ԳԱԼՈՒՍՏ ՍԱՀԱԿՅԱՆ. «ՉԵՄ ԿԱՐԾՈՒՄ, ՈՐ ԸՆԴԴԻՄՈՒԹՅՈՒՆՆ ԱՅԴ ՀԱՐՑՆ ԱՆԳՐԱԳԻՏՈՒԹՅՈՒՆԻՑ Է ՏԱԼԻՍ»

ԳԱԼՈՒՍՏ ՍԱՀԱԿՅԱՆ. «ՉԵՄ ԿԱՐԾՈՒՄ, ՈՐ ԸՆԴԴԻՄՈՒԹՅՈՒՆՆ

ԱՅԴ ՀԱՐՑՆ ԱՆԳՐԱԳԻՏՈՒԹՅՈՒՆԻՑ Է ՏԱԼԻՍ»

ԱԺ նախագահ Գալուստ Սահակյանն այսօր լրագրողների հետ ճեպազրույցում պատասխանեց ներքաղաքական մի քանի հարցի:

- Պրն Սահակյան, Դուք չե՞ք ընդունում եռյակի հստակ պահանջները:

- Եթե պահանջները եղած հնարավորությունների սահմանում են, ուրեմն կլուծվեն:

- Իսկ ո՞ր պահանջը կլուծվի:

- Դուք ասեք, թե որ պահանջը: Ամեն օր նոր պահանջ է առաջ քաշվում:

- Օրինակ, ընտրական օրենսգրքի փոփոխության հարցը:

- Ընտրական օրենսգրքի փոփոխությունը կլինի ճիշտ ժամանակը:

- Իսկ ընտրություններից հետո ընտրացուցակների հրապարակումը:

- Ես դրան դեմ եմ, քանի որ երբ հրապարակում ես, հարյուրավոր կամ հազարավորներ կգան-կասեն, որ դա իրենց ստորագրությունը չէ: Եվ տարիներով ու դարերով պիտի այդ ստորագրությունները լինեն լաբորատորիաներում:

- Արտահերթ խորհրդարանական կամ նախագահական ընտրությունները  բացառո՞ւմ եք:

- Դա բացասական երեւույթ է: Ես կարծում եմ, որ մեր քաղաքական օրակարգում նման խնդիր ոչ քննարկվել է, ոչ էլ կա իրողության մեջ:

- Արդյոք ՀՀԿ փոխնախագահ Ռազմիկ Զոհրաբյանի երեկվա հայտարարությունն այն մասին, որ մեր ներքին անկայունությունը դուր չի գա ՌԴ-ին, ՀՀԿ-ի պաշտոնական դիրքորոշումն է: Ի՞նչ կասեք:

-  Եթե մի երկրում քաղաքական իրավիճակը լարված է լինում եւ վտանգավոր է դառնում, բնականաբար, վտանգները տվյալ երկրի նկատմամբ շատանում են:

- Հաջորդ տարվա պետբյուջեն քննադատում են ընդդիմադիրները համարելով, որ այն օրվա խնդիր լուծող բյուջե է:

- Ընդդիմադիրներն արտահայտում են իրենց ցանկությունը, իսկ մեր ներկայացրած բյուջեն նրանց ցանկությունների մեջ չի տեղավորվում:

- Ընդդիմադիրներն ասում են, որ հաջորդ տարվա բյուջեի նախագիծը կազմելիս հաշվի չի առնվել Հայաստանի ԵՏմ անդամակցության հարցը...

- Ես չեմ կարծում, որ ընդդիմությունն այդ հարցն անգրագիտությունից է տալիս:  Ընդդիմությունը նպատակային հրահրում է անում: Մինչեւ ԵՏՄ-ի պայմանագիրը չհաստատվի ԱԺ-ում,  կանխատեսումներն իզուր են:

- Ինչպե՞ս եք վերաբերվում ԲՀԿ առաջնորդի  նախագահական հավակնություններին:

- Պատշաճ չէ: Մեր երկիրն ունի նախագահ Սերժ Սարգսյան: Երբ կգա նոր ընտրությունների ժամանակը, կքննարկենք կասենք:

- ՀՀ կառավարությանը  կկարողանա՞ 4,1% տնտեսական աճն ապահովել:

-Կարծում եմ` հնարավորություններ կան: Ես կարծում եմ, որ Հովիկ Աբրահամյանն օպերատիվ է աշխատում:

- ՀՀԿ-ն որքա՞ն ժամանակ է պատրաստվում մնալ իշխանության:

- Մինչեւ ապահովվի Արցախի անկախության ճանաչումը:

- Դրա համար էլ Արցախի հարցը չի՞ լուծվում:

- Արցախի հարցը չի լուծվում, քանի որ Ադրբեջանը բանակցային աթոռին նստելով ոչ մի զիջման չի գնում:

Սոնա  Դավթյան