"ԱՍԵՑԻ` ՉԷ՛, ԷԼԻ... NO!"

"ԱՍԵՑԻ` ՉԷ՛, ԷԼԻ... NO!"

"Եռյակին" մանր-մունր` մի "Զապորոժեցում" տեղավորվող կամ կուսակցապետից եւ կուսակցական կնիքից բաղկացած քաղաքական անհաջողակ միավորներ կցելը ամենեւին չնպաստեց, որ "եռյակի" մեկը երկուս դառնա: Ընդհակառակը` արդեն բոլորը սպասում են, թե "եռյակին" երբ է պաշտոնապես հրաժեշտ տալու "Ժառանգությունը", քանզի այդ կուսակցությունը կտրականապես դեմ է ԵՏՄ-ին, իսկ ՀԱԿ առաջնորդն էլ մեկի տեղը երկու անգամ դեմ լինողներին "ջղաձգվողներ" սեպեց:

Բայց նաեւ ՀԱԿ-ի պարագայում, կարծես թե, շաբաթն ուրբաթից շուտ եկավ:

ՈՎ ՎՃԱՐՈՒՄ Է, ՆԱ ԷԼ ՊԱՏՎԻՐՈՒՄ Է

Եվ այսպես` պարզվում է, որ ՀԱԿ-ի սիրտը հանրահավաքներ է ուզում, իսկ ԲՀԿ-ն նախընտրում է տեղերում աշխատանք կազմակերպելը: Ու ՀԱԿ-ի տարածած հայտարարությունը ցույց է տալիս, որ ներսում ՀԱԿ-ԲՀԿ կարծիքների բավականին կոշտ բախում է եղել, ու համաձայնության չեն եկել: Այլապես, ՀԱԿ-ը հրապարակավ չէր հայտնի մտահոգություն, որ հանրահավաքներ չանելը կթուլացնի շարժումը եւ իշխանությանը հնարավորություն կընձեռի "եռյակը" ներսից պառակտելու: ԲՀԿ-ն էլ ընդհակառակը` պնդում է, որ ժամանակն աշխատում է հօգուտ "եռյակի": Ինչեւէ, թեեւ հայտարարվեց, որ չորեքշաբթի "եռյակը" միասնական տեսակետ կներկայացնի, սակայն հակասության առկայությունն ակնհայտ է:
ԲՀԿ քաղխորհրդի որոշման հրապարակումը ԲՀԿ տեղական գրասենյակների բազայի վրա "համաժողովրդական շարժման շտաբների" ցանց ձեւավորելու վերաբերյալ միանգամից հարուցեց ՀԱԿ-ի դժգոհությունը: Քանզի միայն հանրահավաքային միջավայրում ԼՏՊ-ն կարող է դրսեւորել իր լիդերական հատկությունը, իսկ շտաբային բնույթի կամ այլ կառուցվածքային աշխատանքներում ուժեղը նա է, ով օժտված է ավելի մեծ ֆինանսական եւ մարդկային ռեսուրսով: Պարզ է, որ այդ պայմաններում վճռորոշ է դառնում ոչ թե ճարտար լեզուն եւ քաղաքական փորձը, այլ փողը եւ մարդաքանակը հաշվող համրիչը: Տվյալ դեպքում, ՀԱԿ առաջնորդի "քաղաքագիտական վերլուծությունները" չեն աշխատում, եւ ՀԱԿ-ին մնում է կամ համակերպվելը, կամ հեռանալ: Իզուր չէր, որ ԲՀԿ մամլո խոսնակ Տիգրան Ուրիխանյանը հայտարարել էր, որ ՀԱԿ-ը սրտի ուզածի չափ կարող է ինքնուրույն անցկացնել հանրահավաքներ եւ այլ հրապարակային միջոցառումներ, եթե հարկ է համարում: Բայց նաեւ ակնհայտ է, որ Լեւոնը մեն միայնակ կամ Րաֆֆիի հետ միասին կարող է միայն խղճուկ մի բան հավաքել հրապարակում, դրանով իսկ ի ցույց հանելով սեփական իրական քաղաքական քաշի չնչինությունը:

"ՄԱՅԴԱՆՆԵՐԻ" ՅՈԹՆ ՈՒ ՔԱՌՍՈՒՆՔԸ

"Եռյակը" մայդանային փորձ կարող է անել միայն մի դեպքում` եթե ամենաուշն այս ուրբաթից սկսի շուրջօրյա հանրահավաքները եւ այլ փողոցային միջոցառումները, որոնց ընթացքում հմուտ հռետորներն անընդհատ տաքացնեն ամբոխին, ու դրան գումարվեն նաեւ թեեւ ոչ մեծ, բայց մարտունակ գրոհային ջոկատները: Սակայն ԲՀԿ քաղխորհրդի "շտաբային" որոշումը նշանակում է, որ այլեւս ԲՀԿ-ն է փաստացի լիդերը, եւ եթե համաձայնություն չտա` ոչինչ էլ չի լինի: Իսկ, խոշոր հաշվով, ԲՀԿ-ի ինչի՞ն է պետք գնալ կտրուկ առճակատման իշխանության հետ, անցնել կարմիր գիծը, որից հետո ԲՀԿ-ի գործարար հատվածը կշտապի ազատվել ԲՀԿ անդամատոմսերից նույնքան փութաջան, որքան կձգտեր դեն նետել այրվող շապիկը:
Իսկ ՀԱԿ-ի իրական նպատակը, եթե ոչ ԵՏՄ անդամակցության տապալումն է, ապա գոնե ներքաղաքական խոշոր ցնցումը, որը կապահովի "կազմաքանդում": Եվ ԼՏՊ-ի` ԵՏՄ-ին տված հրապարակային երդումները առերես են, ճիշտ ու ճիշտ այն թուրքական ասացվածքին համապատասխան, որ եթե չես կարող կտրել քեզ հարվածող ձեռքը, ապա համբուրիր եւ դիր գլխիդ: Իսկ այժմ ԲՀԿ-ի որոշումով` ՀԱԿ-ի ձեռքից գնում է ե՛ւ Մայդանի, ե՛ւ "կազմաքանդումների" շանսը: Հիմա ԲՀԿ-ն, եթե կամենա` իր ռեսուրսը կօգտագործի իշխանության վրա ճնշում գործադրելու համար, այլ հարց է` դա կանի ի շահ իր կուսակցակա՞ն շահի, թե՞ Ռոբերտ Սեդրակիչի: Կարող է կամենալ նաեւ բանակցել եւ համաձայնության գալ իշխանության հետ: Բայց երկու դեպքում էլ, ՀԱԿ-ին հասանելիքը, եթե արտահայտվենք օլիգարխիկ կրիմինալի լեզվով, "թուլափայ" է ու ոչ ավելին:
Իսկ գլոբալ առումով, եթե ամփոփենք այն ամենը, ինչ տեղի է ունեցել ոչ իշխանական դաշտում, դա կարելի է բնութագրել որպես մայդանների յոթն ու քառսունքը տալու գործընթաց: Բոլոր արեւմտամետ ուժերի կատարյալ համախմբումով ու մեկտեղումով Մայդանի փորձ անելու փոխարեն ստացվեց Ազատության հրապարակի եւ հրապարակային բողոքների հարթակների գրավումը "քառյակի" կողմից, այդպես էլ իրեն ընդդիմություն չհռչակած ԲՀԿ-ի պատճառով դա կոչվեց ոչ թե ընդդիմադիր, այլ ոչ իշխանական... Հետո հեռացան դաշնակները, հետո ՀԱԿ-ն ու ԲՀԿ-ն միասին որոշում էին, թե ինչպես "քըշ" անել ռուսների աչքում իրենց համար պրոբլեմ ստեղծող "Ժառանգությանը": Իսկ հիմա էլ նման է, որ ԲՀԿ-ն է ՀԱԿ-ի առաջ ընտրություն դրել` կամ "քըշ" եղեք, կամ դարձեք գրպանային կցորդ: ՀԱԿ-ը իր գործն արել է` մաքրել ԲՀԿ-ի վրայից ե՛ւ մարտիմեկի, ե՛ւ "օլիգարխիկ կրիմինալ" լինելու խարանները, հետեւաբար ՀԱԿ-ը, խոշոր հաշվով, այլեւս պետք չէ: Այժմ ՀԱԿ-իստները "Լեւոն պապիով" հանդերձ վերածվել են իզուր տեղը ռեսուրս ուտող խառնակիչ եւ լաչառ թոշակառուների:
Դե, իսկ Մայդանը... Մայդանի յոթն ու քառսունքը տրված է, ու դա այլեւս մնացել է քաղցր, բայց անիրագործելի երազանք:

ՀՈՎՀԱՆՆԵՍ ԳԱԼԱՋՅԱՆ