ԶԱՐՄԱՆՔ

Զարմանալի բախտ ունի ՀՀԿ երիտասարդական կառույցի ղեկավար ԿԱՐԵՆ ԱՎԱԳՅԱՆԸ: Ուր գնում է, ինչ կազմակերպում է, նրան զարմանալիորեն ուղեկցում է կրակը: Այդպես էր 2012-ին Հանրապետության հրապարակում, երբ բռնկվեցին հազարավոր փուչիկները, այդպես եղավ նաեւ երեկ Մարզահամերգային համալիրում, ուր նշվում էր Ուսանողի օրը, եւ ուզած-չուզած տարհանեցին ուսանողներին: Ինչեւէ, լավ է գոնե այս անգամ տուժողներ չեղան: Եվ զարմանալով հանդերձ, մնում է ենթադրել, որ պարզապես Կարեն Ավագյանի ներքին հուրն է ուժեղ:
Ամեն ինչ լսել էինք, սակայն նոր ենք իմանում, որ իշխանափոխությունը կարող է լինել որակյալ: Այդ զարմանահրաշ քաղաքագիտական գյուտի հեղինակն է ԲՀԿ խմբակցության անդամ ՎԱՀԱՆ ԲԱԲԱՅԱՆԸ. "Այո՛, ԲՀԿ-ն ձգտում է ե՛ւ որակյալ, ե՛ւ անցնցում իշխանափոխության: Միաժամանակ, ԲՀԿ-ն ուզում է ապացուցել, որ իշխանափոխությունը ոչ թե ինքնանպատակ է, այլ նրա նպատակն է փոխել երկրի այս մտահոգիչ իրավիճակը, եւ իշխանափոխությունը միջոցներից մեկն է, որով կարող ենք մեկ քայլ առաջ գնալ այն ծրագրերի իրականացման համար, որոնք այսօր ի զորու չենք իրագործել` հաշվի առնելով ե՛ւ կոճակային մեծամասնության առկայությունը, ե՛ւ վարչական ռեսուրսների անարդարացի կիրառումը, ե՛ւ նաեւ իշխանության քաղաքական կամքի բացակայությունը: Պետք են թե՛ քաղաքական լուրջ կամք, թե՛ ճիշտ կազմակերպչական աշխատանք, թե՛ ճիշտ քարոզչական աշխատանք, թե՛ մարդկային ռեսուրսի մոբիլիզացիա: Դրանք չգրված օրենքներ են իշխանափոխության համար, եւ Հայաստանը միակ երկիրը չէ, որ այս ճանապարհով անցնում է": Դե ինչ, ԲՀԿ-ից իշխանափոխություն սպասողը երեւի թե պետք է հիշի չոր առվի եւ գորտի աչքերի պատմությունը: Չնայած, չէ, հիմա իրավիճակը կտրուկ փոխված կլինի, քանզի "եռյակին" միացել է անզուգական Տիգրան Կարապետիչը: Իշխանությունը նաղդ թռցնող է...
Երբ շոտլանդացիներին չհերիքեց ընդամենը մի քանի տոկոս` Մեծ Բրիտանիայից անկախանալու համար, մեր հայրենակիցներից շատերը կատակում էին, որ նրանց ազգային արական հագուստը պետք է համարել ոչ թե կիլթ, այլ "յուբկա": Զարմանալիորեն պարզվում է, որ նման կատակները նյութականանալու հատկություն ունեն: Եվ ահա Շոտլանդիայի ԱՐՔԱՅԱԿԱՆ ԲԱՆԿԸ որոշել է հաճախորդների հետ շփվելիս հրաժարվել պարոն, տիկին եւ օրիորդ դիմելաձեւերից, որպեսզի հանկարծ տրանսգենդերների, գոմիկների եւ լեսբուհիների այլասեռ նրբիկ հոգիները հանկարծ չվիրավորվեն: Եվ հիմա մոգոնել են մի ապշեցուցիչ դիմելաձեւ` միքսթեր... Չէ, իսկական "միքս" է ստացվում` արդեն ոչ միայն փոխաբերական, այլ բառիս բուն իմաստով: Դե, եթե Սերբիայում ԱՄՆ նախկին դեսպանին շնորհում են պատվավոր համասեռամոլի կոչում, այլեւս էլ Եվրոպայում զարմանալու ոչինչ չի մնում: Պատկերացնո՞ւմ եք` եթե առաջ հպարտանում էին պատվավոր քաղաքացու, պատվո դոկտորի, պատվո հյուպատոսի եւ նման այլ կոչումներով, հիմա զարմանալիորեն հպարտանում են "պատվավոր պեդերաստ" դառնալով:
Ինչեւէ, վերադառնանք մեր երկիր: Իսկ մեզանում էլ ոմանք ահավոր դեպրեսիայի մեջ են: Այնպիսի դեպրեսիայի, որ իրար մխիթարում են հեքիաթով, իբր Ռուսաստանի ու Պուտինի վերջն եկել է, եւ ամերիկյան ռմբակոծիչները շուտով կբերեն ազատագրում "հանցավոր ռեժիմից" ու ներկայիս գող ու ավազակների փոխարեն իրենց կնշանակեն գող ու ավազակ: Իսկ, օրինակ, ԱԺ նախկին փոխխոսնակ ՀՀՇ-ական ԿԱՐԱՊԵՏ ՌՈՒԲԻՆՅԱՆԸ այնքան է խորասուզվել դեպրեսիայի մեջ, որ զարմանալիորեն իր գրավոր բառապաշարը "Ֆեյսբուքում" ամեն քայլափոխին համեմում է "էշ", "անասուն", "տավար", լավագույն դեպքում "սրիկա" մակդիրներով: Իսկ ժամանակին նրանից հրապարակավ հնարավոր չէր կոպիտ բառ լսել: Դե ինչ, գոյություն ունի սեզոնին համապատասխան ընտիր միջոց` ընդդեմ դեպրեսիայի` խաշը իր բոլոր պարագաներով հանդերձ:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ