ԱՐԴՅՈՔ ԿՄԻԱՎՈՐՎԵՆ ԲՆԱՊԱՀՊԱՆՈՒԹՅԱՆ ՈՒ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅՈՒՆՆԵՐԸ

ԱՐԴՅՈՔ ԿՄԻԱՎՈՐՎԵՆ ԲՆԱՊԱՀՊԱՆՈՒԹՅԱՆ ՈՒ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅՈՒՆՆԵՐԸ

Շրջանառվող լուրերի համաձայն` բացի տարածքային ու արտակարգ  իրավիճակների նախարարությունների միացումից, չի բացառվում նաեւ այլ նախարարությունների միացում եւս:  Մասնավորապես, խոսքը վերաբերում է բնապահպանության ու գյուղատնտեսության նախարարությունների, մշակույթի, սպորտի եւ երիտասարդության  նախարարությունների միավորմանը: «Իրավունքն» այսօր  վերոնշյալ գերատեսչությունների ղեկավարներից պարզեց`շրջանառվող լուրերը որքանո՞վ են համապատասխանում իրականությանը:

ՀՀ բնապահպանության նախարար Արամայիս Գրիգորյանն «Իրավունքի» հետ զրույցում ասաց, որ բնապահպանության ու գյուղատնտեսության նախարարությունների միավորման հարց չկա: «Երբ կլինի, կպատասխանենք  ձեր հարցին»,- ասաց նախարարը:

- Իսկ այնուամենայնիվ, եթե լինի նման  երկու նախարարությունների միավորում, ըստ Ձեզ, արդյունավետ  միավորում կլինի՞:

- Եթե կառավարությունը նման  որոշում կկայացնի, այն ժամանակ էլ գնահատականներ կտանք:

ՀՀ գյուղատնտեսության նախարար Սերգո Կարապետյանն էլ ասաց, որ  տեղյակ չէ,  գյուղատնտեսության ու բնապահպանության նախարարությունները կմիավորվեն, թե ոչ:

- Իսկ արդյունավետ կլինի՞ այդ երկու կառույցների միավորումը:

- Կառավարությունը դա կորոշի, դա քաղաքական հարց է: Կառավարությունը ոնց կորոշի, էնպես էլ  կլինի:

- Իսկ Ձեզ համար ընդունելի կլինի՞ գյուղատնտեսության ու բնապահպանության նախարարությունների հավանական միավորումը:

- Ես չեմ կարող ասել,  քանի որ նման բան չկա:

ՀՀ մշակույթի փոխնախարար  Արթուր Պողոսյանն էլ  մի փոքր այլ կարծիքի է: Նա մշակույթի, սպորտի եւ երիտասարդության նախարարությունների միավորմանն արդյունավետ աշխատանքի առումով ասաց.

«Նախկինում կար նման կառույց (նկատի ունի, որ մշակույթի, սպորտի  եւ երիտասարդության  նախարարությունները միասին էին-խմբ.): Ես այդ ժամանակ այդ կառուցվածքում աշխատել եմ: Եվ կարող եմ ասել, որ  որքան էլ միավորեն այդ երկու կառույցները, նրանք  տարբեր գործառույթներ են  իրականացնելու: Ես դժվար եմ պատկերացնում սպորտը, երիտասարդությունն ու մշակույթը»,- եզրափակեց Արթուր Պողոսյանը:

Սոնա Դավթյան