12-ԱՄՅԱ ՀԱՅ ԴԱՇՆԱԿԱՀԱՐԸ ԹՈՒՐՔԻԱՅՈՒՄ ԱՐԺԱՆԱՑԵԼ Է ՀԱՏՈՒԿ ՄՐՑԱՆԱԿԻ
Թուրքիայում տեղի ունեցած Fyucher Star դաշնակահարների մրցույթին մասնակցել է նաեւ Երեւանի Չայկովսկու անվան երաժշտական դպրոցի սան` 12-ամյա ԱՐԹՈՒՐ ԳՐԻԳՈՐՅԱՆԸ: Մրցույթում Արթուրը կատարել է Շոպենի եւ Առնո Բաբաջանյաի մի քանի ստեղծագործություններ եւ արժանացել Ժյուրիի հատուկ մրցանակին` որպես Բաբաջանյանի ստեղծագործությունների լավագույն կատարող:
"Իրավունքի" հետ զրույցում Արթուրը մեծ ոգեւորությամբ պատմեց իր հաղթանակի եւ տպավորությունների մասին. "Մինչ Թուրքիա մեկնելը գիտեի, թե ուր եմ գնում: Այդ պատճառով էլ ամեն օր պարապում էի, որպեսզի Հայաստան վերադառնամ հաղթանակով: Հաղթանակն ինձ համար սպասելի էր, քանի որ ես երկար էի նախապատրաստվել",- նշեց պատանի դաշնակահարը: Նրա խոսքով` իր կատարումները լավ են ընդունել թե՛ ժյուրիի անդամները, թե՛ օտար հանդիսատեսը. "Ինձ շատ բուռն ծափահարեցին, բայց ես հայ հանդիսատեսին ավելի շատ եմ սիրում: Հայ հանդիսատեսի համար ավելի ոգեւորված եմ նվագում",- անկեղծացավ Արթուրը: Բացի Չայկովսկու դպրոցից, նա հաճախում է նաեւ Կոնսերվատորիա եւ սովորում Արմեն Բաբախանյանի դասարանում: Թուրքիայից Հայաստան բերած մրցանակը նրա առաջին մրցանակը չէ: 2013 թվականին Գյումրիում չորս անգամ մասնակցել է դաշնակահարների մրցույթի եւ զբաղեցրել է առաջին եւ երկրորդ հորիզոնականները` ստանալով ոսկե եւ արծաթե մեդալներ. "Օրվա ընթացքում շատ եմ պարապում` 3-4 ժամ, հասցնում եմ նաեւ ընկերներիս հետ շփվել: Իմ բոլոր ընկերները միշտ ուրախանում են իմ հաղթանակներով, երբ Թուրքիայից հաղթանակով վերադարձա, նրանք ինձ շատ ջերմ ընդունեցին",- պատմեց Արթուր Գրիգորյանը: ԶՎԱՐԹ ԽԱՉԱՏՐՅԱՆ
1
3116 դիտում
2
2476 դիտում
3
2109 դիտում
4
1683 դիտում
5
1596 դիտում
