ԶԱՐՄԱՆՔ

Պարզից էլ պարզ է, որ ԲՀԿ-ն իշխանափոխություն ոչ պահանջող է, ոչ էլ` անող, բայց արի ու տես, որ պատգամավոր ՄԻՔԱՅԵԼ ՄԵԼՔՈՒՄՅԱՆԸ հավաստիացնում է. "Կյանքը ինքը կթելադրի ժամկետները, ես էլ կողմ չեմ, որ իշխանափոխությունը դանդաղ լինի, ես էլ կողմ եմ արագությանը, ու իշխանափոխությունը պետք է հասունանա, իսկ թե դա կլինի 2 շաբաթվա, թե 1 տարվա ընթացքում` չգիտեմ": Կարճ ասած, ԲՀԿ-ական այդ պատգամավորի խոսքից բխում է, որ իշխանափոխությունը, ինչպես կասեր ժողովուրդը, տեղի կունենա "էշի զատկին": Ուստի զարմանալով հանդերձ, մնում է հարցադրել պարոն Մելքումյանին` արդյո՞ք նրան մանկապարտեզում, դպրոցում, բուհում չէին ուսուցանում, որ խաբելը լավ բան չէ: Ի վերջո, քաղաքական դաշտը հո անշարժ գույքի շուկա չէ...
Իսկ ՀԱԿ խմբակցության անդամ ՀՐԱՆՏ ԲԱԳՐԱՏՅԱՆԻ մասին ամբողջ ՀԱԿ-ը կարող է ասել` մեր հալ, քո հավես: Միշտ ամբողջ թիմով ողբաձայն լալիս են, որ այլեւս ԲՀԿ-ի ծախսերով հնարավորություն չունեն գնալ հրապարակներում ինքնահաստատվելու, եւ հակառակ կողմից էլ, մամուլին "պաս են տալիս" տվյալներ, թե մեկ հոգու հանրահավաքի բերելն ինչքան ծախս է նստում, Բագրատյանը որոշել է սպառազինվել գրչով, ավելի ճիշտ` համակարգչի ստեղնաշարով, եւ ՀՀ պետբյուջեի նախագծի վերաբերյալ 50 դիտողություն եւ առաջարկություն ներկայացնել: Ախր, ինչպես կարելի է, "ավազակապետություն կազմաքանդող" ՀԱԿ-ը բյուջետային ներարկումներից զրկվում է, եւ ԼՏՊ-ի "Քաղաքագիտական վերլուծության" դիմաց հիմա քոռ կոպեկ տվող չկա, իսկ այդ մարդը պետական բյուջեի դարդն է լացում:
Եզրափակելով քաղաքական սադիզմի թեման, չենք կարող չհիշատակել ԷԴՈՒԱՐԴ ՇԱՐՄԱԶԱՆՈՎԻ հայտարարությունը. "Ես բազմիցս նշել եմ, որ հանրապետականը երբեք գործարքների չի գնում եւ ականներ էլ ընդդիմության մեջ չի տեղադրում: Եթե իրենք ունեն խնդիր, ապա խնդիրը պետք է փնտրեն իրենց մեջ: Այնպես չէ, որ "եռյակը" փլուզվի մենք ուրախանում ենք, կամ եթե "եռյակը" չի փլուզվում, մենք տագնապում ենք": Չէ, չեղավ այդպես: Չէ՞ որ ՀԱԿ-ը հայտարարություն էր տարածել, որ ԲՀԿ-ն պետք է արագացնի հանրահավաք անելը, այլապես "քըխ" իշխանությունը կհասցնի պառակտել "եռյակին": Բայց արի ու տես, որ Շարմազանովը զարմանալիորեն պսակազերծում է այդ թեզը, նշում, որ ՀՀԿ-ն ականապատումով չի զբաղվում, ուստի, ծերուկ Տեր-Պետրոսյանը չի կարողանալու հայտարարել` այ, ԲՀԿ-ն մեզ չլսեց, եկան այդ չարագործ հանրապետականները ու ամբողջ "եռյակն" ականապատեցին եւ պայթեցրին:
Ամբողջ հանրապետությունը ցնցված է Շիրակի մարզում տեղի ունեցած ողբերգական ավտովթարից, երբ երթուղայինի այրվելու պատճառով 7 հոգի զոհվեցին: Այդ սահմռկելի ողբերգության ֆոնի վրա գրեթե աննկատելի մնաց Երեւանում մեկ այլ ավտոմեքենայի այրվելը, քանզի դրա արդյունքում, բարեբախտաբար տուժող չկա: Կենտրոնում այրվեց ԶԻԼ մակնիշի ԱՂԲԱՏԱՐ ավտոմեքենան` աղբով հանդերձ, եւ Կենտրոնում ապրողների լուսաբացի գեղեցկությունը փչացավ գարշահոտության պատճառով: Տվյալ դեպքում պետք է զարմանալ ոչ թե աղբատարի վառվելու, այլ այդքան երկար տարիներ աղբատարների չվառվելու վրա, քանզի արտերկրից նոր աղբատարները պետք է տեղ հասնեին դեռ ապրիլի 1-ին, սակայն դրանց հասնելը դարձավ իսկական ապրիլմեկյան պատմություն: Դե ինչ, հուսանք, որ քաղաքապետարանը կլուծի ե՛ւ աղբատարների հարցը, ե՛ւ աղբահանության բարելավման, քանզի այդ դեպքում քաղաքը կպրծնի նաեւ թափառական շներից եւ առնետներից:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ