ՓՈԽԱՐԻՆԵՑ ԴՈՒԴՈՒԿՈՎ

«Առաջին անգամ երգը հնչեց «Տաշիր» մրցանակաբաշխության ժամանակ, որոշեցի, որ Կրեմլի դահլիճում դասական գործ նվագեմ: Ընտրեցի «Սերենադ շեփորի համար» Առնո Բաբաջանյանի գործը, ու շեփորը փոխարինվեց դուդուկով: Ճիշտ է, դուդուկն իր հնարավորություններով փոքրիկ գործիք է` ունի 11 նոտա, բայց ինձ հաջողվեց շեփորը փոխարինել դուդուկով,- պատմեց Կ. Սեյրանյանն ու մանրամասնեց:- Տեսահոլովակը չունի սյուժե եւ նկարահանման ռեժիսոր, կարելի է ասել` ինքս եմ ռեժիսորը: Ի տարբերություն մյուս մեր երգիչ-երաժիշտների, ոչ թե հատուկ տեսահոլովակի նկարահանման համար գնացել եմ Սիդնեյ, Փարիզ, Դուբայ, այլ դրանք նկարահանել եմ համերգային շրջագայությունների ընթացքում: Կարելի է ասել` համատեղել եմ երկուսը` մեկում: Առիթը բաց չեմ թողել ու ձեռքի հետ էլ տեսահոլովակ եմ նկարահանել: Ես էլ այդ ժամանակ կարող էի ընկերներիս հետ ժամանակ անցկացնել, բայց ինձ համար կոնկրետ կարեւոր էր, որ այդ ստեղծագործությունն անպայման ունենար տեսահոլովակ ու նոր ասելիքով ներկայացնեի` կյանք տայի այդ գործին»:

«ԱՅՍ ԳՈՐԾԻ ՄԱՍԻՆ ՏԵՂՅԱԿ Է ՆԱԵՎ
ԲԱԲԱՋԱՆՅԱՆԻ ՈՐԴԻՆ»

Ի դեպ, Կամոյի փոխանցմամբ, Բաբաջանյանի «Սերենադ շեփորի համար» երաժշտությունը դուդուկով փոխարինելու մասին տեղյակ է նաեւ Բաբաջանյանի որդին` Արա Բաբաջանյանը, ով հավանության է արժանացրել գործն ու ողջունել դուդուկահարին:
- Նախ` Առնո Բաբաջանյանը մեր հայ ազգի լավագույն կոմպոզիտորներից է, որն ամբողջ Սովետական Միությանն է զարմացրել: Մեկ տարի առաջ Հայաստանում Կոբզոնի մենահամերգի ժամանակ նվագակցեցի նրան լրիվ այլ գործով: Համերգից հետո` բանկետի ժամանակ, ես նվագեցի Բաբաջանյանի այս գործը: Կոբզոնը, լինելով Բաբաջանյանի ընկերը, ողջունեց ու ասաց. «Ես չէի պատկերացնում, որ դուդուկը կարող է փոխարինել շեփորին»: Այս գործի մասին տեղյակ է նաեւ Բաբաջանյանի որդին` Արան: Այս տարի օգոստոսին մենք հանդիպեցինք Եվրոպայում, նա գործը լսել էր իմ կատարմամբ, շատ սիրեց, բայց տեսահոլովակի մասին դեռ տեղյակ չէ, հուսով եմ, շատ կուրախանա եւ շոյված կզգա իրեն:

«ԿԱՐՈՂ ԷԻ ՏԵՍԱՀՈԼՈՎԱԿԻ ՓՈԽԱՐԵՆ

ՔՅԱԲԱԲ-ԽՈՐՈՎԱԾԻ ՄԱՍԻՆ ԳՈՐԾ ԱՆԵԼ»

-Կամո, այսօրվա սերնդին առավել հայտնի են Բաբաջանյանի էստրադային գործերը, ինչո՞ւ որոշեցիք դասական գործ ընտրել:
- Ժողովրդական երգերի երաժշտությանը հաճախ եմ անդրադառնում: Որպես հայ ազգի երաժիշտ` իմ փոքրիկ շնորհակալությունս ցանկացա այս կերպ արտահայտել Բաբաջանյանին: Ես այն մարդկանցից եմ, որ ուզում եմ մի բան անելիս արվեստ ցույց տալ ու իմ հետեւից եկող սերնդին այդպես կրթեմ: Նույն հաջողությամբ կարող էի այս տեսահոլովակի փոխարեն քյաբաբ-խորովածի մասին գործ անել, որ հետո էլ ինձ կանչեին կնունք-ծնունդ-հարսանիքներին: Այս նույն չարչարանքը, ժամանակն ու ֆինանսը կարող էի ծախսել բիզնեսի համար: Թող մի քանի բան էլ պակաս լինի, բայց կարծում եմ, որ ցանկացած արվեստագետ իրենից հետո ինչ-որ բան պիտի թողնի:
- Սա ձեր այս տարվա երկրորդ տեսահոլովակն էր...
- Այո, առաջինը բավականին մեծ արձագանք ունեցավ թե՛ Հայաստանում, թե՛ արտասահմանում: Սփյուռքահայ իմ ընկերներն ու անծանոթներն ինձ տեսնելիս ասում են` այդ ինչ տեսահոլովակ էր: Քարսիրտ ընկերներ ունեմ, որ լոմով ծեծես` աչքներից արտասուք չի գա, բայց իրենք ասին, որ տեսահոլովակը դիտելիս` անկախ իրենցից հուզվել են: Ուստի այդ տեսահոլովակը համարում եմ ստացված:

«ԵԿԱՄՏԻ ՄԱՍԻՆ ՉԵՄ ՄՏԱԾԵԼ»

-Ձեր գործընկերներից շատերը վերջին շրջանում տեսահոլովակ այդքան էլ չեն նկարահանում` ասելով, որ այն եկամտաբեր չէ:
- Եկամտի մասին չեմ մտածել, ուղղակի սիրում եմ անընդհատ աշխատել, նորություններ ունենամ իմ ժողովրդի, հեռուստադիտողի ու իմ արվեստը սիրողների համար, տարբեր ժանրերում ինձ դրսեւորեմ: Բնական է, այդ ամենն արտիստի կողմից արվում է, որ միշտ լինի էկրանին, որ չմոռացվի: Դա էլ իր առավելություններն ունի, որովհետեւ անընդհատ մարդկանց ուշադրության կենտրոնում ես, ինչը նաեւ քեզ գործ է բերում` հրավիրում են միջոցառումներին ու համերգներին: Եթե տանը նստես ու ոտքդ ոտքիդ գցես, մի տարվա մեջ կմոռանան քեզ:

«ԿԱՐԵԼԻ Է ԱՍԵԼ` ԹԵԹԵՎ ԸՆԴՄԻՋՄԱՆ
ԱՇԽԱՏԱՎԱՐՁ ԵՄ ՍՏԱՆՈՒՄ... »

-Կամո, արդեն բավականին ժամանակ է, դասավանդում եք Կոնսերվատորիայում, այսօր ի՞նչ ճաշակի սերունդ է գալիս:
- Արդեն 11 տարի է` դասավանդում եմ Կոնսերվատորիայում: Ճիշտ է, ծիծաղելի աշխատավարձ եմ ստանում, այն իսկի իմ մեքենայի մի բաք բենզինը չի լցնում, կարելի է ասել, թեթեւ ընդմիջման աշխատավարձ եմ ստանում, բայց սիրում եմ իմ աշխատանքը, ես սիրով եմ պարապում իմ ուսանողների հետ: Երեւի միակ դասախոսներից եմ, որ ամբողջ գիտելիքներս ուզում եմ փոխանցել նրանց: Մենք ունենք լավ սերունդ, ունենք Հայաստանում փայլուն դուդուկի դպրոց, որովհետեւ սա դուդուկի երկիր է: Ունենք փայլուն վարպետներ, նրանք էլ` իրենց փայլուն աշակերտները: Կոնսերվատորիայում, երաժշտական ուսումնարաններում ու երաժշտական դպրոցներում բավականին լավ սերունդ է մեծանում:

«ԱՍՊԱՐԵԶՈՒՄ ԵՂԱԾՆԵՐՆ ԷԼ, ՉԻ ՆՇԱՆԱԿՈՒՄ, ՈՐ ԼԱՎՆ ԵՆ»

-Ձեր ասպարեզում 4-5 անձնավորություններ են, որ հայտնի են հանրությանը...
- Միայն այդ 4-5-ը չենք, այնքան փայլուն դուդուկահարներ ունենք: Բայց դա չի նշանակում, որ մարդը տեսահոլովակ չունի կամ իրեն եթերներով չեն տեսնում, ուրեմն Հայաստանում 3 դուդուկահար ենք: Ոչ, Հայաստանում փայլուն շատ դուդուկահարներ կան: Չկարծեք, թե եթե նրանք հայտնի չեն, ուրեմն լավը չեն, ոչ, ասպարեզում եղածներն էլ, չի նշանակում, որ լավն են:

ԼԻԼԻԹ ԵՂԻԱԶԱՐՅԱՆ