ԵՏՄ-Ի ԱՆԴԱՄԱԿՑՈՒԹՅԱՆԸ ԿՈՂՄ ԼԻՆԵԼՈՎ` ԱՐԹՈՒՐ ԲԱՂԴԱՍԱՐՅԱՆԸ ՍՐԲԱԳՐՈՒՄ Է ԻՐ ՀԱՅՏԱՐԱՐՈՒԹՅՈ՞ՒՆԸ

ԵՏՄ-Ի ԱՆԴԱՄԱԿՑՈՒԹՅԱՆԸ ԿՈՂՄ ԼԻՆԵԼՈՎ` ԱՐԹՈՒՐ

ԲԱՂԴԱՍԱՐՅԱՆԸ ՍՐԲԱԳՐՈՒՄ Է ԻՐ ՀԱՅՏԱՐԱՐՈՒԹՅՈ՞ՒՆԸ

ՕԵԿ խմբակցության  պատգամավոր Լեւոն Դոխոլյանն օրեր առաջ խորհրդարանում հայտարարեց. «Ազգային Ժողովի մշտական հանձնաժողովներում 2015թ-ի պետբյուջեյի նախագծի քննարկումներից պարզ դարձավ, որ Հայաստանը մտնելով Եվրասիական տնտեսական միություն՝ նույնիսկ հստակ չկան հաշվարկներ հնարավոր տնտեսական օգուտների ու վնասների վերաբերյալ: Սա նշանակում է, որ երկիրը մտնում է տնտեսական միություն՝ նույնիսկ տարրական հաշվարկ չկատարելով»: «Իրավունքը» ՕԵԿ խմբակցության  ղեկավար Հեղինե Բիշարյանից պարզեց  հիմք ընդունելով Լեւոն Դոխոլյանի այդ հայտարարությունը, հնարավո՞ր է  ՕԵԿ-ը դեմ քվեարկի Հայաստանի`ԵՏՄ անդամակցության պայմանագրին: Տիկին Բիշարյանն ասաց, որ  տողերիս հեղինակը սխալ է հասկացել պրն Դոխոլյանի հայտարարությունը: Պարզապես  նա խոսում է անդամակցության հնարավոր ռիսկերի մասին ու կատարել տնտեսական այն շեշտադրումները, որոք այսօր առկա են:

- Փաստորեն, ՕԵԿ-ը  կո՞ղմ է  քվեարկելու Հայաստանի`ԵՏՄ անդամակցության պայմանագրի վավերացմանը:

- Նախ պայմանագիրը թող բերեն քննարկման: Պայմանագիրը դեռ ԱԺ-ի դատին չի հանձնվել:  Մենք այդ համագործակցությանը մեծ հաշվով կողմ ենք:

- Եթե պայմանագիրն ԱԺ-ի դատին չի հանձնվել, ինչի՞ց ելնելով է Լեւոն Դոխոլյանը հայտարարել, որ  ԵՏՄ-ի մեջ մտնելով մենք ոչինչ չենք շահում:

- Պրն Դոխոլյանը նման բան չի ասել: Ընդամենը  խոսել է ռիսկերի եւ այն մասին, թե մեր տնտեսության համար ինչ վիճակներ կառաջանան:

- Լեւոն Դոխոլյանի հայտարարությունը կարելի՞ է ինչ-որ չափով ընկալել ՕԵԿ ղեկավար Արթուր Բաղդասարյանի  2006 թ-ին արված այն հայտարարության շրջանակում, որ Հայաստանի ապագան Ռուսաստան-Բելառուս միության հետ չէ, այլ ԵՄ-ի ու ՆԱՏՕ-ի:

- Ձեր հարցադրումը ճշմարտության հետ ոչ մի աղերս չունի:

Հ.Գ. ԱԺ ՕԵԿ խմբակցության ղեկավարին ստիպված ենք  եւս մեկ անգամ հիշեցնել Արթուր Բաղդասարյանի այն հայտարարությունը, որի պատճառով  նա 2006 թ-ին պաշտոնանկ արվեց ԱԺ նախագահի պաշտոնից: 2006 թ. գերմանական «Frankfurter Allgemaine» թերթին տված հարցազրույցում Բաղդասարյանը ՀՀ արտաքին քաղաքականության վերաբերյալ արտահայտեց պաշտոնական հայեցակարգից տարբերվող մտքեր` նշելով, որ Հայաստանի ապագան  Եվրամիության ու ՆԱՏՕ-ի հետ է:  Իսկ ընդհանրապես Արթուր Բաղդասարյանը հայտնի է որպես արեւմտամետ հայացքներ ունեցող քաղաքական գործիչ, որի մասին անգամ գրել է ռուս  քաղաքագետ Միխայիլ Վորոնինն իր հոդվածներից մեկում:  Այնպես որ տիկին Բիշարյան, մեր հարցադրումն այդքան էլ հեռու չէ իրականությունից: Հիշեցնենք նաեւ, որ Հայաստանի ապագան ԵՄ-ի կազմում տեսնող Արթուր Բաղդասարյանը, ԱԽ քարտուղարի աթոռը զբաղեցնելիս, խոսելով ՀՀ-ի Մաքսային միության  անդամակցության մասին հայտարարեց, որ Հայաստանն առաջնորդվեց իր ազգային շահերով՝ հատկապես անվտանգության շահերից, որում Ռուսաստանը ունի մեծ դերակատարություն: Փաստորեն, ՕԵԿ ղեկավարը կարծես թե սրբագրում է  տարիներ առաջ եվրոպամետ իր հայտարարությունը:

Սոնա Դավթյան