ԲՀԿ-Ի ԱՋ ՁԵՌՔԸ ՉԳԻՏԻ, ԹԵ ԻՆՉ Է ԱՆՈՒՄ ՁԱԽ ՁԵՌՔԸ

ԲՀԿ-Ի ԱՋ ՁԵՌՔԸ ՉԳԻՏԻ, ԹԵ ԻՆՉ Է ԱՆՈՒՄ ՁԱԽ ՁԵՌՔԸ

«Եռյակը»` ԲՀԿ-ը, ՀԱԿ-ը, «Ժառանգությունն» այսօր ԱԺ ԲՀԿ խմբակցության  սենյակում կազմակերպել էին  հերթական  նիստը: Մոտ երկու ժամ տեւած նիստի ընթացքում քննարկվել են կազմակերպչական  հարցեր, որոնք առնչվում են համաժողովրդական շտաբների  աշխատանքին, ինչպես նաեւ քննարկվել են  եռյակի  առաջիկա  անելիքները:  Նիստի ավարտից հետո այս մասին  լրագրողներինբ տեղեկացրեց  ԲՀԿ պատգամավոր Ստեփան Մարգարյանը:

Նրա խոսքով՝ չորեքշաբթի օրը, եւս նախատեսված է անցկացնել «եռյակի» նիստ, որից հետո «եռյակի»  կողմից կհնչի վերջնական հայտարարություն:

Ինչ վերաբերում է ՀԱԿ-ի այն հայտարարությանը, թե  համաժողովրդական շտաբների ստեղծումը կարող է ճակատագրական  սխալ լինել, եթե դադարեցվեն  հանրահավաքների անցկացումը, որից կարելի է ենթադրել, որ «եռյակը»  կպառակտվի, Ստեփան Մարգարյանը բացասական պատասխան տվեց. «Ոչ, նման բան չի լինի: Ես նորմալ եմ համարում, որ յուրաքանչյուրն ունի իր տեսակետը այս կամ այն խնդրի վերաբերյալ»:

Իշխանափոխության  պահանջը դեռ «եռյակի», օրակարգո՞ւմ է հարցին ի պատասխան Ստեփան Մարգարյանն  ասաց, որ պահանջների առումով ոչինչ չի փոխվել:

«Իրավունքի» հարցին` արդյոք ԲՀԿ-ը իշխանափոխություն ասելով` նկատի ունի Սերժ Սարգսյանի ու ՀՀ կառավարության հրաժարականը, ԲՀԿ պատգամավորն ասաց, որ իրենք նկատի ունեն ընդհանուր իշխանափոխություն, դա բոլորին է վերաբերում:

Հստակեցնող հարց հնչեցրինք`ԲՀԿ-ը իշխանափոխություն ասելով` նկատի ունի՞  Սերժ Սարգսյանի ու ՀՀ կառավարության հրաժարականը, Ստեփան Մարգարյանն ասաց. «Այո,  պլյուս համակարգային փոփոխություն»:

Հ. Գ. Իսկ ինչո՞ւ են ԲՀԿ այլ պատգամավորներ, հատկապես ԲՀԿ-ի գործարար թեւը խուսափում նման հայտարարություն հնչեցնել:  Կուսակցության ներսում առկա այս իրավիճակը, կարծում ենք, կարելի է  բնորոշել հետեւյալ կերպ` ԲՀԿ-ի աջ ձեռքը չգիտի, թե ինչ էանում ձախը:

Սոնա Դավթյան