"ՄՈՎՍԻՍՅԱՆԸ ՑՈՒՅՑ ՏՎԵՑ, ԹԵ ԻՆՉՔԱՆ ԼԱՎՆ Է"

"ՄՈՎՍԻՍՅԱՆԸ ՑՈՒՅՑ ՏՎԵՑ, ԹԵ ԻՆՉՔԱՆ ԼԱՎՆ Է"

Ֆուտբոլի Ռուսաստանի առաջնության 13-րդ տուրի շրջանակներում կայացած "Սպարտակ"-"Արսենալ" հանդիպումն առանձնահատուկ էր Մոսկվայի "Սպարտակի" եւ Հայաստանի հավաքականի հարձակվող Յուրա Մովսիսյանի համար: Վերջինս ծնկի վիրահատությունից հետո երկրորդ անգամ էր ընդգրկվել թիմի մեկնարկային կազմում:
Երկար ժամանակ խաղադաշտից բացակայելու արդյունքում ֆուտբոլիստից մեծ ջանքեր պահանջվեցին` ցանկալի մարզավիճակ ձեռք բերելու համար: Ինչեւէ, հենց "Արսենալի" դեմ հանդիպումը օգնեց Մովսիսյանին վերականգնել հարձակվողական դիրքերը. ՀՀ ազգային ընտրանու ֆուտբոլիստն այս խաղում խփեց իր առաջին գոլն ընթացիկ առաջնությունում, թեեւ Մովսիսյանին "օգնեց" նաեւ "Արսենալի" դարպասապահ Ալեքսանդր Ֆիլիմոնովն իր անհաջող խաղով: Այս գոլը, իհարկե, ֆուտբոլային տեսանկյունից չէր փայլում իր գեղեցկությամբ, բարդությամբ եւ չէր կարող ընդգծել հարձակվողի որակները եւ նույնիսկ մի շարք կայքեր շտապեցին այն անվանել զավեշտալի: Բայց նաեւ չի կարելի անտեսել այդ գնդակի կարեւորությունը` թիմի հաղթանակի եւ հենց Մովսիսյանի համար, ով այս մրցաշրջանում դեռ գոլ չէր հեղինակել: Ինքը` Մովսիսյանը, նույնպես "Նաշ ֆուտբոլ" ալիքի եթերում անդրադարձել է իր խաղին եւ խփած գնդակին. "Կարծում եմª այդպիսի գոլը նվեր է ցանկացած հարձակվողի համար: Լավ է, որ առաջին գոլս խփեցի մրցաշրջանում, բայց պետք է շարունակել: Փորձում ենք կատարել մարզիչի բոլոր առաջադրանքները":
Պետք է նշել, որ այդ "պատահական" գնդակով չեն սահմանափակվել հայ ֆուտբոլիստի օգտակար գործողությունները խաղադաշտում. աստիճանաբար լավ մարզավիճակը վերագտնող Մովսիսյանը բավականին ակտիվ էր հարձակման գծում եւ լավ տպավորություն թողեց ողջ հանդիպման ընթացքում: "Սպարտակի" գլխավոր մարզիչ Մուրատ Յակինը "Արսենալի" նկատմամբ հաղթանակից հետո նույնպես անդրադարձավ Մովսիսյանին: "Շատ կարեւոր է, որ առաջին րոպեներից ձգտում էինք կառավարել խաղը: Ստեղծեցինք մի շարք գոլային պահեր, սակայն խփեցինք 2 գոլ: Սա թիմային արդյունք էր, որին նպաստեցին Մովսիսյանի ու Պրոմեսի գոլերը: Մենք դեռ զարգացման փուլում ենք: Անկասկած, Արտյոմ Ձյուբան ունի մեր թիմում կարեւոր ֆուտբոլիստ դառնալու հնարավորություն: Այժմ ընտրություն ունենք հարձակման գծում: Յուրա Մովսիսյանը ցույց տվեց, թե ինչքան լավն է: Նախորդ շաբաթ Յուրան մասնակցեց թիմի բոլորª 3 գոլային գրոհներին, իսկ այսօր նաեւ գոլ խփեց: Ձյուբան պետք է աշխատի եւ ապացուցի, թե ինչի է ունակ եւ սպասի իր շանսին",- Յակինի խոսքը մեջբերում է "Սպորտ Էքսպրեսը":

ՔՐԻՍՏԻՆԵ ՊԵՏՐՈՍՅԱՆ